Nunaminertamik inniminniineq
Imm. 1. Nunaminertamik inniminniinissamut qinnuteqarneq qinnuteqaateqarnermut immersugassamik naqeriikkamik immersuinikkut pisarpoq, taannalu Kommuneqarfik Sermersuumut imaluunniit kommunip nunaqarfimmi immikkoortuanut imaluunniit kommunip allaffianut nassiunneqassaaq. Qinnuteqarnissamut immersugassaq Kommuneqarfik Sermersuumi Sanarfinermut Avatangiisinullu ingerlatsivimmit (Nunaminertanut oqartussat) pissarsiariniarneqarsinnaavoq.
Imm. 2. Kinaluunniit, tassa imaappoq inuit ataasiakkaat, suliffeqarfiit, ingerlatseqatigiiffiit aamma peqatigiiffiit nunaminertamik qinnuteqaateqarsinnaapput.
Imm. 3.Nunaminertat nutaat pillugit nalunaaruteqarnermut atatillugu qinnuteqarnermi siullermik nunaminertamik inniminniinermut qinnuteqartoqassaaq kingornalu nunaminertamik atugassinneqarnissamik qinnuteqartoqarluni.
Imm. 4. Nunaminertamik inniminniinermut qinnuteqaammut ilanngunneqassapput nunaminertap atorneqarnissaanut piffissalersuut aamma qinnuteqartup aningaasaqarnikkut nunaminertamik atuinissaminut akiliisinnaasusiata uppernarsarneqarnera.
Imm. 5. Makitsinermi qinnuteqarsinnaatitaasut tamarmik makitsinissamut atugassamik ataatsimik peqarnissaat tunngaviusarpoq. Taamaalillunilu katissimallugu aapparisaq, inuk inoqutigiinneersoq, inuit allat qinnuteqaammut tunngatillugu imaluunniit toqqaannartumik attuumassuteqartut - ataatsimoorussamik soqutigisaqaqateqartut, imaluunniit selskabinut inunnullu selskabimiittunut - piginnittutut imaluunniit ingerlatseqatigiiffiup aqunneqarneranut ilaasut - allalluunniit ingerlatseqatigiiffimmut taassumaluunniit aqunneqarneranut qanimut attuumassuteqartut makitsinermi peqataatinneqarsinnaanngillat, nunaminertanut ataasiakkaanut ataasiinnarmik qinnuteqaateqartoqarsinnaammat. Aamma suliffeqarfissuarnut tamanna atuuppoq. Assersuutigalugu aappariinnut marluusunut, imaluunniit ingerlatseqatigiiffimmut taassumalu pisortaaneranut imaluunniit ingerlatseqatigiiffinnut marlunnut ataatsimik pingaarnertut aningasaliisulinnut il.il. immikkut qinnuteqarnissaq inerteqqutaavoq.
Imm. 6. Qinnuteqaatit allakkatigut tiguneqartut imaluunniit nammineerluni ulloq taanna tunniussat ataatsikkoortutut naatsorsuunneqassapput. Qinnuteqaatit arlallit ataatsikkut tiguneqarpata, nunaminertaq qinnuteqaateqartut akornanni makitsissutissanngortinneqassaaq.
Imm. 7. Nunaminertat atugassanngorlugit nalunaarutigineqaraangata qinnuteqartut tamarmik allagarsiussami ulluliunneqartup iluani qinnuteqartut ataatsikkoortutut naatsorsuunneqassapput. Ulloq taanna qinnuteqartut nunaminertamut ataatsimut qinnuteqarsimappata makitsinikkut nunaminertaq kimit inniminnerneqartoq aalajangerneqassaaq. Makitsisoqarnerani qinnuteqarsinnaasut sinneri utaqqisunut allattorsimaffimmut inissinneqassapput. Inuk arlaannaannulluunniit attuumassuteqanngitsoq aamma kikkut tamat peqataaffigisinnaasaannik makitsisuussaaq.
Imm. 8. Nunaminertanut nalunaarutigineqartunut qinnuteqartoq ataasiinnaappat, nunaminertaq qinnuteqartumut makitsinertaqanngitsumik inniminnerneqassaaq.
Imm. 9. Kommunalbestyrelse immikkut ittumik pisoqartillugu, assersuutigalugu allilerisoqartillugu, atuinermik allannguisoqartillugu kommunimullu pilersaarummi anguniakkanik piviusunngortitsinissamut atatillugu nalunaaruteqartarneq allatoortoq atussallugu aalajangersaasinnaavoq, pisariaqarpat imm. 7-imi taaneqartumit allaanerusumik makitsisoqarluni utaqqisullu allattorsimaffiliorluni. Periuseq allanngortinneqartillugu nalunaarummi tamanna erseqqissaatigineqartassaaq.
Imm. 10. Nunaminertamik inniminniineq atorunnaarpat nunaminertaq nunaminertamut qinnuteqartumut utaqqisut allattorsimaffiani tulliusumut neqeroorutigineqassaaq.
Imm. 11. Nunaminertaq utaqqisunut allattorsimaffimmi utaqqisoqarunnaarneratigut atorneqarsinnaalerpat imm. 6 malillugu qinnuteqartut tulleriiaarlugit suliarineqassapput.
Imm. 12. Qinnuteqartup piffissaliunneqartoq eqqortinngippagu imaluunniit pisariaqartunik uppernarsaatinik tunniussinngippat, piffissaliunneqartoq qaangiuppat nunaminertamik inniminniineq ilimasaarutitaqanngitsumik atorunnaarsinneqassaaq.
Imm. 13. Nunaminertamik atugassiisoqaraangat nunaminertamut utaqqisunut allattorsimaffik atorunnaartarpoq. Nunaminertaq atugassanngoqqissappat tamanna nutaatut saqqummiunneqassaaq.