Cykelinut aqqutit

Angallannermi isumannaannerulernissaq aamma pisuinnaat angallaffeqarluarnissaat tamatumunngalu peqatigitillugu pisuinnaat cykelertullu angallannissaannut pilerinarnerulernissaa Kommuneqarfik Sermersuumit anguniarneqarpoq. Aqquserngit ikaarfissat kaajallattarfiillu toqqissisimanannginneri ulorianarsinnaanerilu pinaveersaartinnissai eqqarsaatigalugit ataavartumik suliniutiginerisa saniatigut cykelertut pisuinnaallu nutaanik aqqusiorneqarlutillu cykelinut aqqutit pioreersut allisarneqarnerisigut attaveqarneq piussaaq.
Aqquserngit sullorsuakkullu aqqutit nutaat ilusilersornerini cykelertunut aqqutit aqqutigineqarsinnaanissaat toqqissisimanartuunissaallu pingaartinneqarluinnarput, ilaatigut cykelertut toqqissisimanartumik ajornaquteqanngitsumillu ingerlasinnaanissaat qulakkeerniarlugu aqqutit silissusaat, ikaarfissaat aserfallatsaaliornerilu pitsaasuussallutik.
Cykelertartut uninngasarfiisa pisariaqartut pilersinneqassapput kommunimut pilersaarut maannakkut kommunimut pilersaarummut tapiliussatut atuuttumut ilanngunneqarneratigut, kisianni tapiliussani aalajangersarneqarsimanngitsut eqqarsaatigalugit kommunimut pilersaarummi uninngasarfeqarnermut periutsit atorneqartut innersuussutigineqassapput.