Qeqertarsuatsiaat

Pingaarnertut iluseq
2020-mi januaarip aallartinnerani nunaqarfimmi 169-it aalajangersimasumik najugaqarput. 2000-imiilli innuttaasut, ukioqatigiiaani assigiinngitsuni tamani, 65+ kisiisa pinnagit taamaaginnarsimasut, malunnaatilimmik ikileriarsimapput.

Najugaqarfiit
Ilimagineqarpoq inissiat allaanerit piumaneqaraluttuinnassasut, soorlu Qeqertarsuatsiaani inissiat utoqqarnut naleqqussakkat.
Sumiiffik nunaqarfiup kujataaniittoq najugaqarfissatut toqqarneqarpoq, taannalu aatsaat atulissaaq najugaqarfissat pioreersut tamarmik sanaartorfigineqareerpata. Najugaqarfittaassaq taanna kommunimi pilersaarummi matumani aalajangiusimaneqarpoq.

Inuussutissarsiuteqarfiit
Qeqertarsuatsiaani inuussutissarsiornikkut ileqqorineqartut malillugit saarullinniarneq piniarnerlu tunngaviupput. Imartaani aalisarneq siusinnerusukkut annertunerusimavoq tunisassiorfiup, talittarfiup allallu nunaqarfimmi aningaasaliiffigineqarnerinik pilersitsisumik.

Kommunalbestyrelse isumaqarpoq Qeqertarsuatsiaani suliffissaqarniarnermik pitsanngorsaanissamut periarfissat pingaarnerit aalisarnermut nunamilu inuussutissarsiutinut allanut, soorlu sanalunnermut pinnersaasiornermullu minnerunngitsumillu rubininik qalluinermut, tunngasuusut.

Immikkoortut ataatsimoorussat
Atuarfik, atuagaateqarfik, ulluunerani paaqqinnittarfik, oqaluffik, peqqissaasoqarfik, allakkerivik, qatserisarfik, innaallagissiorfik, kommunip allaffia, utoqqarnut najugaqarfik, il.il. Qeqertarsuatsiaani nassaassaapput.
Nunaqarfimmi atuartut 7. klasse ilanngullugu ilinniartinneqarnissamik neqeroorfigineqarput. Atuarnerup kingorna atuarfiup atuartuinut sunngiffimmi neqerooruteqarpoq.
Atuarfimmi atuakkanik atorniartarfeqarpoq.

Katersortarfik aasaanerani matoqqasarpoq, aamma klubbit initai immikkoortut, meeqqat inuusuttullu ukioq naallugu katersuuffigisinnaasaat, pisariaqartinneqarput.

Taseq kaajallugu, arsaattarfik, eqqaavik aamma iliveqarfik sisorartunut qullilersugaavoq.

Allanngutsaaliugassatut soqutigisat
Allanngutsaaliugassatut soqutigisat eqqarsaatigalugit illut allanngutsaaliugassat ingitseqqusaannginneri, aamma illup illuliortaatsikkut iluseqqaavata sannaatalu ataqqineqarnissaat pillugit aalajangersaasoqarpoq.

Angallanneq, teknikkimut avatangiisimullu tunngasut
Angallannerup pitsaanerulersinnissaa qulakkeerumallugu nunaminertamik heliportimut nutaamut atorneqarsinnaasumik inniminniilluni immikkoortitisisoqarpoq, taamaakkaluartoq kommunimut pilersaarusiorfiup iliuani sanasoqarnissaa pilersaarutaanngilaq.

Nunaqarfik sapaatip akunneranut ataasiarluni umiarsuaqartarpoq, ullumikkulli Qeqertarsuatsiaat aalajangersimasumik timmisartuussiviunngilaq.

Qeqertarsuatsiaat uuliatortumik inaallagissiorfeqarpoq tassungalu atasumik tankeqarfeqarluni.

Kiassarneq inissiani ataasiakkaani annerusumik uuliamik kiassaammik pisarpoq. Taamaattorli suliffissuaq illusisimmaviillu marluk kommunimit pigineqartut Elværkimiit kissamik pilersorneqarput, tamatumalu saniatigut kissartoq naammanngikkaangat kissarsuut uuliatortumit kiassarneqartarlutik.

Qeqertarsuatsiaani imermik pilersuineq ukioq kaajallallugu nunaqarfiup kujataani imeqarfimmit pisarpoq. Imeqarfik arfineq marlunik kujasinnerusumiittumik immerneqartarpoq, naqitsivimmiillu imeq ruujorikkut qerinaveersakkakkut imeqarfimmut (imertartarfiusimasumut), imertartarfinnut tallimanut ringimik attavilerlugu nunaqarfimmik imermik pilersuisumut maqinneqartarpoq. imermik siammarterinermut attaveqaatit kingorna imermik pilersuinerup annertusitinneqarnerani atorunnaassapput. Suliffeqarfiit, tunisassiorfik atuisullu ataatsiakkaat imermut toqqaannartumik attaveqarput. Imeqarfiit pillugit killeqarfiit aalajangersarneqarput.

Igitanut anartarfilerinermullu aaqqissuussaqarpoq. Igitat eqqaaviup eqqaani nunaqarfiup ikuallaaviani ikuallanneqartarput ingerlalluartumik. Eqqaavimmi ikuallanneqarsinnaanngitsunut inissaq killeqarpoq, soorlu minguit, savimerngit, il.il. savimerngit Nuummut saviminernut eqqaavimmut ingerlateqqinneqartarput.

Anartarfiit katersorneqartarput nunaqarfiullu avannaata kangianut imaanut iginneqartarlutik. Nunaqarfimmi illunit inigineqartunit 100-nit illut 90 imeqarput kuutsitakkamik 14-iinnaat tankeqartut.