Nunaminertanik ataatsimoorussassatut siunertaqarfigineqartunik atugassiissutigineqartunik atuinerit pillugit aalajangersakkat immikkut ittumik qiterisaqarfiit tamanillu tikinneqarsinnaasutut siunertaqarfigineqartut pillugit aalajangersakkani pingaarnerniipput.
Nunaminertat sanaartorfigineqanngitsut allatut siunertaqarfigineqartutut atugassiissutigineqarsimanngitsut nunaminertatut tamanit tikinneqarsinnaasutut avatangiisit inissisimaffiannut atorneqarnerannullu naleqquttuutillugit taamaallaat aaqqissuunneqassapput atorneqarlutillu.
Immikkoortumi taamaattumi utoqqarnut inissianik sanaartortoqarsinnaavoq.
Qitiusoqarfiit (C1)
Qitiusoqarfiit siunertaat pingaarnerit tassaapput ulluinnarni atugassanik niuertarfeqarfiit, namminersorlutik inuussutissarsiortut, kiffartuussinermik inuussutissarsiutillit aamma inissiat inissisimaffiat Immikkoortuni qitiusoqarfittut piukkussani pisortat siunertaannut sanaartukkanik ataasiakkaanik sanaartortoqarsinnaavoq.
Qitiusoqarfimmi illoqarfinni atuuttut naleqqussarneqarsinnaapput: kiffartuussinermik inuussutissarsiutit, namminersorlutik inuussutissarsiortut (ussassaarusiornermik suliaqartartut, qarasaasialerisut, eqqartuussissuserisut, illussanik titartaasartut, ingeniørit, illunik tuniniaasartut, kukkunersiuisut assigisaalu), nakorsiartarfiit (kigutilerisoq, fodterapeut, tarnip pissusiinik ilisimasalik assigisaalu), kiffartuussiviit, pisortat allaffii, inissiat, akunnittarfik, neriniartarfik, biilinik unittarfik teknikkimullu tunngasut pisariaqartut assigisaalu. Aammattaaq avatangiisinut mingutsitsivallaanngitsunik inuussutissarsiorfinnik naleqqussaasoqarsinnaavoq, soorlu sannaviit, assassorluni sulliviit, toqqorsiviit, angallassisut assigisaalu.
Tamanut siunertat (C2)
Tamat ataatsimoorussamik siunertarineqartut tassaapput atuarfiit/atuartitsinerit, meeqqanut, inuusuttunut utoqqarnullu ornittakkat, oqaluffiit, pisortat allaffeqarfii, sanaartukkat kulturimut tunngasut, sunngiffimmi sukisaarsarnermilu siunertat, biilit uninngasarfii teknikkikkullu atortuusiviit il. il. Nunaminertat sanaartorfiunngitsut allanut siunertanut atugassiissutigineqarsimanngitsut tamat ataatsimoorussaanut sanaartorfiunngitsutut taamaallaat atugassanngortinneqaqqusaapput, aammalu immikkoortup inissisimaffianut atorneqarneranullu naleqquttumik iliuuseqartussaallutik.