Erseqqissumik nalilersuereernikkut, kommunimut pilersaarummut tapiliussamit kommunalbestyrelse aalajangersakkanit immikkuualuttunit immikkut ittumik akuersissuteqarsinnaavoq, PI-mi § 50 naapertorlugu, immikkut ittumik akuersissuteqarneq kommunimut pilersaarummi tunngavinnut akerliunngippat.
PI § 20, nr. 1 aamma nr. 2-mi siunertat aammalu atorneqarnissaanut aalajangersakkat naapertorlugit kommunimut pilersaarummut tapiliussami tunngaviit aalajangersarneqarput, taavalu immikkoortup ilaanut pingaarnertut aalajangersakkat naapertorlugit aalajangersagaallutik. Kommunimut pilersaarummut tapiliussami tunngaviit aamma ilagivaat ilusissatut pilersaarutaareersut, imaappoq soorlu assersuutigalugu immikkoortup ilaani inissiat inuussutissarsiuteqarfiillu akornanni amerlassusissatut aalajangersakkat.
Aalajangersakkat immikkuualuttut kommunimut pilersaarummut tapiliussami aalajangersarneqareersut aammalu assersuutigalugu sanaartukkat angissusaanik, ilusaanik isanaartorfissallu inissisimaffissaannik aalajangersaaffiusut, kommunimut pilersaarummut tapiliussami tunngavinnut ilaanngillat, taakkunannga immikkut ittumik akuerineqarnissamik qinnuteqartoqarsinnaammat. Taakkunannga ilaanngillat allanngutsaaliinissamut tunngatillugu aalajangersakkat, pingaarnertut aalajangersakkanut uiggiullugit oqaasertaliunneqartartut.
Kommunimut pilersaarummut tapiliussami aalajangersakkani immikkuualuttunit immikkut ittumik akuersissuteqartoqarsinnaanngilaq, taamaattumillu immikkut ittumik akuersissuteqarfigeqqulluni qinnuteqaatit suulluunniit erseqqissumik nalilersorneqartassapput.
Immikkut ittumik akuersissuteqarfigeqqulluni qinnuteqarnermi pissutsit arlallit nassuiaateqarfigineqartussat tassaapput;
- aalajangersakkamit (-nit) sorlermit immikkut ittumik akuersissuteqarfigineqarnissamik qinnuteqaateqarnerlutit,
- immikkut ittumik akuersissuteqarfigineqarnissamut tunngavilersuut; qinnuteqaateqarnermut ilanngullugu nassiunneqassaaq, aalajangersakkamit pineqartumit sooq immikkut ittumik akuersissuteqarfigineqarnissat qinnuteqaatiginerlugu nassuiaateqarnissat aammalu sooq akuerineqassanerlutit. Nassuiaateqarninnut ilannguttariaqarpatit atortussat allaaserineri aammalu sanaartornermut atortut suunerisa nassuiaataat, qalipaatit toqqakkat aammalu titartagartaat pisariaqartut; taakkununnga ilanngullugit illup saqqaanut akimullu titartagartaanut tunngasut.