Nunaminertamik atugassiineq
Nunaminertamik nutaamik atuilersitsinerit tamarmik Kommunalbestyrelsip nunaminertamik atugassiilluni akuersissuteqarneratigut pisussaavoq. Aamma nunaminertat illulluunniit allatut atorneqarnissaat, nunamik allannguinerit kiisalu tunniussinermi aamma illunik nappaaqqinnermi.
Nunaminertamik atugassiisarneq tunniunneqartoq allamut atugassinneqartussaanngilaq piginnittussaatitaasumullu allamut tunniussinissaq aatsaat nunaminertamik oqartussaqarfimmit tunniunneqarsinnaalluni. Taamaattumik piginnittumit allamut illumik aammalu/imaluunniit sanaartukkamik pisinermi, imaluunniit kingornussinermi aammalu pigisanik piginnittussaatitaanerit piviusunngortinnerini, nunaminertamik atugassiisarnikkut atuinissamut piginnittussaatitaaneq suliarineqassaaq.
Quppernermi tassani ataavartumik nunaminertamik atugassiisoqartillugu nalunaaruteqartoqartassaaq.
Nunaminertamik atugassiissutit nalunaarutigineqarsimasut linkimi ilanngussami uani nunagis.gl-imi takuneqarsinnaapput.
Sanaartorfissat suli atugassiissutigineqanngitsut
Pilersaarusiorneq aamma nunaminertat atorneqartarneri pillugit Inatsisartut inatsisaat nr. 17, 17. november 2010-meersoq tunngavigalugu Inatsisartut inatsisaannik nr 34, 2015-imi decembarip ulluisa qulingiluaanneersumi allanngortinneqartoq, taamaalilluni Kommuneqarfik Sermersuumi sanaartorfissat utaqqisunullu allattorsimaffimmiittut tamanut nalunaarutigineqarput.
Linki: Sanaartorfissat suli atugassiissutigineqanngitsut.
Nunap assingani Kommuneqarfik Sermersuumi sanaartorfissanik aamma killiffiinik imaqarpoq. Sanaartorfissaq piniarneqarsinnaavoq, inniminnerneqarsinnaavoq, atugassiissutigineqarsinnaavoq (nunaminertanik atugassiineq) imaluunniit qinnuteqarfigineqarsinnaanngikkallarpoq.
Nunaminertaq ataaseq arlalinnit qinnuteqaatigineqarpat utaqqisut allattorsimaffiannik pilersitsisoqarsimasinnaavoq.
Nunaminertamik atuisinnaatitaaneq niuerutigineqassanngilaq imaluunniit taarsigassarsianut qularnaveqqusiunneqassanani.
Nunaminertamik atugassiisarneq pillugu nalinginnaasumik paasissutissiineq
Illit innuttaasutut, inuinnartut suliffeqarfittulluunniit assersuutigalugu illuliorusukkuit nunamik atuisinnaatitaavutit. Nunaminertamik atugassinneqarnissamut qinnuteqaateqarnikkut nunaminertamik atuisinnaatitaavutit.
Kommuneqarfik Sermersuumi Sanaartornermut Avatangiisinullu Ingerlatsivimmi Sanaartornermut Nunaminertanullu Oqartussaqarfiup nunaminertanik atugassiisarnerit ingerlatarai.
Nunaminertanik atugassiisarnermut qinnuteqarnermut periutsit marluupput:
- Nunaminertamik atugassiinissamut digitalikkut qinnuteqaat ugguuna http://www.nunagis.gl.
- Nunaminertamik atugassiinissamut qinnuteqaatip immersuiffissaa nalinginnaasoq atorsinnaavat.
Immersugassap pdf-imut link uaniippoq qinnuteqaat_immersugassaq.pdf
Qinnuteqaatit atsiorukku aatsaat atuussinnaavoq. Taamaammat qarasaasiakkoortumik atsiortarnerup atuutilernissaata tungaanut qinnuteqaat printerikkut aniseriarlugu suli atsiortussaatitaavat. Qinnuteqaat najukkanni innuttaasunik sullissivimmut imaluunniit nunaqarfiup allaffianut nassiutissavat tunniulluguluunniit.
Imaluunniit najukkanni Innuttaasunut Sullissivimmut nunaqarfinniluunniit kommunip allaffianut attaveqarsinnaavutit tassuunalu ilitsersuutsillutit.
Nunaminertamik qinnuteqaatit suliarineranut akitsuutinik akileeqqusisoqassaaq, Pilersaarusiorneq aamma nunaminertat atorneqartarnerat pillugit Inatsisartut inatsisissaat nr. 17, 17. november 2010-imeersumi § 54 naapertorlugu, kommunip akigititaanut tamanut saqqummiunneqartut naapertorlugit.