Pingaarnertut iluseq
2020-mi januaarimi Kapisilinni aalajangersimasumik najugallit 52-iupput. Nunaqarfik ukiut ingerlanerini 2008-mi 78-inik inoqarsimagaluarluni malunnartumik inukilliartorsimavoq. Inuisa akornanni meeqqat aamma inuusuttut inuussutissarsiuteqarsinnaasut ikittuinnaapput. Nunaqarfimmi taamaalilluni ilaqutariit inuusuttut ikittuinnaapput utoqqaallu amerlallutik.
Inissiaqarfiit
Nunaqarfimmi najugaqavissut nutserput – annerusumik Nuummut – inissiallu sunngiffimmi illunngortinneqartarput. Nunaqarfiup inuttussutsimigut ineriartornera tunngavigalugu kommunalbestyrelsimit nalilerneqarpoq Kapisilinni nunaminertanik nutaanik inissianut siunertalinnut atugassiisoqarnissaa pisariaqanngitsoq.
Inuussutissarsiuteqarfiit
Nunaqarfiup Kapisillit takornarissanit ornigarneqartartussatut nunaqarfittullu mingutsitsinngitsutut piujuaannartitsisutullu ineriartortinneqarnissaa kissaatigineqarpoq.
Pilersaarutigineqarpoq nunaqarfimmi uumasunik toqoraaviliortoqassasoq, savaateqarfimmit Neriunaq-imit pilersorneqartartussamik.
Piffissaq ungasinnerusoq isigalugu nunaqarfik takornarissanit Nuummeersunit nunanillu assigiinngitsuneersunit ornigarneqartalissaaq. Kapisileqarnini kiisalu Sermilimmut qanittumiinnini ilisarnaatigissavai.
Angallanneq, teknikkikkut avatangiisitigullu pissutsit
Angallammik Nuummiit sap. akunneranut ataasiarluni nunaqarfimmukartoqartarpoq, apriilimiit januaari tikillugu.
Angallassisartut namminersortut Nuup Kapisillillu akornanni sap. akunneranut arlaleriarlutik 2019-imi aalajangersimasumik angallassisalerput, tamatumanngalu takornarissanik angallassisoqarnerusinnaanera takutinneqarpoq.
Angallassinissamut periarfissat pitsanngorsarniarlugit heliportissaasinnaasumut nunaminertamik immikkoortitsisoqarpoq, taamaattorli heliportiliornissaq maannakkorpiaq pilersaarutigineqanngilaq.
Aamma Kapisillit Neriunallu akornanni ATV-nut illiniliornissaq pilersaarutigineqarpoq. Nuup Kapisillillu akornanni ATV-nut illiniliorluni nunakkut attaveqaasersinnaaneq misissorneqassaaq.
Allanngutsaaliugassatut soqutigisat
Kapisilinni illut amerlanerit ilaqutariinnut ataatsinut illuliaapput. Allanngutsaaliugassatut soqutigisat isumannaarniarlugit aalajangersaasoqarsimavoq illut eriagisassat ingutserneqartassanngitsut aamma illut titartarneqaqqaarnerat sannaallu qajassuunneqartassasut.
Illoqannginnersat sukisaarsarfiillu
Kapisilinniit 1 km miss. kangisinnerusumiippoq illuaraqarfik Nuussuaq.
Kapisillit nunaqarfittut mingutsitsiffiunngitsutut piujuaannartitsisutullu ilaatigullu Sermilimmut pisuffissanik nalunaaqutsersukkanik neqerooruteqarsinnaasutut ataatsimoortumik pilersaarusiuunneqarnissaa piffissami pilersaarusiorfiusumi pingaartinneqassaaq.
Aamma Nuup Kapisillillu akornanni qamuteralannut aqqusiornissaq isummerfigineqassaaq, aqqusiugarlu taanna pisuttunut aqqutaasinnaajutigaluni aqqutaani oqquiffissalersugaassaaq.
