Kommunip immikkoortuata kitaani kujammut sineriaani Paamiut Arsuullu kangerlua (Arsuk, Ivittuut aamma Kangilinnguit) ataatsimoortinneqarput. 2020-mi Paamiuni innuttaasut 1.300-pput, Arsuk 73-inik, Ivittuut inuerunnikuuvoq, taavalu Kangilinnguit Issittumi Sakkutooqarfimmit umiarsualivittut atorneqarpoq. Arsuk Paamiuniit kujammut 115 kilometerisut ungasitsigisumiippoq taavalu Ivittuut Kangilinnguillu Arsuup Kangerluaniipput, Arsummiit 15-20 kilometerisut ungasitsigisumi.
Paamiut aamma Arsuk inuttussutsimikkut appariaateqarput, annerusumik kujammut aappaattullu Nuummut avannamullu nuuttunik pissuteqartumik, tamannalu nunap immikkoortuani Nuuk apeqqutaatinnagu assigiinngitsunut nutserneemik paasineqarsinnaavoq. Nunap immikkoortua ataatsimut isigalugu kommunitaami kinaassutsip nassaareqqinnissaa pisariaqarpoq.
Nunap immikkoortuani tamaani inoqarfiit immikkoortuni marluusuni allaaserineqarput – Paamiut aamma Arsuk, Arsuup Kangerlua, Ivittuut Kangilinnguillu ilanngullugit.
Patajaallisaaneq periarfissallu nutaat
Paamiut innuttaasut amerlassusaat attatiinnarnissaanut unammilligassaqarpoq, tamannalu ingerlariaqqinnissamut pilersaarusiornermi ilanngunneqassaaq. Innuttaasut amerlassusii fiiassikkut qiteqqunneranni qaffasinnerpaaffimmeeriarlutik kingorna appariartuinnarsimapput. Ataatsimut isigalugu kinaassuseq, tulluusimaarutissaqarneq, patajaassutsip aalaakkaasuunerullu nassaareqqinnissaanut unamminartut. Illoqarfimmik piujuartitsineq eqqarsaatigalugu ineriartortitsinissamut periusissaq unammilligassanik taakkuninnga tunngaveqarpoq.
Periusissami uku ataatsimoortillugit qitiutinneqassapput:
- Patajaallisaaneq – annerusumik illoqarfiup ilaani iluarsaanikkut uummarissaanikkullu, inissiat inuttussutsimut naapertuuttuutikkumallugit
- Pitsaassutaareersunik nukittorsaaneq – kulturikkut kingornussat, immikkoortunillu allanngutsaaliuineq sukisaarsarfeqarnerlu qitiutillugit
- Periarfissanut nutaanut upalungaarsimaneq – umiarsualivimmi inuussutissarsiutinut periarfissanik nutaanik pilersaarusiornikkut, angallannermut tunngasut ilanngullugit
Arsuk, Arsuup Kangerlua Kangilinnguillu ilanngullugit, allanngoriartorput, nalunarporlu siunissami sakkutooqarfik nuunneqaqqissanersoq. Kangerlummi ineriartortitsinissamut periarfissaq pingaarneq tassaavoq takornariaqarneq, tassani Arsuk aallaavigalugu kangerluppassuit takornarianit ornigarneqartartussatut eqqarsaatigineqarpoq.
