L: Nunaminertat sukisaarsartarfittut immikkut isikkullit

Immikkoortut ilaa L-it nunaminertani immikkut sukisaarsartarfittut isikkoqartuni sunngiffimmi sammisassaqartitsinermut siunertanut, sanaartukkanut atortulersuutinullu atugassiissutigineqarput. Tamakku assersuutigalugu tassaasinnaapput sisorarnermi atortulersuutit, takornarianut illuaqqat ataatsimoortut, atuartut tammaarsimaartarfii, akunnittarfiit, pisuttuat aqqutaat aamma timersornermi sunngiffimmilu sammisassaqartitsiviit allat.

Namminersorluni mikinerusumik inuussutissarsiuteqarnerni atorneqarsinnaasunik soorlu assersuutigalugit panertitsivinnik, pujoorivinnik, naatsiivinnik assigisaannillu tamakku nammineq atugassaatillugit atortulersuisoqarsinnaavoq. Atortulersuutit tamakku illuaqqanut ataasiakkaanut atatillugit sanaartorneqassapput.

Immikkoortut ilaanni killilimmik assigiinngitsunik inuussutissarsiuteqarfiliortoqarsinnaavoq, tamakku immikkoortup ilaat immikkut sukisaarsartarfittut isikkoqarnera pingaarneq allanngortinngippassuk. Tassunga tunngatillugu killilimmik sunngiffimmi illuaqqanik, illunik aasarsiortarfinnik aniguiniarfissanillu nammineq atugassanik sanasoqarsinnaavoq – immikkoortut ilaanni K-ni malittarisassat assigalugit. Aammattaaq ataatsimoorussanik teknikkikkut pilersuutinik ivertitsisoqarsinnaallunilu imminnut qanittunik illuliortoqarsinnaavoq, tamakku immikkoortut ilaanni ilutsinit ”illoqarfinganerusunngortitsisinnaasunik”.

Illuaqqat imminnut minnerpaamik 30 meterisut sanaartukkanulluunniit allanut ungasitsigitillugit sananeqassapput. Immikkoortut ilaannut ataasiakkaanut sukumiisunik aalajangersagaliornerni imminnut qaninnerpaaffissat annertunerusut kommunalbestyrelsimit aalajangersarneqarsinnaapput. Sanaartukkat atortulersuutillu tamarmik ingerlaavartumik aserfallatsaaliorneqartassapput, taamaalillutik avatangiisinut takussunarsaataanatik.

Nunaminertat immikkut sukisaarsartarfiusut puttasulerneqarsinnaapput. Sukisaarsarnernut siunertanut illunullu atasunik aqqusinniortoqarsinnaavoq, aqqusiortoqarsinnaavoq, aqqusineeraliortoqarsinnaavoq. Innaallagissamut imermullu teknikkikkut pilersuutinik ivertitsisoqarsinnaallunilu najukkami pilersuinernut immikkoortut ilaannut ataasiakkaanut kuuffissualersuisoqarsinnaavoq. Naalakkersuisut aatsaat akuersiteqqaarlugit imermik milluaatinik aamma imikumik kuutsitsivinnik kiisalu nukissiuutinik annertunerusunik pilersitsisoqarsinnaavoq. Taakku saniatigut teknikkikkut pilersuutit sananeqarsinnaapput, assersuutigalugu generatorit seqernullu kissaanik innaallagissiuutit nukissiuutillu allat illuaqqanut ataasiakkaanut atorneqartussatut atatinneqartut.

Atortulersuutit assigiinngitsut sukisaarsarnernut siunertaqartunut siunertaqarfigineqartut immikkoortup ilaani atortulersuutinut toqqaannartumik attuumassutillit atorneqarnerminni putsumik, nipimik, tipimik, sajuppillattarnernik allatulluunniit akornusersuutaasinnaasut sanaartorneqassanngillat.

Sumiiffinni L-ini illuaqqat assigiinngitsut sisamanut immikkoortinneqarput: Sunngiffimmi illuaqqat/aasarsiortarfiit, takornarianut/akunnittarfiit illuaraataat, lejrskolertarfiit, piniartut illuaraat/ annanniarluni oqquiffiit:

Aasarsiortarfiit sunngiffimmilu illuaqqat nammineq atugassatut isigineqarput. Aasarsiortarfiit etageamut annertussusaa annerpaamik 40 m²-iussapput. Sanaartorneq pillugu inatsit atuuttoq naapertorlugu aasarsiortarfimmik illuaraliornissaq sanaartornissamut akuersissummik peqartoqaqqaassaaq.
Inuinnaat illuaraataat A-nr-nik silataani allagartaqassapput.

Takornarianut illuaqqat/hotelinut tunngatillugu illuaqqat inuussutissarsiutitut atorneqarsinnaasut imaluunniit attartortinneqarsinnaasut siunnersuutigineqarpoq. Attartortitsisarneq takornarianuusinnaallunilu innuttaasunuusinnaavoq. Takornarianut illuaqqat pineqarpata sanaartorneq pillugu inatsit naapertorlugu CVR-normoqarnissaq tassungaluunniit assingusumik nassuiaammik aamma sanaartornermut inatsimmut atuuttumut naapertuuttumik sanaartorsinnaanermut akuersissuteqarnissaq pisariaqarput. Takornarianut aamma attartortittakkanut illuaqqat silataani B-nr-qassapput.

Atuartut tammaarsimaartarfii sanaartukkatut, assersuutigalugu meeqqat atuarfiannit, fritidsklubbinit pisortalluunniit suliffeqarfiutaannit atorneqartartutut, paasineqassapput. Asiartarfiliornissamut sanaartorneq pillugu inatsisit atuuttut naapertorlugit sanaartornissamut akuersissuteqarnissaq pisariaqarpoq.

Illuaqqat piniariartarfiit aniguiniarnissamullu illuaqqat illuaqqatut tamanit tikinneqarsinnaasutut paasineqassapput. Illuaqqat tamakku amerlanertigut kommunimit suliniaqatigiiffinnilluunniit sananeqartarput. Illuaqqat piniariartarfiit aniguiniartarfiillu angissusissaat pillugit malittarisassaqanngilaq kisiannili tamakkuninnga sanaartorniaraanni Illuliorneq pillugu malittarisassat atuuttut naapertorlugit sanaartornissamut akuersissutaateqartoqartariaqarpoq.
Illuaqqanut assigiinngitsunut tunngatillugu tullinnguuttut makku atuupput:

Illuaqqanut tamanut tunngatillugu, nunaminertamik atuinissamut agguaassisarnermut malittarisassat sanaartornermilu inatsit atuuttoq ilaapput.