Aqqusineeqqat ilusaat

Nuummi pisuinnarnut sikkilertunullu atukkat pitsanngorsarnissaat kommunalbestyrelsimut anguniagaavoq pingaartinneqarluartoq, illoqarfillumi pisuinnarnut sikkilertunullu aqqusineeraqarpoq inerisarluarsimasunik ingerlalluartunillu.

Piffissami pilersaarusiorfiusussami Nuummi aqqusineeqqat pisuinnarfiusut sikkilertarfiusullu pitsanngorsarneqarnissaat sulissutigineqassaaq. Nuummi aqqusineeqqat pisuinnarfiusut sikkilertarfiusullu ataqatigiinnissaasa qulakkeerneqarnissaat aallunneqassaaq, aqqusineeqqat pioreersut siunertaqartumik ataqatigiissinneqarnissaat anguniarnerisigut.

Nuummi aqqusineeqqanik pisuinnarfiusunik sikkilertarfiusunillu ataqatigiissunik pilersitsinissamut uiggiullugu illoqarfiup qeqqani eqqaanilu aqqusineeqqat pisuinnarfiusut sikkilertarfiusullu pioreersut pitsanngorsarneqarnissaat sulissutigineqassaaq. Imanerup aqqusinertut pisuinnarfiusutut atuunnera pitsanngorsarneqassaaq, taamallu H.J. Rinksvej aamma Aqqusinersuaq sinerlugu illoqarfiup pisuinnartuinut sikkilertuinullu pissutsit pitsanngorsarneqassallutik.

Sissaq atuarlugu ingerlasumik aqqusineeraliornermi ilaatigut sukisaarsarfissatut neqeroorutigineqarpoq ilaatigullu biilertuunngitsunut atassuteqaatersuutinut pingaarutilinnut ilaalluni. Aqqusineeraq sissaq atuarlugu ingerlassaaq taamaalillunilu Nuup sineriaa assigiinngissitaaqisoq takusassarsiorfigineqarsinnaassaaq.