Kommunimut pilersaarummi ilutsimi pingaarnermi Kommuneqarfik Sermersuumi pilersaarusiornermi naatsorsuutigisat allaaserineqarput.
Tamakkununnga kommunimi piorsaaneq aamma tunaartaqarluni iliuusissanik pilersaarusiornerit siunissamullu ungasinnerusumut eqqarsaatersuutit kommunimut pilersaarummut tunngaviusut ilaatinneqarput.
- Takorluugaq kommunimi pilersaarusiornermi pingaarnertut sammiviliisoq.
- Killiffik pillugu allaaserisaq aamma kommunimi sumiiffiit assigiinngitsut qulaajaaffigineqarnerat.
- Qitiutinneqartut sumiiffiit apeqqutaatinnagit kommunimi pilersaarusiornermut tunngaviusut aamma - ajornanngiffiini attuumassuteqarfiinilu - inoqarfinnut ataasiakkaanut ilutsip pingaarnerup ilai ilanngunneqarput
Takorluugaq
Kommuneqarfik Sermersuumi illoqarfiit tamarmik tulluartumik, sumiiffiit assigiinngissusiat ataqqillugit assigiimmillu ineriartortinneqassapput. Illoqarfinnik inoqarfinnillu ineriartortitsineq, sumiiffiit ataasiakkaat namminneq periarfissaannik pisariaqartitaannillu tunngaveqartinneqassapput. Illoqarfiit inoqarfiillu misigisassanik, toqqissisimanarnernik, illut illoqarfimmilu illussanik titartakkat kusanartut kiisalu inissiaqarfiit ingerlalluartut neqeroorutigineqassapput.
Takorluukkamik tamatuminnga piviusunngortitsinerit naleqartitat pingasut allanngortinneqarsinnaanngitsullu ataqqillugit pissaaq, tamakku kommunimi siunissami sulinissanut tunngaviusut. Naleqartitat pingasuusut taakku tassaapput:
- Piujuartitsineq
- Inuunerup pitsaassusia
- Tamat oqartussaaqataanerat sullissinerlu
Kommunimut tamarmut aamma inoqarfinnut ataasiakkaanut ilutsit pingaarnerit kommunimi pilersaarusiornerni takorluugaapput pingaarnerit. Iluseq pingaarneq ataatsimut isigalugu aqutsinermut sakkussaavoq, taannalu iluaqutigalugu takorluukkamik pingaarnermik piviusunngortinneqarsinnaasut pillugit aalajangiiffiusinnaasut.
Ilutsimi pingaarnermi kommunimi tamarmi sumiiffiit tamarmik ilaatinneqarput.
Ilutsit pingaarnerit ineriartortitsinermut nunaminertanillu atuinerit pillugit anguniakkanut assingupput aamma soqutigisanik oqimaaqatigiissitsinermut kommunalbestyrelsip suliarisimasai takussutaapput. Kommunip pilersaarutaata imarisaanut sukumiisumik tamakkiisumik ataatsimoortumik takussutissiivoq - tassunga ilanngullugu aalajangersakkani pingaarnerni killiliinerit.
Sumiiffiit
Kommunimut pilersaarummut tunngatillugu sumiffiit ilutsitut tassa illoqarfittut nunaqarfittullu sumiiffinni ersarissumik takutitsisut aamma / imaluunniit ataatsimoorfinnik atorneqarsinnaasutut isigineqassapput. Sumiiffiit kommunimut pilersaarusiornermi naleqquttumik annertussuseqassapput taamaalillutillu tullinnguuttuni pingaarnertut paasinninnermut pilersaarusiornermullu killissaannut tunngaviussallutik. Pilersaarusiornermut inatsimmi § 16 naapertorlugu kommunimi nunasseriaatsimi ineriartornermik pingaarnermik tunngaveqartillugit toqqarneqarput.
Sumiiffiit pingasut tassaapput:
- Nuup eqqaa
- Tasiilap eqqaa aamma Illoqqortoormiit
- Paamiut eqqaa
