Arsuk Arsuup kangerluata paavani Paamiuniit 115 km-it missiliorlugit kujasitsigisumi inissisimavoq. Nunaqarfik amitsumi manissumilu sinerissap kujammut sammisuani inissisimavoq. Kuunnaat nunaqarfiup ungataani avannamut aamma avannamut kimmut sammilluni ippoq, nunaqarfiullu kangiani imeqarfeqarluni.
Pingaarnertut iluseq
Inissiaqarfiit
2020-mi 73-nik inoqarpoq ukiorlu 2000-imiit 124-inik inukilliariarluni. Ikileriaatigineqartut arfineq-marlunniit qummut ikioqarput. Nunaqarfimmi illut 115-it missaanniipput, taakkunannga arlallit inigineqanngillat. Taamaattumik piffissami allilerisoqarnissaa pisariaqanngitsoq nalilerneqarpoq.
Immikkoortut ataatsimoorussat
Nunaqarfiup qeqqa siunertanut ataatsimoorussassanut immikkoortitaavoq, ilaatigut tamaaniillutik illu sullivik, nunaqarfiup atuarfia aammalu klubbi, sunngiffimmilu sammisassaqartitsivik.
Inuussutissarsiuteqarfiit
Inuussutissarsiuteqarfiusut sineriak sinerlugu inissisimapput tamaaniillutillu fabrikki tunitsivik, umiatsianut sannaviit arlallit kiisalu kommunip sanaartornermut suliffeqarfia.
Nunaqarfimmi ineriartortitsinissamut periarfissaq tassaavoq nunaminertaq nerukitsoq kangiatungaaniittoq. Nunaminertat atugassiissutigineqartut nunaqarfiup umiarsualiviata, inuussutissarsiorfiisa ataatsimoorussallu allilerneqarsinnaanerinut atugassiissutigineqarput. Ataatsimut isigalugit nunaqarfimmi ineriartorfissatut periarfissat naammattutut nalilerneqarpoq, assersuutigalugu immikkoortup takornariaqarnerup iluani ineriartortikkumaneqarneranik anguniakkat eqqarsaatigalugit
Nunaminertat ataatsimoorussat sanaartorfiunngitsut aamma iliveqarfiit
Nunaminertat ataatsimoorussat tassaapput nunaqarfiup avannamut kangiani nunaminertat sukisaarsarfiusut sanaartorfiunngitsullu, tamaani timersornermut nunaminertaqarpoq timersortarfiliortoqarsinnaanera periarfissaalluni. Iliveqarfik nunaqarfiup avannamut kangiani inissisimavoq nunaminertami ataatsimoorussaqarfiusumi sanaartorfiunngitsumilu taamaalillunilu allilerneqarsinnaanera periarfissaqarluni.
Angallannermut, teknikkimut avatangiisimullu tunngasut
Heliport nunaqarfiup 1,5 kilometerit missaannik kangimut ungasitsigisumi inissisimavoq. Tassunga Arsuup heliportillu akornanni aqqusinniornissamut periarfissiisoqassaaq.
