Immikkoortut ilaat teknikkikkut atortulersuutinut, attaveqaatinut il.il. atugassiissutigineqartut assersuutigalugu imermik nukissiorfittut aamma pilersuinertut tunisassiornertulluunniit il.il. ilisarnaateqakkajupput. Allatut oqaatigalugu namminersorluni inuussutissarsiutit pisuussutinit uumassusilinnit tunngaveqanngitsut. Immikkoortut ilaanni asimi attaveqaateqarsinnaavoq annertunerusunik.
Immikkoortut ilaat N-t imatut agguataagaapput:
- N1: Teknikkikkut atortulersuutit
- N2: Attaveqaatit
Immikkoortut ilaanni teknikkikkut atortulersuutinut, attaveqaatinut il.il. pisariaqartinneqarsinnaammata tamakku puttasuliorfigineqarsinnaapput allatulluunniit umiarsualiviliortoqarsinnaallunilu qulimiguulinnut mittarfiliortoqarsinnaavoq. Immikkoortut ilaannut tamakkununnga attuumassuteqartunik atortulersuutinik ikkussuisoqarsinnaallunilu illuliortoqarsinnaavoq. Teknikkikkut aamma pilersuutinik allanik soorlu imermut, innaallagissamut telemullu attaveqaasersortoqarsinnaallunilu immikkoortup ilaata pilersorneqarnissaanut kuuffissualersortoqarsinnaavoq. Imermik milluaassutinut imikumillu kuutsitsinissamut atortulersuusiorneq Naalakkersuisunit aatsaat akuersissummik pisoqareerpat pissapput.
N1: Teknikkikkut atortulersuutit
Immikkoortut ilaat N1-it teknikkikkut atortulersuutinut erngullu nukinganik nukissiorfinnut anginerusunut atugassiissutigineqartut soorlu tatsit imeqarfiit, sioqqanik issumillu piiaaffiit il.il. atugassiissutaapput. Immikkoortut ilaanni suliffeqarfinnut atortulersuuteqarfinnullu ataasiakkaanut atasunik ukioq naallugu najugaqarfissanik inissialiortoqarsinnaavoq, stationeqarfiliortoqarsinnaavoq, tammaarsimaffiliortoqarsinnaavoq assigisaannilluunniit sanasoqarsinnaavoq. Suliffeqarfinni tamakkunani najukkami attaveqaatit teknikkikkullu pilersuutit pinngitsoorneqarsinnaanngillat. Erngup nukinganik nukissiorfik pissusisassamisoortumik najukkami pilersuutissamik innaallagissiorsinnaavoq. Immikkoortut ilaanni tamakkunani sunngiffimmi illuliortoqarsinnaananilu aasarsiortarfinnik illuliortoqarsinnaanngilaq. Erngup nukinganik nukissiorfimmut imeqarfiup timaani ataasiakkaanik piniariartarfinnik aniguiniartarfissanillu illuaqqiortoqarsinnaavoq, tamakku teknikkikkut atortulersuutinut qanippallaanngippata.
N2: Attaveqaatit
Immikkoortut ilaat N2-t asimi qamutinik angallassissutinik angallannissamut aqqutinut ingerlaarfissanullu atugassiissutigineqarput. Qamutit angallassisutit imatut paasineqassapput; qamutit qitequtaasartalinnik assakaasullit assakasuinnallilluunniit sikukkoorutaasinnaasut, aputikkoorutaasinnaasut, qaqqakkoorutaasinnaasut allatulluunniit nunakkoorutaasinnaasut.
Qamutinut angallassissutinut aqqusiat aqqutissiallu inuussutissarsiutit suunersut sukumiinerusumik aalajangersarneqartut qanoq ittuunersut apeqqutaatillugit, tamakku kommunimut ileqqoreqqusani aalajangersarneqartarput, namminersorluni inuussutissarsiuteqarnernut killeqartinneqarlutik atugassiissutigineqarput.