Illup angissusissaa, tassunga ilanngullugit ilaatigut illup portussusissaa illullu quleriivisa amerlassusissaat, kommunimut pilersaarummut tapiliussami aalajangersarneqarsinnaapput. Illup portussusissavia imatut naatsorsorneqassaaq:
- Sukarsuit toqqaviillu
- Quleriit portussusiat
- Qaliata isikkussaa toqqaviata isikkussaa
- Nunap qanoq ittuunera
Sukarsuit toqqaviillu init allerpaat nunamut tunngasuunnginnissaat qulakkiissavaat, kisiannili pisariaqanngitsumik nunamit portuallaartumiissanngillat. Nunaqarfinni illut toqqavii illoqarfinni toqqavinnit portunerusinnaapput nunaqarfinni aputaajaasarneq ajornakusoornerusarmat.
Illuliornermut malittarisassat naapertorlugit quleriit portussusissaat minnerpaamik 2,5 m.-iussaaq, naqqup qaavaniit qaliata alliup tungaanut uuttorlugu. Nalinginnaasumik quleriit 3 m. missaanniissinnaapput, quleriit akunnerat naqqullu qalliutaa ilanngullugit naatsorsorlugit.
Qaliata isikkua pissusissamisoortumik qaliata initaata atorneqarnissaanik akerlianillu aqunneqassaaq; qalia sivingasoq toqqaviatalu isikkua nalinginnaasumik inigineqarsinnaasarput, taavalu qalia ataasiinnarmik sivingasuujuppat nalinginnaasumik inigineqarsinnaaneq ajorluni. Qaliat isikkui toqqavia 1 m. (natianiit toqqaviata qaavanut) sinnerlugu portutigisoq, nalinginnaasumik quleriittut immikkoortutut isigineqartarput. Qaliata takissusia tamakkerlugu 1/3-ia sinnerlugu aniinganernik sanasoqarpat, taava qalia tamakkerluni quleriittut isigineqassaaq.
Illut sivingasumi maniilakuluttumilu sanaat, imaattunik qulakkeerinniffiussapput:
- immikkoortup pissusiviata allanngortinnginnissaa
- immikkoortumi sanaartukkat tamarmik naleqquttumik
- inissisimatinneqarnissaat eqqarsaatigineqassasoq
- illut portussusissaat quleriillu amerlassusissaat pillugit kommunalbestyrelsip aalajangersagai naapertuuttut eqqumaffigineqassasut
Sanaartukkanut immikkuullarissunut qulaani immikkoortut imaluunniit immikkoortut ilaannut tamakkiisunut tunngatillugu qulakkeerneqarnissaannut kommunalbestyrelsip atortussai tassaapput najoqqutassamik arlalinnilluunniit oqaasertaliinissaq, annertussutsimik pilersaarutinik taasartagaannik, sanaartorfissami/immikkoortup ilaani nunaminertami pioreersumi nalilersuinerup kingornagut aalajangersarneqartussanik, aammalu nunaminertaq avatangiiserisaq eqqarsaatigalugu.
