Sineriak sinerlugu aqqusineeraq sineriak sinerlugu ingerlavoq taamaalilluni Nuup sineriaa assigiinngiaartoq, imap allanngorarnera aamma akimut isigaluni Nuup nunatai isiginnaarlugit misigisaqartoqarsinnaalluni. Siunertarineqarpoq Nuummi innuttaasut aamma tikeraat sineriak sinerlugu pisullutik ingerlasinnaanissaa illuliorfigeqqusaanngitsut aqqusaaqattaarlugit.
Taamaattorli sineriak sinerlugu aqqut allatut ajornartumik immikkoortut ilaanni kipisassaaq, sinerissamut qanittumi sanaartukkat imaluunniit umiarsualiveqarfiit matuneqarsimasut tamanna ajornartittassammassuk. Allani maannakkut nunap qanoq issusiata tamanna ajornartikkaangagu pilersaarutaavoq pisuinnarnut ikaartarfioliornissat imaluunniit nunagissaanissat tamaana ingerlanissaq ajornarunnaartinniarlugu. Sineriak sinerlugu aqqusineeraq sunngiffimmi sammisassanut aamma takornariarnissamut annertuumik periarfissiissaaq.
Aqqusineeraq immikkoortutut arlalittut suliarineqassaaq, imaluunniit pisariaqartitsinerup pileriartornera tunngavigalugu.
