Inuussutissarsiuteqarfittut umiarsualiveqarfissatulluunniit siunertaqarfigineqartunut imaluunniit nunaminertanut kommunimut pilersaarummi umiatsianik inaalitsivittut atugassiissutigineqartunut ukiuunerani umiatsianik inaalisimatitsisoqarsinnaavoq. Umiatsiat ukiuunerani ilaqutariinnut ataatsinut illut eqqaannut inissinneqarnissaat akuerineqarsinnaapput, umiatsiamik illumillu piginnittoq ataasiinnaappat aamma umiatsiaq ataasiinnaassaaq. Piginneqatigiilluni inissiaatileqatigiit inissialluunniit attartortittakkat eqqaannut, inissiaatileqatigiiffimmit / piginnittumit akuersissut pigineqarpat, aamma suliffeqarfiup piginnittua umiatsiamillu piginnittoq attuumassuteqarpata, inissiinissaq akuerineqarsinnaavoq.
Umiatsianik inissiinissaq, nunaminertanik atugassiinerni ikittuinnarnik ilanngussinngitsuuinerit eqqaassanngikkaanni, piffissami aalajangersimasumi taamaallaat pisinnaavoq.
Angallatit pillugit maleruaqqusat
Angallammik illup eqqaani inissiinermi isumannaallisaanissaq pissutigalugu ungasissusissanut piumasaqaatit tulliuttut atuupput:
- Angallat annerpaamik 20 fodinik takissusilik illup eqqaani qajannaarnagu inissinneqarsinnaavoq imaappat; isumannaallisaaneq eqqarsaatigalugu illumit annanniarluni aniffissat aamma immaqa ajunaalernermi aniffissat angallammit asserneqarsimanngippata.
- Angallat 20 fodit sinnerlugit taamaattoq annerpaamik 26 fodinik angissusilik illumit 2,0 meterinik ungasissuseqassaaq.
- Qulaani pineqartut naapertorlugit angallat illup sanianut inissinneqartoq illumut sanilerisamut minnerpaamik 2,5 meterinik ungasissusilerlugu inissinneqassaaq. Taamaattumik illumut sanilerisamut ungasissusissaq minnerpaamik 2,5 meterit + illup sanilerisap ungasissusissaattut killissarititat Kalaallit Nunaanni Sanaartornermi maleruaqqusani kapitalit 3.2.2 aamma 3.2.3.
