Teknikkikkut pilersuutit

Sanaartukkat nutaat pisortat innaallagissamut, ungasianit kiassaanerannut, imermik pilersuinerannut kuuffissuaataannullu, tamakku aqqusiorneqarsimappata sanaartornissaannullu periarfissaqarpat, attavilerneqassapput.

Pisuni pisortat kuuffissuaataannik attaviliiffiusinnaanngitsuni imikumut katersuivissanik tankiliornissat imaluunniit avatangiisit pillugit aalajangersakkat aamma imikumik suujunnaarsitsisarneq pillugu malittarisassat atuuttut naapertorlugit kommunalbestyrelsimit piumasaqaateqartoqarsinnaavoq.
Imikup nunamut kuutsinneqartup illunut eqqaamiorisanut imaluunniit aqqusinernut aqqusineeqqanullu tamanit angallaffigineqarsinnaasunut akornutaajunnaarsillugu illuutilimmit kuutsinneqartussaatitaavoq. Anartarfiit annittakkat imaat kuuffissuit ataasiakkaat peqqissutsimut oqartussaasunit akuerineqarsimappata aamma avatangiisit pillugit akuersissummik pissarsisoqarsimappat aatsaat kuutsinneqarsinnaapput. Anartarfiit annittakkat imaannik nunamut umiarsualivimmulluunniit kueraaneq inerteqqutaavoq, taamaallaat anartarfiit annittakkat imaannik imaarsivikkut tamakku kuutsinneqarsinnaapput.
Uuliamik, benzinamik aamma kemikalianik nunamut, kuuffinnut kussianulluunniit kuutsitsinissat inerteqqutaapput.

Nunap qaavata imertaa, tassunga ilanngullugit qaliat qaavisa imertaat, pisortat kuuffissuaataannut kuutsinneqassanngillat kisiannili sanaartukkanut, aqqusinernut, aqqusineeqqanut nunaminertanullu sanaartorfigineqanngitsunut akornutaanngitsumik kuutsinneqassallutik.

Ajornanngiffiini erngup innaallagissallu aqqutaat aamma kuuffissuit nunap iluatigoortinneqartassapput. Ledningit qaanni nunaminertat sanaartorfigineqanngillat, pissutsit immikkut ittut tamanna ajornartinngikkaat eqqaassanngikkaanni.

Ledningit aqqusinikkoortinneqarpata aqqusineeqqakkoortineqarpataluunniit sumiiffikkut isumannaatsumik angalasoqarsinnaasunngorlugu naleqquttunik aqqusialiortoqassaaq, tummeqqiortoqassaaq, pisuffilialiortoqassaaq assigisaannillu sanasoqarluni. Tamanna malinneqanngippat ledninginik piginnittup ledningit allanngortiterneqarnissaat piumasarisinnaavaa. Ledninginik allannguisoqassappat tamanna ledninginik piginnittumut aningaasartuutaassanngilaq aamma taamaaliornissamut ledninginik piginnittup malittarisassaatai malinneqassapput.

Illoqarfiup ilaanik nutaanik sukumiisumik pilersaarusiornerni sapinngisaq tamaat innaallagissap, erngup imikullu aqqutissaannik il.il. sapinngisamik aalajangersaaniartoqassaaq.