Pilersaarusiornermi periusissaq 2023
Pilersaarusiornermi periusissiaq 2023 tassaavoq kommunip sisamassaanik pilersaarusiornermut periusissiaa. Tassaavorlu kommunip illunik, aqqusinernik allanillu attaveqaasersuutinik pilersaarusiornermini atortagaa. Sumi, qaqugu aamma qanoq illoqarfitta inuuffigiuminartuutillugu sanaartorfigineqarnissaanut tunngasoq.
Pilersaarusiornermut periusissiaq 2023 Kommunalbestyrelsip akuersissutigaa kommunimut pilersaarutip ilaa nutarterneqassasoq aalajangerlugu.
Suliassaqarfittut pingaartinneqartuni ataasiakkaani politikkikkut anguniakkat aamma suliniutit ilanngunneqarsimassapput. Suliniutigineqartut uuttorneqarsinnaassapput, siunissami aalajangiiffigisassani politikkikkut allaffissornikkullu pitsaanerusumik tunngavissaqarnissamut tapertaasinnaaqqullugit.
- Toqqissisimalersitsisarpugut
- Siuariartornermik pilersitsisuuvugut
- Mingutsitsinnginnerusumik ataatsimoorussineq
Pilersaarusiornermi periusissaq 2023
Pilersaarummut periusissiaq P18
”Pilersaarusiornermi periusissaq P18 tassaavoq kommunalbestyrelsip issiasup kommunitut kommunip siunissami sumut ingerlanissaa pillugu kissaataanik imalik. Taanna sulinitsinni tamatta sakkussaraarput pingaarutilik aammalu kommunimi atugassatigut aamma aningaasaqarnermik pilersaarusiornermut tunngavissaanullu tunaartalersuutitut atortussaallugu. Tassa tassani kommunimi atugassat nammineq qanorluunniit ilusilersorsinnaavagut, kikkut tamat sapinngisamik iluaqutissaat eqqarsaatigalugit.” Siulequt P18
Kommunalbestyrelsip kommunip pilersaarusiorfiginerata ilaatigut nutarterneqarnissaanik aalajangiineq ilanngullugu Pilersaarummut periusissiaq P18 aalajangiiffiginikuuaa. Kommunip pilersaarusiorfiginerani periusissiat ineriartortitsinermilu anguniakkat aalajangiusimaneqassapput, sammisaqarfiilli nutaat ilanngunneqassapput, sumiiffinni assigiinngitsuni kommunimilu tamarmi.
Kommunimut pingaarnertut naleqartitat siusinnerusukkut pilersaarummut periusissaliameersutut allanngortinneqassanngillat. Tassaasut:
- Piujuartitsineq
- Inuuniarnermi naleqartitat
- Kikkut tamat oqartussaaqataanerat aamma sullissineq
Pilersaarummut periusissiaq P18
Immikkoortunut pilersaarutit
Suliaqarfiit akornanni suliniutit immikkut isiginiarneqarput, immikkoortunut pilersaarummi sakkut ukiunut aqqaneq marlunnut isiginnilluni immikkoortut kommunillu pilersaarutaasa allat akornanni ataqatigiissaarinissamik qulakkerinnittussat atuutilersinneqarnissaat ilanngullugu. Immikkortunut pilersaarutinut tunngavik sukumiisoq kommunip tigussaasunut aningaasaqarnermillu ataatsimut pilersaarutaanut tapersiissaaq, taamaalilluni politikkikkut aalajangissarnernut pitsaasumik tunngaviliissalluni.
Ilitsersuut ajornanngitsoq ingerlatsivinni tamani immikkoortumut pilersaarutinik ajornanngitsunik eqqoqqissaartunillu suliaqarnissamut ikiuutaasussaq ineriartortinneqassaaq.
Naalagaaffiit Peqatigiit Nunarsuarmut anguniagaat (SDG’it)
Kommuneqarfik Sermersuup nunarsuarmi anguniakkat sakkutut ingerlatsiviit immikkoortortaqarfiillu akimorlugit atorneqartussat atuutilersinneqarnissaat sulissutigaa. Nunarsuarmi anguniakkat ataatsimut suliniuteqarfinni, immikkoortortaqarfiit akornanni immikkoortunilu immikkut ittuni oqaatsit assigiit atorneqarnissaannut tapersiissapput.
Naalagaaffiit Peqatigiit anguniagaat kommunimi ineriartornerup nalilersornissaanut kiisalu siunissami anguniagassaajumaartunut takusutissiissutissatut sakkussaalluarput. Taammaammat innersuussutigineqassaaq, immikkoortuni tamani suliniuteqarfiusunik nalilersuinermi Naalagaaffiit Peqatigiit anguniagaat atorneqassasut, minnerunngitsumillu anguniagassanut ilaasunik qanoq nassuiaatitalernissaanik aamma siariaatit kinguaariaatillu qanoq uuttorneqarnissaannut isumassarsiorfigalugit.
