2020-p aallartinnerani nunaqarfimmi 64-it najugaqarput, piniariartarfinni inuit ilanngullugit. Ukiut kingulliit ingerlanerini inuit ikiliartorput taamaaginnarnissaalu ilimagineqarluni.
Pingaarnertut iluseq
Inissiaqarfiit
Inissiat 51-iupput taakkunannga 30-t inoqaratik, tassalu 60 %-ii. Inissiat ajorisassaanngillat.
Inissiat nunaqarfiup qiterpasissuani ataatsimoorussanut qanittuni inissisimapput.
Inuttussutsikkut aamma inuussutissarsiornikkut ineriartorneq tunngavigalugit kommunalbestyrelsimit Kuummiuni nunaminertanik nutaanik inissianut siunertalinnut atugassiisoqarnissaa pisariaqanngitsoq nalilerneqarpoq.
Piffissami pilersaarusiorfiusumi inissianik pitsanngorsaanerit, ingitserinerit inissianillu allatut ilusilersuinerit – innuttaasut peqataatillugit – ingerlanneqassapput.
Immikkoortut ataatsimoorussat
Nunaqarfimmi ataatsimoorussat immikkoortumi umiarsualiviup eqqaaniittut tassaapput pisiniarfik, qui, allakkerivik, banki, tarajorterivik, gassiisivik tankeqarfillu. Umiarsualiviup avannannguaniipput atuarfik, oqaluffik, illu sullissivik, katersortarfik qatserisarfillu.
Ataatsimoorussat nutaat qiterpasissumi inissinneqassapput taamaalilluni tamana nunaqarfimmi katersuuffittut inissinneqassammat.
Inuussutissarsiuteqarfiit
Isertumi puisinik piniarneq annerusumik inuussutissarsiutitut tunngaviuvoq. Illumi sullissivimmi nannut amiinik tigusineq periarfissaqarpoq. Kommunalbestyrelsimit kommunimi piniartut tunitsiveqarsinnaanerinut suliarinneqqaarfissaqarnerinullu periarfissanik pitsaanngorsaanissaq sulissutigiumaneqarpoq. Tassunga atatillugu Kommunalbestyrelsip Namminersorlutik Oqartussat suleqatigalugit puisit amiisa suliarineqarnerinut periusissanik ineriartortitsinissaq sulissutigissavaat.
Puisit amiinik suliarinninnissamut mersotarfeqalernissamullu nunaqarfinni periarfissaqalissappat taamattut siullermik Isertumi Tiilerilaamilu inissinneqartariaqarput.
Nunaminertat sanaartorfiunngitsut nunaminertallu sukisaarsarfiit
Iliveqarfitoqqat pigiinnarneqarnissaat kissaatigineqarpoq, iliveqarfillu nutaaq peqatigalugu nunaminertamut sanaartorfiunngitsumut inissinneqarlutik.
Allanngutsaaliugassatut soqutigisat
Nunaqarfimmi eqqaaniluunniit illunik illukunilluunniit allanngutsaaliugassanik misissuisoqanngilaq.
Angallannermut, teknikkimut avatangiisimullu tunngasut
Helistop nunaqarfiup avannaani inissisimavoq.
Assartuinermut umiarsualivimmiit aqquteqarpoq, taanna innaallagissiorfimmut, imeqarfimmut, allaffimmut, illumik sullissivimmut, atuarfimmut, iliveqarfimmut aamma ikuallaavimmut attaveqaataavoq. Taassuma saniatigut nunaqafiup kitaani inissianut assartuinermut aqquteqarnissaa pisariaqartinneqarpoq.
Nunaqarfik umiarsualiviup eqqaani innaallagissiorfimmiit innaallagissamik pilersorneqarpoq. Innaallagissiorfiup piffissami pilersaarusiorfiusumi allilerneqarnissaa pisariaqarsimanngilaq.
Imermik pilersuineq nunaqarfiup avannaani tatsimit, erngup aqqutaatigut aamma ukiumi imermut tanki 1.400 m3-imit imertarfigineqarsinnaasumit pivoq. Taseq imeqarfiusoq pallitsaalillugu killeqarfeqartinneqarpoq.
Imikoorut qasertoq nunamut kuutsinneqarqarpoq. Eqqakkanut anartarfilerinermilu aaqqissuussaqarpoq inissalimmik eqqaavittalimmillu.
