Piffissami aggersumi immikkoortup nutaamik inissinnera aalajangiiffigineqassaaq, takornariaqarneq tamatumani annertunerusumik apeqqutaasinnaalluni. Immikkoortumi takornariaqarnerup ataatsimoortumik pilersaarusiorneqarnissaani pingaaruteqarpoq immikkoortup atorneqarnerulernera qanoq aaqqinneqassanersoq isummerfigissallugu illersugassatut soqutigisanik innarliinani.
Ivittuut Kangilinnguillu ullumikkut immikkoortoq L-itut taaguuteqarput. Sumiiffiit ilaat allamut atugassanngorlugit allanngortinneqassappata, tamaani takornarialerinermik ineriartortitsinissamut atuuffissaat ataatsimoortumik isummerfigineqassapput. Immikkoortut Arsuup avataaniittut sanaartorfigineqartussaanngitsutut toqqagaapput:
- Kommunimi pilersaarummi immikkoortut najugaqarfinniit 5 kilometerinik ungasissusillit immikkoortutut atorneqanngitsututut toqqarneqarput (immikkoortup ilaa O1). Immikkoortut atorneqanngitsut ilisarnaatigivaat immikkoortut innarlerneqaratik imaluunniit innarlerneqarpiaratik atugassanngortinneqarnerat, sanaartorfiunatik atortoqaratillu
- Immikkoortut allat inuilaaqarfittut toqqarneqarput (immikkoortup ilaa O2)
- Immikkoortut annertunerusut ivigartortitsivissatut atugassanngortinneqartut aamma savaateqarfinnut ataasiakkaanut allanullu ungasinnerusumi inissisimasut sanaartorfiusussaanngitsutut toqqagaapput
