”Kommunimi pilersaarutitut ilassut nr. 4 – Illoqarfiup sukisaarsartarfiinut pilersaarut” oktober 2010-mi atuutilerpoq, taamaalilluni Nuummi sukisaarsartarfii qorsuusut pillugit kommunalbestyrelsip qanoq aqussinnaanerai pillugit perngaammik ataatsimoortumik pilersaarusiorneqarput, taamaalilluni illoqarfiup innuttaannut pitsaanerpaamik iluaqutaasinnaanngortillugit.
Nuummi sumiiffiit sukisaarsartarfiusut sumiiffinnut assigiinngitsunut pingasunut pilersaarutip agguarpai:
- Nunaminertat sanaartorfiusussaanngitsut.
- Nunaminertat annertunerusumik sukisaarsartarfiusussat.
- Illoqarfiup naapeqatigiittarfii nunaannarmi aqqusineeqqani, timersornermi aqqusineeqqanut illoqarfimmilu sammisassaqarfinnut ataqatigiissillugit.
Nuummi nunaminertanut qorsooqinnersaqarfinnut tamakkiisumik pilersaarutitut pilersaarutip inassutigisai sukumiinerusut siunissami kommunimut pilersaarutinik suliaqartarnerni ingerlaavartumik tunngavigineqartassapput.
Nuuk illoqarfiit pingaarnersaanni qorsuttut pilerinartutullu ilisarnaasernissaannut illoqarfiup pinngortitallu akornanni ataqatigiissitsilluni oqimaaqatigiissitsinissaq qulakkeerniarlugu kommunimut pilersaarusiornerup ingerlateqqinneqarnerani taamaattumik ullumikkut kommunimut pilersaarummut nangeqqinnerini tamatuma atatiinnarneqarnissaa kissaatigineqarpoq. Taamaammallu pilersaarutip aalajangersagai maanna kommunimut pilersaarummut pingaarnersiorlugit nuunneqarput.
Kangerluarsunnguami sukisaarsarfiliorsinnaaneq samisassanillu, soorlu sisorarnermik, hiisternermik, trekking-ernermik mountainbikernernik, ingerlataqarsinnaaneq Siorarsiorfik-up ineriartortinneqarneratigut ammaanneqarput. Kangerluarsunnguamut attaveqaasiinikkut kangerluk timaalu ammarneqassapput angallallu atunngikkaluarlugu tikikkuminarnerujussuanngussapput. Tamatumunnga ilutigitillugu Kapisilinnut Sermilimmullu siunissami atassusiinissaq ajornarunnaarsinneqassaaq.
