Nuummi innuttaasut sukkasuumik allanngorartuunngitsumillu amerliartormata, illoqarfiup immikkoortussaa nutaaq, Siorarsiorfik, pilersaarusiorneqarpoq. Illoqarfiup immikkoortussaa Qinngutta kujataaniittumi nuunnguup kujasinnerpaavaniissaaq. Sullorsuaq 2023-mi naammassineqartussatut naatsorsuutigineqartoq aqqutigalugu illoqarfiup immikkoortuanut aqquteqassaaq.
Illoqarfiup immikkoortuaniissapput atuarfik, meeqqerivik, inuussutissarsiuteqartut aamma inissiat, kiisalu umiatsianut nuannaariutinut talittarfik allallu sukisaarsarfiit.
Nuup anguniagaqarfiulluartumik pilersaarusiorneranut atatillugu illoqarfiup immikkoortua pilersaarusiorneqarpoq, taamaalillunimi illoqarfimmi inissiat pilerinartut suli periarfissaajuassammata.
Kommuneqarfik Sermersuup illoqarfimmi ineriartortitsinermut ingerlatseqatigiiffik Nuuk City Development, NCD pilersippaa. Ingerlatseqatigiiffiup nutaap NCD-p Nuuk illoqarfittut ineriartortinnissaanut aningaasaliinissaq, ineriartortitsinissaq, piareersaanissaq, sanaartorfissagissaanissaq, sanaartornissaq ingerlatsinissarlu aamma illoqarfiup ilaa nutaaq Siorarsiorfik isumagissavai.
