Sukisaarsaartarfinnik pioreersunik pilersaarusiornikkut nutarterinikkullu qulakkeerneqassaaq Nuummi sukisaarsaartarfiit pingaarutaat misigisaqarfiginissaallu pitsaanerulersarmata. Piffissami pilersaarusiorfiusumi suliniutit makku ukkatarineqarput:
Illoqannginnersat Imanerlu atuarlugu pisuinnaat aqqutaat illoqarfiullu ilaa oqaluttuassartalik Stephanssonsip aqqusineeraa Umiarsualivitoqqamut ingerlasut pilersaarusiorfimmi piffissami aggersumi isikkuisigut nutaanngortinneqassapput illoqarfiullu ilisarnaataanik misigisaqarnermik nukittorsaataassalluni. Nuup oqaluttuarisaanikkut kultureqarnikkullu aammalu illoqarfiit pingaarnersaattut pitsaaqutaanik ersersitsisussamik, illoqarfimmik ilusilersueriaatsikkut ataatsimoortumik ilisarnaatissamik pilersitsisoqassaaq.
Illoqannginnersat kajuminnarsarneqassapput assigiinngitsunik sammisassaqartitsinikkut pilersaarusiorfiginerisigut ukiorlu kaajallallugu uninngaarfigineqarsinnaassallutik. Aamma aqqusernit qallersornerisigut, qullilersornerisigut eqqumiitsulianillu pilersorneri ukkatarineqassapput.
Imanermut ilusilersugassaq 2011+ (Imaneq Designmanual 2011+) sakkussaavoq pisuinnaat aqqutaannik siunissami ilusilersuinissamut tunngavissiisussaq. Illoqannginnersat ilusilersorneri atuisut, attuumassuteqartut tamaanilu inuussutissarsiuteqartut kiisalu illoqannginnersanik titartaasartut eqqumiitsuliortullu suleqatigilluinnarlugit suliarineqassapput.
Illoqannginnersat assigiinngitsut patajaallisarneqarnerannut suliaq immikkoortukkuutaassaaq.
Tamaani nutaamik sanaartorneq illoqarfimmullu atasunik sanaartorneq inissiinerlu ilusilersuinerlu Imanermik atuarlugu illoqarfiullu ilaa oqaluttuassartalimmik ikorfartuissaaq.
Linki: Imaneq Designmanual
Katuap Kommuneqarfiullu allaffiata eqqaa piffissami pilersaarusiorfissami sammisassaqartitsivittut allanngortinneqassaaq illoqarfiullu qeqqanut ataqatigiissutut kajuminnartutullu pilersitseqataassalluni.
Tamanna amerlasoorpassuarnik atuisoqarpoq illoqarfiup qeqqaniilluni bussit unittarfeqarluni, illoqarfiup niuertarfii marluk, kulturikkut illorsuaq, illoqarfiup ilaa oqaluttuassartalik, kulturikkut sammisassaqartitsivik kiisalu Kommuneqarfiup allaffia tassaniillutik. Illoqarfiup immikkoortortaani angallaffik pingaarneq tassaavoq sumiiffikkut ingerlaarfik innuttaasut niuertarfiit taakku marluk akornisigut ingerlasarfiat.
Sumiiffik ullumikkut biilinut inissiisarfittut pingaarnertut atorneqarpoq. Taakkua saniatigut B-31-p eqqaani qallortarfeqarpoq sukisaarsaartarfittut atorneqakkajulluni.
Illoqarfiup qeqqani inissisimanera innuttaasullu aqqutigilluartarmassuk allanngortinnissaanut ilippanaateqarluarpoq. Siunissami sammisassaqartitsivissaq meeqqanut inuusuttunullu sammitinneqassaaq taamaalillunilu Kuussuup naannerani atuarfissarsuarmi Atuarfik Inussuk ikorfartussallugu. Aneerasaartarfik tassani uninngaarfeqarluni, sammisassaqartitsiviulluni pinnguarfiullunilu inissaqartitsissaaq. B-31-p eqqaani qorsoqarfik sapinngisamik attatiinnarneqassaaq aneerasaartarfimmilu allanik aamma naatitanik naatitsivigineqarsinnaassalluni.
Aqqusernit Kuussuaq aamma Aqqusinersuaq Nuup qeqqani aqqusernit pingaarnersaraat illoqarfiup qeqqani inissisimanerminnik.
Kuussuup oqaluttuarisaanermi pingaaruteqartoq Nuup Saava aamma pisuinnaat aqqutaat Imaneq kiisalu atuarfissarsuaq Atuarfik Inussummut attaviuvoq. Aqqusernup taamaalilluni pisortat kulturikkullu neqeroorutaannut arlalinnut attaviuvoq.
Atuarfiup Inussuup ammarnerani pisuinnaat
Kussuaq aamma Aqqusinersuup avannaa'tungaani, H. J. Rinkip Aqqutaa aamma Kongevej angallannikkut isumannaallisaaneq eqqarsaatigalugu pingaarneruliinnassapput.
Nuup qeqqani sukisaarsaartarfiunissaanik illoqarfiullu qeqqanik inuummarissumik inerisaanermik ikorfartuiniarluni kiisalu pisuinnaat angallannermi isumannaatsuunissaat ikorfartorniarlugu kissaatiginarpoq Kuussuaq aamma Aqqusinersuaq siunissami sukisaarsaartarfinnut atassuseqalernissaat pillugu inerisaasoqarnissaa.
Kuussuaq atuarlugu silinnernik pisuinnaat aqqutaannik pilersitsinikkut pisuinnarnut atugassarititat pitsanngorsarneqassapput kiisalu Kuussuarmi kussineq, illoqarfiup kuussinera pingaarneq, ilanngunneqassaaq illoqarfimmi sukisaarsaartarfiit ilaattut ilanngunneqassaaq. Aamma Aqqusinersuup avannaatungaata ilaa biilinik angallaffiujunnaartillugu bussit ingerlaarfiattut allanngortinneqarsinnaanersoq misissorneqassaaq.
Kuussuup Aqqusinersuullu sukisaarsaartarfinnut ataneqartilernissaannut inerisaanermi pisuinnaat aqqutaannik Imanermik kiisalu Kommunip allaffiata eqqaani sammisassaqartitsivimmik suliniutaasut ikorfartussavai illoqarfiullu qeqqanik ataqatigiissilertitsilluni uummaarissisitsissaaq.
Piffissami aggersumi Aqqaluup aneerasaartarfiata eqqaa pillugu pilersaarutip tamakkiisup atuutsilersinneqarneranik kommuni suliniuteqassaaq.
Aqqaluup aneerasaartarfia Nuummi oqaluttuarisaanikkut attuumassuteqarlunilu ornigarluarneqartartuni pingaaruteqartuuvoq. Kalaallit Nunaanni illoqarfinni parkituaasut ilaattut, Nuup illoqarfissuanngorsaleruttornerani oqaluttuarisaanermullu tunngasuunerani sukisaarsartarfittut pingaaruteqarpoq.
Aneerasaartarfiup inissisimanera ilinniarfinnut, kulturikkut allaffissornikkullu atuuffinnut pingaarutilimmik attaviuvoq. Aneerasaartarfiup immikkoortutut sukisaarsarfittut annerusumik atorneqarnissaa anguniarneqarpoq, ilinniartitsinermut, sunngiffimi aamma kulturikkut sammisassaqartitsinermut tunngasinnaasunik. Aneerasaartarfiup nutarternera Imanermut pisuttuartarfittut inerisaanermut ataneqartillugu isigineqassaaq illoqarfiup qeqqa nutaaliaq kiisalu Nuup oqaluttuassartaanut Nuup Saavanut atanerata patajaallisarnissaa eqqarsaatigalugu.
Aneerasaartarfimmi qulequttat isumagineqartussat ilagaat uninngaartarfiit, aqqusineeqqat aqqusernillu, naatitsiviit qullilersuinerillu, issiaartarfinnik inissiinerit kiisalu eqqumiitsulianut ingerlatitseqqinnerlu inissisimanerat ilusilersugaanerallu inissinnissaat.
Piffissami pilersaarusiorfiusumi Nuup Saavanut tamakkiisumik pilersaarusiorneq naammassineqassaaq.
Nuup Saava immikkuullarissuuvoq asseqarani Nuummut Nunattalu sinneranut illoqarfiup immikkoortua oqaluttuassartamigut pingaaruteqartorujussuulluni. Nuup Saava Nuup illoqarfianut oqaluttuassartalimmut ilaavoq. Illoqarfiup immikkoortua ullumikkut sammisassaqartitsinermut ulluinnarmilu inuunermut tunngaviuvoq.
2023-mi illoqarfiup immikkoortuata siunissaa pillugu innuttaasunik peqataasitsisoqarpoq. Tamanna tunulequtaralugu politikkikkut aalajangerneqarpoq Nuup Saava tamakkiisumik nutaamik pilersaarusiorfiunissaanut ammasumik isummersuisitsisoqarpoq. Tamaannga pitsaanermik attaveqarnissaa ataatsimoornerusumik ilisarnaataa kiisalu sammisassanut uninngasarfiillu pitsaanerit ukkatarineqassallutik - illoqarfiup immikkoortuata immikkuullarissusaa oqaluttuassartaalu innarlinngikkaluarlugit.
Ataatsimut pilersaarutip Nuup Saava sukisaarsaartarfittut kultureqarnermilu inissisimaffia pillugu anguniakkamik qaffatsitsissaaq Nuummi innuttaasunut pingaarnertut suliniuteqarfigalugu: Pinnguarnissamut, eqqissilluni eqqarsaatersorfissatut kiisalu illoqarfiup immikkoortuani qanilaarfittut inissaqartitsisoqassaaq, tamannalu kulturikkut aaqqissuussinernut annernut soorlu Inuiattut Ullorsiornermut kiisalu Nuuk Snow Festivaleqartitsinermut atorneqarluni tunngaviusinnaassalluni suli.
Immikkoortumi Qapiarfiusaap qeqqaniippoq immikkoortoq sanaartorfiunngitsoq qaqqalik qaqqap qaalik.
Qaqqap qaavaniit Nuup kujataani qeqertanut kiisalu avannamut Sermitsiap tungaanut isikkiveqarpoq. Isikkiviit taakkua illoqarfiup pinngortitamut atassuteqarneranik ersarissaasuupput taamatuttaaq isikkiviulluni pingaarutilik allanngutsaaliugassaq.
Qaqqaq illoqarfimmi sukisaarsaarfittut ilaatinneqassaaq immikkoortullu killiffia pitsanngorsarneqassaaq.
Piffissami tulliuttumi pilersaarusiorfimmi immikkoortup ornikkuminarnerunissaa immikkoortorlu sanaartorfiunngitsoq illoqarfiup sinneranut atassusernissaa ukkanneqarpoq. Tamanna qattornisigut pisinnaavoq, taamaalilluni ataatsimoorfimmi tamanut uninngaartarfik pilersinneqassaaq. Qattornit immikkoortumi sammisassaqartitsinermut atorneqarsinnaapput, immikkoortumi najugaqartut aamma illoqarfimmi innuttaasunut orniginarsinnaassallutik taamaalilluni immikkoortumut orniguffiusinnaalluni katersuuffiusinnaassalluni.
Qaqqajunnap sanaartorfiunnginnera attatiinnarneqassaaq.
Pilersaarutip atuuffiani Nuussuup immikkoortutut pitsanngorsaaffigineqarnissaa pingaartinneqarpoq. Anguniarneqarpoq illoqarfiup immikkoortortaa inissiaqarfittut kajumigineqartutut ineriartortinneqassasoq inissianik, silami periarfissanik aamma kiffartuussivinnik ullutsinnut naleqquttunik pilersorlugu. Pinnguartarfiit pitsanngorsarneqassapput aamma inuusuttunut sammisassanik amerlanernik pilersitsisoqassaaq. Taassuma saniatigut tatsip sukisaarsarfittut atorsinnaanera annertusarneqassaaq.
Nuussuup aamma angallatit nuannaariartaatit tulattarfiannut attuumassut pitsanngorsarneqassaaq aamma suut sunniivigeqatigiissinnaasut pitsaanerusumik atorneqassapput. Nuussuup aamma illoqarfiup sinneranut atassuteqaatit pitsanngorsarneqassapput.
Immikkoortortamik ineriartortitsinermi soqutigisallit assigiinngitsut apeqqutaapput aamma suliassaqarfiit assigiinngitsut suleqatigiissinnaanerat. Illoqarfiup immikkoortuanik inerisaaneq taamaalilluni ingerlaavartumik suliarineqarumaarpoq.
Nuussuarmi pisortat inissiaataannik patajaallisaanermut atatillugu suliniutit suliallu arlallit aallartinneqareerput. Patajaallisaaneq inissiat pitsaassusaat, illut akornanni inuunerup inooqatigiinnermullu suliniutinut tunngasut ukkataralugit ingerlanneqassaaq.
Sissaq sinerlugu aqqusineeqqamik pilersitsinermi ilaatigut sukisaarsaartarfittut kiisalu pisuinnarnut attaveqaasersuutinut pingaarutilinnut ilaasutut ippoq.
Illoqarfiup immikkoortuini nutaani sissami sanaartortoqannginnissaa pilersaarusiorneqarpoq, tassuuna qulakkeerniarlugu kikkulluunniit sissamukariaannaanissaat aammali ataqatigiissumik sissakkut aqqusineeraliornissaq.
Sissaq sinerlugu aqqusineeraqassaaq taamaalillunilu Nuup sissaa allanngorartoq, immap allanngorartumik isikkoqalersarnera aamma imaq qulaallugu Nuup eqqaanut nunatanut isikkiveqarpoq. Nuummi innuttaasut tikeraallu Nuup sissaa kaajallallugu angalaffigisinnaalissavaat taamaalillutillu nunaminertat sanaartorfigineqanngitsut aqqutigisarsinnaallugit.
Aqqusineerarli isorartussutsini ataasiakkaani sissamut qanittumi illuliorfiusimasuni imaluunniit umiarsualivimmi suliat pissutigalugit nunaminertat pisunnissamut akornutaasut pissutigalugit aqqusineerartaqartassanngillat. Sumiiffiit allat qutaarluusut ullumikkut angalaffiusinnaanngitsut aqqusiorfiginissaat manissarneqarnissaalluunniit, taamaalilluni angalaffigiuminarninngorlugit, siunertaavoq. Sissaq sinerlugu aqqusineeraq sunngiffimmi sammisassaqarnissamut takornarniarnissamut periarfisseerujussuassaaq.
Sissaq sinerlugu aqqusineeraq immikkoortuni arlalinni piviusunngortinneqassaaq, imaluunniit pisariaqartitsineq qanoq annertutiginersoq takuneqariarpat.
Linki: Sissaq sinerlugu aqqut Immikkoortoq 2
