Kommunalbestyrelsip nunaminertaq ukiuni marlunni taakkualu tikillugit qinnuteqartup atuinissaanut inniminnersinnaavaa. Taamatulli inniminniisinnaaneq taamaallaat pisinnaavoq pilersaarummik qinnuteqaateqartup qinnuteqannginnermini pilersaarutitut qinnuteqaatit kommunalbestyrelsip malitassatut allattugaatai malissimappagit.
Pilersaarutitut qinnuteqaat akuerineqarsinnaavoq, pilersaarut annertuujuppat, sumiiffinni sukumiisumik aalajangersakkanik aalajangiiffigineqarsimanngitsuni.
Kommune kommunimut pilersaarummi matumani siunissamut isigaluni ineriartortitsilluni pilersaarusiornissamut immikkoortitsereerpoq pilersaarusiornermi inatsimmi §14a naapertorlugu, tamannalu pilersaarusiornermut qinnuteqaatinut §45a naapertorlugu atuutsinneqarsinnaalluni
Sumiiffimmi siunissamut isigaluni ineriartortitsinissamut pilersaarusiorfioreersumi qinnuteqaat, sumiiffiup atorneqarnissaanut pingaarnertut Kommunalbestyrelsip takorluugaanut naapertuutissaaq.
Pilersaarutitut qinnuteqaammut Kommunalbestyrelse imaattunik piumasaqaateqarpoq:
- Pilersaarutit CVR-normumik nalunaarsorneqarsimassapput
- Pilersaarutitut qinnuteqaatit sumiiffimmi ataatsimi ataatsimoortumi inissisimassapput aammalu sumiiffinni arlalinni assigiinngitsuni inissisimaffeqassanatik, taamaassappat kommunimut pilersaarutinik / illoqarfiup ilaanut pilersaarutinik arlalinnik suliaqartoqarnissaa pisariaqassammat.
- Pilersaarutitut qinnuteqaat nunaminertamik sanaartorfiusumik 2.500 m2-imit minnerunngitsumik imaqassaaq
- Pilersaarut kommunip ineriartorneranut pitsaasumik iluaqutaassaaq aamma innuttaasut ataasiakkaat avatangiisinik piviusunik misigisassaannut.
- Pilersaarutit 3D-tut ilusilersorneqarsimasut piumasaqaataasinnaapput, pilersaarusiornermut inatsimmi §21 naapertorlugu.
- Pilersaarummik qinnuteqartup pilersaarut teknikkitigut aningaasatigullu pilersinneqarsinnaanera uppernarsaateqartissinnaavaa.
- Pilersaarutitut siunnersuut sumiiffinni nunaminertamik atugassiissuteqarfiunngitsunut taamaallaat tunngasuusinnaavoq.
Taamaalilluni pilersaarutitut qinnuteqaatit Kommunalbestyrelsimit qaqugukkulluunniit itigartinneqarsinnaapput, qulaani taaneqartoq apeqqutaatinnagu.
Nunaminertamik atugassiissuteqarnermut atatillugu pilersaarummik piginnittumit aningaasatigut qularnaveeqqusiinissaa kommunimit piumasaqaatigineqarsinnaavoq. Taamatuttaaq piumasaqaatigineqarsinnaavoq, pilersaarummut immikkoortukkaarneranut pilersaarummik tunniussisoqassasoq, tassani sukisaarsarfiugallartussamik suliniummik pilersitsinissaq ilanngullugu.
Pilersaarutitut qinnuteqaatit ingerlanneqarnerinut ima oqaasertaliisoqarsinnaavoq:
- Pilersaarummik piginnittup sanaartugassatut qinnuteqaatini Kommunalbestyrelsimut nassiutissavaa, piumasaqaataavorlu aningaasaliisussap illoqarfiup ilaanut pilersaarusiorneq aammalu avatangiisinut tunngatillugu naliliisitsineq, assersuutigalugu VVM-it nammineq isumagalugit.
- Sanarfinermut Avatangiisinullu Ingerlatsiviup pilersaarut suliarissavaa nalilersuinermi piumasaqaatit eqqarsaatigalugit (malitassatut allattukkat takukkit)
- Pilersaarummut inassuteqaat kommunalbestyrelsimit suliarineqassaaq. Akuersissutigineqassappat sivikinnerpaamik sapaatip akunnerini arfineq-pingasuni tusarniaassutigineqassaaq, tassunga ilanngunneqassallutik Kommunalbestyrelsip suliamut tunngasumik kinaassusersiunngitsumillu piumasaqaatai (pilersaarutitut qinnuteqaatinik malitassatut allattukkat) qinnuteqartup naammassisassai.
- Tusarniaanermi kikkulluunniit tusarniaassummut akissuteqarsinnaapput, akerliliissuteqarsinnaallutik imaluunniit pilersaarutaasinnaasunik tunniussaqarsinnaallutik. Pilersaarummik piginnittoq tusarniaanermut atatillugu pilersaarut pillugu tamanut ataatsimiisitsisussaatitaavoq.
- Tusarniaanermi akissuteqaatit qinnuteqaatillu tunuliaqutigalugit Kommunalbestyrelse suliamut tunngasumik kinaassusersiortuunngitsumillu pilersaarummik naammaginartumik/piumasaqaatinillu naammassinnittumik pitsaanerpaamik toqqaassaaq. Kommunalbestyrelsip aamma pilersaarummik qinnuteqaat itigartissinnaavaa.
- Pilersaarummik piginnittoq ukiut marluk tikillugit sivisussusilimmik nunaminertamik inniminniissunneqassaaq. Piffissami tassani pilersaarummik piginnittoq pilersaarummut tunngavimmik suliaqassaaq, ukiut marluk ingerlaneranni pilersaarummut nunaminertamik atugassiissuteqarnissamik periarfissiisumik.
- Nunaminertamik atugassiissuteqarnermi Ilanngullugulu piumasarineqarsinnaavoq, immikkoortukkuutaartumik piviusorsiortumik pilersaaruteqarnissaq kiisalu aningaasatigut qularnaveeqqusiisoqarnissaa, tassuuna sumiiffimmi attaveqaasersuutit sukisaarsaartarfiillu piviusunngortinneqarnissaat qulakkeerneqassalluni.
Linki: PILERSAARUMMIK Qinnuteqartup piginnaasai
Linki: Qinnuteqartup malitassatut allattugaatai Pilersaarummik qinnuteqartumut
Linki: PRJKTANS Sumiiffissiut_Proces