Kommunalbestyrelsimit nunaminertat assigiinngitsunut siunertallit atugassiissutigineqarnerinik ingerlaavartumik nalunaarutigineqartarpoq.
Nunaminertat kommunimut pilersaarusiortoqarneranut imaluunniit illuliorfissagissaanermut atatillugu qinnuteqarfigisinnaanngorpata nalunaarutigineqartassapput.
Immikkoortuni kommunimut pilersaarummut tapiliussani nutaani nunaminertat qinnutigineqarsinnnaasutut nalunaarutigineqartut ima paasissutissartalerlugit nalunaarutigineqassapput:
- Qinnuteqarnermi nunaminertat kissaatigineqartut tulleriiaarlugit allattorneqarnerat ilanngunneqassasoq
- Nunaminertanik arlalinnik qinnuteqarnermi qinnuteqaatinut tamanut pilersaarusiat ataatsimut piffisalersuisoqassasut aningaasalersorneqarnissaannullu pilersaarut ilanngunneqarluni
- Qinnuteqaatit tiguneqartut akornanni kissaatigisatut tulleriiaakkat assigiissuteqarpata, qinnuteqartut akornannit makitsisoqassaaq taamaalilluni qinnuteqartoq makinneqartoq nunaminertamut salliullugu qinnuteqartoq inniminniisinneqarluni
- Nunaminertamik inniminniisoqarsinnaavoq qinnuteqartup tulleriiaaraluni allattugaani nunaminertaq ilaappat
- Nunaminertamik salliunneqartumik inniminniisoqarsinnaanngippat qinnuteqartoq qinnuteqaammi nunaminertanik tulleriiaakkanut utaqqisunut allattorsimaffimmut nalunaarsorneqarsinnaapput. Nunaminertamut aalajangersimasumut nunaminertamik atugassiineq pereerpat utaqqisunut allattorsimaffik erngertumik atorunnaarsinneqassaaq
Nunaminertat atugassanngorlugit nalunaarutigineqaraangata qinnuteqartut tamarmik allagarsiussami ulluliunneqartup iluani qinnuteqartut ataatsikkoortutut naatsorsuunneqassapput. Ulloq taanna qinnuteqartut nunaminertamut ataatsimut qinnuteqarsimappata makitsinikkut nunaminertaq kimit inniminnerneqartoq aalajangerneqassaaq. Makitsisoqarnerani qinnuteqarsinnaasut sinneri utaqqisunut allattorsimaffimmut inissinneqassapput.
Inuk arlaannaannulluunniit attuumassuteqanngitsoq aamma kikkut tamat peqataaffigisinnaasaannik makitsisuussaaq.
Nunaminertanut nalunaarutigineqartunut qinnuteqartoq ataasiinnaappat, nunaminertaq qinnuteqartumut makitsinertaqanngitsumik inniminnerneqassaaq.
Kommunalbestyrelse immikkut ittumik pisoqartillugu, assersuutigalugu allilerisoqartillugu, atuinermik allannguisoqartillugu kommunimullu pilersaarummi anguniakkanik piviusunngortitsinissamut atatillugu nalunaaruteqartarneq allatoortoq atussallugu aalajangersaasinnaavoq, pisariaqarpat qulaani taaneqartumit allaanerusumik makitsisoqarluni utaqqisullu allattorsimaffiliorluni. Periuseq allanngortinneqartillugu nalunaarummi tamanna erseqqissaatigineqartassaaq.