Pingaarnertut qinnuteqaatit tamanut ammasumik saqqummiunneqassaaq, taamaalillunilu kikkut tamarmik akerliliissuteqarnissamut periarfissinneqassallutik. Nunaminertamik atugassinneqarnissamut qinnuteqaatit kommunimi pilersaarummut nassuiaasersorluakkamut naleqquppat, kommunip nunaminertamik atugassinneqassasutit aalajangersinnaavaa.
Qinnuteqaateqariaatsip illoqarfimmi nunaqarfimmiluunniit arlaannik qinnuteqaateqarneq assigiinnarpaa.
Qinnuteqaatit kommunimi pilersaarummut uniuuppat, kommunip pingaarnertut qinnuteqaatit itigartitsissutigissavaa. Pisulli ilaanni nunaminertamut qinnuteqaatigineqartumut immikkut ittumik akuerissallutit kommune aalajangersinnaavoq. Kommunip tamanut ammasumik saqqummiussereernermigut aammalu nunaminertamik atugassinneqarninni kalluarneqartussanut tusarniaareernermigut tamanna akuerisinnaavaa.
Nunaminertamik qinnuteqarfigisannut immikkoortup ilaanut kommunimut pilersaarummik kommune akuersissuteqarsimanngippat, kommune:
- Sumiiffimmi 500-nik amerlanerusunik innuttalimmut tunngatillugu aalajangersakkanik sukumiisunik aalajangiiffiginnissaaq imaluunniit
- Tamanut tusarniaassaaq. Tamanut ammasumik tusarniaaneq nalinginnaasumik naqitat atorlugit saqqummiussinikkut allagarsiinikkulluunniit pisarpoq. Tusarniaanermi ullut sivikinnerpaamik 14-it periarfissaritinneqartarput. Tusarniaanermi akissuteqartoqarsimappat, taakkuninga kommunip suliamik ingerlatitseqqiineranut ilanngussisoqassapput