Maannakkut Tasiilami qitiusoqarfiit illoqarfiup avannaata tungaani inississimapput, tamatumani aallaaviulluni illoqarfiup qeqqa oqaluttuassartalik, taanna ullumikkut illoqarfimmi qitiusoqarfiit marluusut aapparaa. Illoqarfiup ilaa taanna umiarsualivimmiit qummut sivingarngit ivigallit atuarlugit ingerlavoq. Illoqarfiup ilaani tassaniipput illut “Angmassalimmi ajoqersuiartortitat niuertoqarfiullu” 1890-ikkut naalerneranni pilersinneqarneraneersut. Illoqarfiup ilaa tamanna eriagisassanut ilaavoq sukumiinerusumik allaaserineqarpoq immikkoortumi illoqarfiup immikkoortui eriagisassat. Illoqarfiup ilaani tamaani pisortat suliffeqarfii arlallit inississimapput.
Qitiusoqarfiup aappaa illoqarfiup avannaata tungaaniippoq illoqarfiullu qitiusoqarfiata oqaluttuassartallip avannamut kitaani inississimalluni. Tamaanga inissineqarsinnaapput illoqarfimmi ingerlatsivissat sanaartornikkut illoqarfiup qitiusoqarfianut oqaluttuassartalimmut angivallaartut. Ingerlatsiviit arlallit soorlu atuarfik, timersortarfik, napparsimavik aamma Pilersuisoq sumiiffimmi maanna inississimareerput.
Naasuliartarpiup kujataatungaaniippoq timersortarfik qitiusut pingajuat. Qitiusumiipput meeqqerivik, arsaattarfik tamannalu Hotel Angmagsaliup tungaanut qaqqaq sinerlugu annertussuseqarpoq. Illu B-883 ilaannakortumik isatersimasoq arsaattarfimmut atasumik klubbitut atuuffeqartillugu sananeqarnissaa kissaatigineqarpoq immaqalu caféqartillugu imaluunniit tamanit atorneqarsinnaasumik peqartillugu.
Qitiusoqarfik nangillugu piffissakkuutaartumik sanaartorfissaq 30C11 tassaniippoq qitiusoqarfiup allilernissaanut periarfissaqarluni. Piffissakkuutaartumik sanaartorfissaq akunnittarfiliorfissatut annerusumik atugassiaavoq, qitiusoqarfimmili tamanit atorneqarsinnaasunut allanut periarfissaalluni. Mittarfissap qanittuanut inissisimaffeqartitsinikkut piffissakkuutaartumik sanaartorfissaq naasuliartarpiup kujataatungaaniittoq Tasiilap takornariaqarnikkut siuarsaaneranut qitiusussaq inissisimavoq.