2024-mi januaarimi Kuummiini innuttaasut 269-it najugaqarput. Taamaalilluni Kuummiit sumiiffimmi nunaqarfinni annersaavoq. Ukiut kingulliit ingerlanerni innuttaasut amerlassutsimikkut annikitsumik amerliartorput naatsorsuutigineqarporlu taamaaginnassasoq.
Taamaattorli ukiuni 20-ni kingullerni innuttaasut amerlassutsimikkut ikiliartuinnarsimapput. 2006-mi januaarimi innuttaasut amerlassutsimikkut 404-upput. Ukiuni kingullerni 20-ni qaffasinnerpaajulluni. Ukioqatigiikkuutaani tamani innuttaasut ikiliartorput 65+-inik ukiullit minillugit, taakkua annikitsumik amerliartulaarsimapput.
Ataatsimoorussaqarfiit
Kuummiut nunatamigut immikkuullarissuunerata oqaluttuarisaanikkullu ineriartornerata kinguneraa nunaqarfiup ataatsimoorussaqarfiisa siammasissumik inissisimanerat – taamaattorli amerlanerit nunaqarfiup kangimut kimmullu aqqutaanut atapput. Umiarsualiviup avannannguani pisiniarfik, allakkerivik, kommunip allaffia innaallagissiorfillu inissisimapput. Kangianiipput katersortarfik, ungdomsklubbi qatserisarfillu. Atuarfik atuagaateqarfillu nunaqarfiup avannamut kitaaniipput.
Inissiaqarfiit
Inissiat 100-ngajaat missaanniipput. Inissiat naapertuuttumik nunaqarfiup avannaata aammalu kangiata tungaani nunaqarfiup qiterpasissuani inissisimapput, talittarfimmut immikkoortunullu ataatsimoorussanut atassuteqarluarlutik.
Ukiuni kingullerni inoqarfimmut nuuttarneq tunngavigalugu inissiaqarneq malinnaaffigeqqissaarneqassaaq. Piffissami pilersaarusiorfiusumi inissiat pitsanngorsarneqarnissaat, isaterinissaq inissianillu allatut aaqqillugit allanngortiterinissaq qitiutinneqassaaq - innuttaasut akuutillugit ingerlanneqarsinnaavoq.
Allanngutsaaliuisitsinermi soqutigisat
Eriagisarialinnik soqutigisallit eqqarsaatigalugit illut eriagisariallit pillugit aalajangersagaliortoqarpoq taakku ingitserneqaqqusaannginnerat, aamma illut titartarneqaqqaarnerat sannaasalu eqqarsaatigineqartarnissaat pillugit.
Kuummini illunik eriagisarialinnik nalunaarsuisoqarsimanngilaq.
Nunaminertat sukisaarsaartarfiit
Najugaqatigiiffimmiippoq kuuk sinerlugu sukisaarsaartarfik. Tassani pinnguartarfimmik festivalertarfimmillu pilersitsisoqarsimavoq. Aamma illoqarfiup iliveqarfiata eqqaani arsaattarfimmik pilersitsisoqarsimavoq.
Inoqarfiup pingaarnertut inissisimaffiani nunaminertat akornanni najugaqarfiullu killeqarfia qanittumi sukisaarsaartarfittut atugassiaapput.
Inuussutissarsiuteqarfiit
Kuummiit sumiiffimmi anginerpaamik aalisakkanik tunitsiveqarpoq. Nioqqutissiassat annerpaartaat Sermiligaami piniartunit tunineqartarput.
Kuummiit aamma Sermiligaaq ataatsimoorlutik aalisarfissaqqissuupput Kuummiini aalisagaqarluarnera tunitsivissaqarneralu tunngavigalugu.
Attaveqaasersuutit
Helistop nunaqarfiup kangiani inissisimavoq.
Aqquserngit aqqusineeqqallu 2,6 kilometeritut isorartussuseqarput.
Nunaqarfik nunaqarfiup qiterpasissuani inissisimasumit innaallagissiorfimmit innaallagissamik pilersorneqarpoq.
Imermik pilersuineq nunaqarfiup avannaani tatsimit erngup aqqutaatigoortillugu pivoq ukiumilu imermut tanki imertarfigineqarsinnaasoq atorneqartarpoq. Taseq imeqarfiusoq kaajallallugu pallinneqaqqusaannginneranut killeqarfeqarpoq.
Tankeqarfillu atuuttoq kaajallallugu aamma 50 meterit missiliorlugit palleqqusaannginneranut killeqarfiit aalajangersarneqassapput.
Imikoorut qasertoq nunamut kuutsinneqartarpoq. Nunaqarfiup kujammut kangiani anartarfilerinermut aaqqissuisoqarpoq eqqaavittalimmik.
Eqqakkat pisortanit eqqagassalerinermik ataatsimut aaqqissuussamut ilaatillugit passunneqartassapput, najugaqarfimmi eqqakkat poortorneqariarlutik Nuummut ikuallaavimmut assartorneqartassallutik.
Kuummiut umiarsualivii tassaapput nunaqarfiup umiarsualivia tunisassiorfiullu eqqaani umiarsualivik.