Isertoq januaarimi 2024-mi 48-nik inoqarpoq. Innuttaasut ukiut ingerlanerini amerlassutsimikkut ikiliartuinnarsimapput. 2004-mi januaarimi innuttaasut amerlassutsimikkut 121-upput. Ukiuni kingullerni 20-ni qaffasinnerpaajulluni. Ukioqatigiikkuutaani tamani innuttaasut ikiliartorput 65+-inik ukiullit pinnatik, taakkua annikitsumik amerliartulaarsimapput.
Piffissami aggersumi taamatut ingerlaannartoqarnissaa naatsorsuutigineqarpoq.
Immikkoortut ataatsimoorussat
Nunaqarfimmi ataatsimoorussat immikkoortumi umiarsualiviup eqqaaniittut tassaapput pisiniarfik, qui, allakkerivik, banki, tarajorterivik, gassiisivik tankeqarfillu. Umiarsualiviup avannannguaniipput atuarfik, oqaluffik, illu sullissivik, katersortarfik qatserisarfillu.
Ataatsimoorussat nutaat qiterpasissumi inissinneqassapput taamaalilluni tamana nunaqarfimmi katersuuffittut inissinneqassammat.
Inissiaqarfiit
Najugaqarfimmut allanik inissianik pilersitsisoqarnissaa pisariaqanngilaq. Ullumikkut illut 50-it missaanniipput, amerlanerpaallu inoqaratik. Najugaqarfimmi inissianik isaterisoqarnissaa pisariaqarpoq, taamaaliornikkut aserfallakkaluttuinnarnerat unitsinniarneqarluni.
Kommunip inissiaatai ingerlaavartumik aserfallatsaaliorneqassapput inissianik piffissamut naleqquttunik peqarnissaa qulakkeerniarlugu.
Allanngutsaaliuisitsinermi soqutigisat
Eriagisarialinnik soqutigisallit eqqarsaatigalugit illut eriagisariallit pillugit aalajangersagaliortoqarpoq taakku ingitserneqaqqusaannginnerat, aamma illut titartarneqaqqaarnerat sannaasalu eqqarsaatigineqartarnissaat pillugit.
Isertumi illunik eriagisarialinnik nalunaarsuisoqarsimanngilaq.
Nunaminertat sukisaarsaartarfiit
Najugaqarfik sermersuarmik itiviillutik paasisassarsiortut
amerlanerpaat tikittarfigaat. Inunnut taakkununnga sammitinneqartumik tikittarfissamik inerisaasoqarnissaanut periarfissaqarsinnaavoq.
Najugaqarfiup eqqaa qajartornissamut aamma puisinik/arfernik takornariarnissamut periarfissaqarluarpoq.
Inoqarfiup pingaarnertut inissisimaffiani nunaminertat akornanni najugaqarfiullu killeqarfia qanittumi sukisaarsaartarfittut atugassiaapput.
Inuussutissarsiuteqarfiit
Inoqarfimmi inuussutissarsiut pingaarneq tassaavoq piniarneq.
Takornariaqartitsinermik inerisaanissamut periarfissaqarpoq, pingaartumik sermersuarmik itiviillutik paasisassarsiorlutik amerliartuinnartut immikkut isiginiarlugit, taakkumi tassunga tikittarmata.
Attaveqaasersuutit
Helistop nunaqarfiup avannaani inissisimavoq. Assartuinermut umiarsualivimmiit aqquteqarpoq, taanna innaallagissiorfimmut, imeqarfimmut, allaffimmut, illumik sullissivimmut, atuarfimmut, iliveqarfimmut aamma ikuallaavimmut attaveqaataavoq.
Inoqarfik umiarsualivimmi innaallagissiorfimmik innaallagissamik pilersugaavoq.
Innaallagissiorfiup piffissami pilersaarusiorfiusumi allilerneqarnissaa pisariaqarsimanngilaq.
Imermik pilersuineq nunaqarfiup avannaani tatsimit, erngup aqqutaatigut aamma ukiumi imermut tanki 1.400 m3-imit imertarfigineqarsinnaasumit pivoq. Taseq imeqarfiusoq pallitsaalillugu killeqarfeqartinneqarpoq.
Imikoorut qasertoq nunamut kuutsinneqarqarpoq. Eqqakkanut anartarfilerinermilu aaqqissuussaqarpoq inissalimmik eqqaavittalimmillu.
Eqqakkat pisortanit eqqagassalerinermik ataatsimut aaqqissuussamut ilaatillugit passunneqartassapput, inoqarfimmi eqqakkat poortorneqariarlutik Nuummut ikuallaavimmut assartorneqartassallutik.