Eriagisariaqakkanut ilaapput niuertut illorisimasaat kiisallu kuup akuaniittut nunaminertat. Paamiuni sanaartukkat qanganisaanerit inissisimaffii ilisarnaataalu tunuliaqutaralugit illut ilusaannut immikkoortunut pingasunut avinneqarput:
- Umiarsualivimmi quersuit tunisassiorfiillu talittarfimmut ataneqartut (B-15, B-30, B-54, B-56, B-61, B-63 aamma B-68).
- Niuertarfiup illui siulliit tassaapput handelip illuutai pisiniarfillu siulleq kuup kujataatungaaniittut
- portunersaaqqamiittut (B-7, B-10, B-17, B-19, B-38, B-55 aamma B-106)
- Avinngarusimasortaa, tassaniillutik oqaluffik, ilagiit illuat aamma palasip illua kiisalu nammineq illuliat ataasiakkaat(B-83, B-307, B-85, B-86 aamma B-406)
Taakku saniatigut illut ataasiakkaat eriagineqartariaqartutut toqqarneqarsimapput: B-93, B-94, B-95, B-96, B-401 aamma B-402.
Illut eriagisariallit eqqissisimatitallu Paamiuni Illoqarfinni Sungaartumik Nalunaarsukkani allaaserineqarput. (LINK)
Paamiut illoqarfiata nunataanut nunap assiliortoqarnissaa kissaatigineqarpoq.
Tassunga atatillugu siunnersuutigineqarpoq Paamiuni illut eriagisassat arlallit eriagineqarnissaannut tunngavissaarussimasut eriagisassaajunnaarsinnissaat. Taamaaliornikkut illoqarfiup qanganisartaani katersugaasiviullu eqqaa eriagineqartussatut suliarineqarnerat qitiutinneqarsinnaapput.
Illoqarfitoqqap katersugaasiviullu eqqaa oqaluttuarisaanikkut qitiutinneqarnerata nukittorsarnissaa suli kissaatigineqarpoq. Illut allatut atorneqarnissaat paasiniarneqassaaq, taamaalilluni aserfallatsaaliorneqarlutillu avatangiisit soqutiginartuunissaat anguniarneqassaaq, taamalu illoqarfimmi innuttaasunut tikeraartunullu orniginarsarneqarlutik.
Suliat arlallit aallartinneqareerput, B-15 naneruusiorfitoqaq assassortartunut sanaluttartunut sannavinngorsimalluni. Aamma tamaani saqqummersitsisarfimmik, cafemik naapittarfimmillu pilersitsisoqarnissaa pilersaarutaavoq.
Innuttaasut politikerillu akornanni illoqarfiup illuliortaatsikkut, oqaluttuarisaanermi kingornussat avatangiisinillu naleqartitsineq pillugit oqaloqatigiinnissaanni Paamiut illoqarfiata assinga tunngaviliissaaq. Isumaliutersuutinik saqqummiinertut atorneqassaaq, Paamiuni, aammalu Arsummi, Ivittuuni Kangilinnguanilu suut oqaluttuassartaanersut, sanaartukkatigut kingornussani takutinneqarnersut, qanorlu ililluta pitsaanerpaamik ingerlateqqinnissai qulakkiissanerivut. Peqatigitillugu illoqarfiup assinga kommunimi eriagisassanik atorunnaarsitsinissamut ineriartortitsinermi sakkussatut atuuffeqartinneqassaaq.
Illoqarfiit assinganni aamma illoqarfiit ilusaat, illoqarfiit illullu ilisarnaataat takutinneqassapput, aammalu nunap immikkoortuani tamaani illut eqqissisimatitaasut eriagisarialittullu tammatsaalisaasut allattorsimaffiannik imaqassallutik. Tassani pineqarlutik illuutit ataasiakkaat eriagisariaqarnerannut ilisarnaataat, ilisarnaataasalu eqqissisimatitaanerannut imaluunniit eriagisarialittut allanngutsaalisassatut nalunaarsugaanerannut pissutaasut, sukkasuumik isiginnaarlugit.
Pingaartuuvoq sumiiffimmi oqaluttuarisaanermi, kuturikkullu kingornussatigut sanaartukkanik eqqissisimatitsineq allanngutsaaliuinerlu pillugit tikkuussinissaq. Taamaattumik allanngutsaaliuineq sakkuussaaq kalaallisut ataatsimut, sumiiffiillu kulturikkut oqaluttuarisaanermi kinaassutsimik ersersitsisuullutillu nukittorsaataanissaat. Tassungalu atatillugu inissiat sorliit, qanoq sumillu peqquteqartumik ingerlateqqinneqassanersut isumaliutigilluartariaqarpoq, inissiat ilaannaat ikiariissitaartullu oqaluttuassartaat kisimik siunissami qularnaarneqannginniassammata.