Nuup illoqarfiata ilaa arlalinnik nunaminertaqarpoq immikkut eriagisassaasunik (§ 2-mi nunaminertat, Namminersornerullutik Oqartussat nalunaarusiaat "Nuuk - illut aamma illoqarfiup immikkoortui eriagisariallit" 1990), taakkunannga ilaat innarlitsaaligaallutik (eqqissisimatitaallutik). Tamatuma kingunerisaanik qulakkeerneqassaaq, nunaminertat illoqartut, nunaminertaqartut il.il. oqaluttuarisaanermi iluatinnaataat siunissamut pigiinnarneqartussaallutik. Tamakkunani eqqarsaatigineqarput Saqqarliit eqqaat (1), Nuutoqaq (2) aamma Tasersuaq (Aqqaluks Plads) (3). Taakku saniatigut Quassunnguaq (4), Naalakkap Qaqqaa (5), Qaqortoq (6) aamma Avannarliit (7) nunaminertatut immikkut eriagisassatut toqqarneqarsimapput, taamaattorli innatsitsaalisanut (eqqissisimatitanut) (§ 3-mi nunaminertat) ilaatinneqaratik.
Nunaminertanut eriagisassanut aalajangersakkat pingaarnerit sumiiffinni illuutit eqqissisimatitaasut eriagisassaasullu nassuiaateqarfigaat.
Nuummi eriagisatut eqqissisimatitatullu isigineqartut tamarmik Nuuk Illoqarfiup assinganiipput.
Linki: Nuummi illoqarfiup assinga
Nuummi illut immikkoortullu eriagisariaqartut taamaallaat tassaapput sanaartukkat 1970 sioqqullugu sanaartorneqarsimasut.1970-ip kingorna Nuuk annertoorujussuarmik ineriartorpoq. Ineriartornermut tassunga atasumik illut nutaat sanaartorneqarput, ullumikkut illoqarfiup ilusilersorneqarnerani immikkoortuusut pingaarutillit. Pingaarnertut pineqarput illut sanaartukkallu ilutsitik imaluunniit inissisimaffitsik pissutigalugit Nuummi ilisarnaatitut imaluunniit naleqqatut atuuttut.
Illoqarfiup pisoqartaata aamma najukkami oqaluttuarisaanerup nutaajunerusup katersuutsinneqarneranut pitsaanerusumillu ersersitsinneqarnissaannut siunertaqarluni misissuinermik suliamik aallartitsinissaq kissaatiginarpoq ilaatigut eqqissisimatitaasussanik nutaanik aamma/imaluunniit eriagisariaqartunik nutaatut tikkuarneqarsinnaasunik innersuussutinik suliaqartoqarsinnaaqqullugu. Taakkua illunut aamma illoqarfiup immikkoortortaanut aamma sanaartukkanut nutaajunerusunut pingaarutilinnullu eqqissisimatitaasunut nallersuunneqassapput.
Immikkoortuni arlalinni eriagisariaqartuni pilersaarutinik peqarpoq, taakkununnga ilaallutik:
- Nuup Saava (linki)
- Aqqaluup Aneerasaartarfia (linki)
- Noorliit (linki)
Pilersaarutit pillugit ataatsimut anguniagaq tassaavoq, kulturikkut oqaluttuarisaanermi naleqartinneqartut pingaarutillit attatiinnarneqarnissaasa qulakkeerneqarnissaat, ersarissarneqarnissaat aallaavittullu atoqqinneqarnissaat. Tamanna atuinikkut pissaaq. Taamaalilluni pilersaarutini kulturikkut oqaluttuarisaanermi naleqartinneqartutut toqqarneqarneqartut oqaluttuarisaaneq ataqqillugu pitsaasumik ineriartortinneqassapput.