Nuup illoqarfiata qanittortaata 31%-ia sanaartorfiunngilaq, timaatalu nunataa ilanngukkaanni illoqarfiup killinganit Nuup 75 %-ia sanaartorfiunani. Tamanna maluginiagassaalluarpoq, pingaartumik illoqarfiit pingaarnersaat eqqarsaatigingaanni.
Naak taamaakkaluartoq Nuummi illoqarfiup sukkasuumik ineriartornerata sanaartorfiunngitsut sukisaarsaartarfiillu tatisimavai. Taamaammat kommunimut pilersaarummi annertuumik ukkatariniarneqarpoq illoqarfiup pinngortitallu akornanni oqimaaqatigiissumik pissuseqartoqarnissaata qulakkeernissaa, taamaalilluni Nuuk illoqarfiit pingaarnersaattut - illoqarfissuartut pinngortitamiittutut qorsuusutut kajuminnartutullu nittarsaattuaannarneqarniassammat. Sissaq qaqqallu tikinneqariaannanngorlugit nunami misigisassat ersarissuutinnissaannik kommunimut pilersaarummi najoqqutaq attatiinnarneqarpoq. Illoqarfiup eqqaani sanaartorfiunngitsut sukisaarsaartarfiillu pinngortitamik kulturimillu misigisaqarnissamik periarfissiissapput, ataatsimoornissamut inissaqartitsilluni, timikkut aalanissamut periarfissaqarluni eqqissisimalluni minnerunngitsumillu inuulluarfiunissaata pingaassusaa inissaqartinneqarluni periarfissaaniassammat.
Sukisaarsaartarfiunera tassaavoq sineriaata sanaartorfiunngitsup ataqatigiissinnissaa, qorsoqarfiit imaanullu aqqutit ataqatigiinnissaat, pinngortitamit illoqarfiup qeqqanut attaveqarlutik illoqarfiullu timaanut ataneqarlutik. Sumiiffiit aqqusineeqqanik atassuteqarput kikkunnut tamanut sukisaarsaartarfinnut nunaminertanut attaveqartitsillutik. Taakku pilersaarusiorfimmi piffissami nukittorsarneqassapput.
Nuup qorsoqarfii illoqarfiup ilaasa minnerit ungusimavaat illoqarfimmi qaqqajunnat qaqqallu minnerit atuarlugit aggulussimallutik, sineriammut, illoqarfimmi illoqannginnersanut, iliveqarfinnut aqqusineeqqanullu ataneqarlutik. Sumiiffiit taakku ataasiakkaarlutik tamarmik immikkut ilisarnaateqarput illoqarfimmi pinngortitaallutik, pilersaarutaanngitsumik akunniliussat kiisalu sammisassanut immikkoortunut soorlu sisorartarfiullutik. Sumiiffinnut ataatsimoorussaavoq illoqarfiup immikkoortuani pinngortitamut qanittumik illoqarfiup ilaanniinnerminni pissuseqarlutik.
Attaviit tungujortut tassaapput tatsit, kuuit kussinerillu sialummit aputillu aattulilerneranut atatillugu pingaarutilipilussuit.
Kussinerit aasakkut naaffigineqakkajuttarput, illoqarfiullu sukisaarsaartarfiinut aqqutinut ilanngutissallugit ilippanaateqarluarput.
Siunissaq ungasinnerusoq isigalugu Siorarsiorfimmik inerisaanermi Kangerluarsunnguani sukisaarsaartarfinnik periarfissaqalissaaq sammisassaqarfiulissalluni soorlu sisorarnerit, hesternerit, nunakkut pisunnerit, mountainbikernerit il.il. Kangerluarsunnguanut attaveqalernikkut kangerluk ammaanneqassaaq timaanut aqquteqalerluni umiatsiaqqaanngikkaluarlunilu ornissinnaanissai ajornannginnerulissallutik. Peqatigitillugu nunaqarfik Kapisillit kangerlullu Sermilik aamma siunissami ataqatigiissusilerneqarsinnaapput.
Nuuk assigiinngitsunik illoqannginnersaqarpoq, assigiinngitsunik angissusillit assigiinngitsunillu atorneqarlutillu misiginartut. Illoqarfiup qeqqani illoqarfimmi inuit assigiinngitsuutitaarnerannik ersersitsissaaq tamanullu sammisassaqartitsissalluni aamma tamanut sammisunik. Illoqannginnersat pitsaasuussapput, toqqissisimanarlutik illoqarfiullu ilisarnaataanut ilaallutik. Illoqarfiup illoqannginnersaani aamma utaqqiissaagallartunik sammisassaqartitsisoqarsinnaavoq.
Siunissami illoqarfimmik alliliinermi allanngortiterinermilu illoqannginnersat nutaat ilanngunnissaat ilusilersornissaallu pingaarput, taamaalillutik sumiiffinnut naleqqussarlugillu taakkununnga ilanngullugit pilersaarusiorfigineqarniassammata. Illoqannginnersat sanaartukkanut, aqqusinernut qallersuinernut, naatitsivigineqarnerannut, atortuinut qullilersornerannullu ataatsimut ilanngullugit eqqarsaatigalugit ilusilersorneqassapput. Minnerunngitsumik illoqannginnersat sanaartukkallu illoqannginnersat eqqaanniittut inuit isiginiarnerullugit ilusilersorneqassapput.
Inissiat nutaat tamarmik pilersaarusiornermi periusissiami anguniangaassapput taakkua tamarmik nunaminertamut sukisaarsarfiusinnaasumut matumit 300 meterinik ungasissuseqartinnissaat.
Sukisaarsaartarfiit siunissami annerpaamik nuannaarutaajumaqqullugit sukisaarsaartarfiit ukioq kaajallallugu atorneqarsinnaanngorlugit pilersaarusiorneqassapput. Tassa illoqannginnersami aasaanerani ukiuuneranilu kiisalu upernalernerani ukialerneranilu atuinerit sammisassaqartitsinerillu isiginiarneqassapput.
Taakku saniatigut illoqannginnersat illoqarfiup immikkoortuani sila eqqarsaatigalugu taakkununnga tulluuttumik aaqqissuunneqassapput ilorrisimaarnarnerat annertusarniarlugu. Sila eqqarsaatigalugu pissutsit isiginiarneqartussat pingaarnerit tassaapput seqineq, anorip sammivia, aputaajaasarneq, siallertarnerani anorlertarneranilu kiisalu kiattarnera.
Qullilersuinikkut qularnaarneqassaaq ullup taarsinerani illoqannginnersap toqqissisimanartutut misigisarnissaa. Toqqissisimaneq ukiuunerani immikkut pingaaruteqarpoq, illoqannginnersarlu unnulersukkut unnukkullu uninngaarfigineqarnissaa kajuminnartuussappat.
Siunissami pilersaarusiornermi nunaminertamillu atuinermi illoqarfimmi qorsoqarfiit timaanilu nunap sunnertianera immikkut isiginiarneqassapput. Nuummi naasut arriitsumik naajartortarput sivikitsumillu sammisassaqartitsiniarnerilluunniit naasunut sivisuumik sunniuteqartarlutik.
Nuummi amerlasoorpassuarnik killingusaamut, immamut, kangerlummut qaqqanullu nasiffeqarpoq. Isikkiviit taama ittut qulakkeerniarlugit portusuunik isikkivinnik taakkuninnga assiinnginnissaat pisariaqarpoq. Isikkiviit pingaarutillit illoqarfiup pinngortitallu atanerannik attaveqartitsisarput.