2024-mi januaarip qaammataani Kapisilinni innuttaasut 41-t najugaqarput. Innuttaasut amerlassusaat ukiuni kingullerni appariartuinnarsimapput. 2004-mi januaarip qaammataani innuttaasut 91-iusimapput. Ukiuni kingullerni 20-ni amerlanerpaaffigalugu. Ukioqatigiikkuutaani tamani innuttaasut ikiliartorput, ukioqanngitsuniilli tallimanut ukiullit aamma 65-it sinnerlugit ukiullit kisimik aalaakkaallutik.
Kapisilinnili takornariaqarnerup tungaatigut malugineqarluarsinnaasumik siuariartorsimavoq. Pilersaarusiatut ingerlanneqartussami ineriartornerup ingerlaannarnissaa naatsorsuutigineqarpoq, aamma patajaatsunik najoqqutassaqarnissaq tunngavigalugu pilersaarusiortoqassaaq.
Pilersaarusiatut ingerlanneqartussami Kapisillit qorsooqqissutut ataavartumik najugaqarfigissallugu takornariaqarfissatullu ataatsimut pilersaarusiorfigineqarnissaa qitiutinneqassaaq.
Immikkoortut ataatsimoorussat
Kapisilinni sumiiffiit ataatsimoorfiusut marluupput. Sumiiffik siulleq umiarsualiviup eqqaani nunaqarfiup qeqqani nunaminertami ammasumiippoq. Nunaminertap eqqaaniipput Pilersuisoq, napparsimmaveeraq, illu sullivik, atuarfik, meeqqerivik, qatserutaasivik il. il. Inoqarfiup qiterpasissuata kujataatungaaniipput oqaluffik toqusullu inaat, katersortarfik aamma meeqqerivik.
Inissiaqarfiit
Inissiat 44-t missaanniipput. Kapisilinni inissiat tassaanerupput ilaqutariinnut ataasiakkaanut illut.
Nunaqarfimmi najugaqavissut nutserput – annerusumik Nuummut – inissiallu sunngiffimmi illunngortinneqartarput. Nunaqarfiup inuttussutsimigut ineriartornera tunngavigalugu kommunalbestyrelsimit nalilerneqarpoq Kapisilinni nunaminertanik nutaanik inissianut siunertalinnut atugassiisoqarnissaa pisariaqanngitsoq.
Allanngutsaaliuisitsinermi soqutigisat
Allanngutsaaliugassatut soqutigisat isumannaarniarlugit aalajangersaasoqarsimavoq illut eriagisassat ingutserneqartassanngitsut aamma illut titartarneqaqqaarnerat sannaallu qajassuunneqartassasut.
Illut tullinnguuttut allanngutsaaliugaapput:
B-108
B-109 (Pilersuisoq)
B-269 (Oqaluffik)
Nunaminertat sukisaarsaartarfiit
Kapisillit Nuup Kangerluata aggulunnerata qinnguani nuummi inissisimavoq. Qaqqaq Pingu inoqarfiup kujataatungaani takussaavoq, sissarlu anginngitsoq nuuata avannamut kangianiilluni.
Kapisilinniit 1 km-imik kangimukaraanni Nuussuaq tikinneqassaaq, tassaniipporlu sunngiffimmi illuaraqarfik.
Kapisiliuttaaq eqqaani Namminersorlutik Oqartussaniit soqutigineqarluni illersorneqartussaasumik immikkuullarissumik kapisileqarfeqarpoq.
Inoqarfiup qeqqata avannaatungaaniippoq nunaminertaq ammasoq taannalu Kapisilinni katersuuffiuvoq. Immikkoortoq ullumikkut containerinut eqqagassanullu ilioraavittut atorneqartarpoq. Immikkoortoq pilerinarsarniarlugu kommunimut pilersaarummi ikuallaaviup akiani nunaminertamik ilioraavissamik immikkoortitsisoqassaaq.
Inoqarfik marlunnik kikkunnilluunniit atorneqarsinnaasunik pinnguartarfeqarpoq, qaqqallu qaani nunataq manissuinnaq arsaattarfittut atorneqarpoq.
Inuussutissarsiuteqarfiit
Kapisillit takornariartarfissatut ineriartortinneqarnissaa kissaataallunilu periarfissaqarluarpoq, Nuummi innuttaasut nunanilu tamalaaneersut ornigarluartarpaat. Kapisilik aalisagaq kiisalu ungasinngisaani kangerluup qinnguani sermeq iigartartoq sumiiffimmut malunniuteqarluarsinnaapput.
Kangerliumarngup kitaani Neriunaq nunalerinermut atugassamik nunataqartitsisoqarpoq. Ullumikkut savaateqarfeqarpoq, taannalu inerititassanik assigisaannillu naatitsinissamut ataavartumik allilerneqarniartussaavoq. Kapisillit aamma Neriunap akornanni ATV-nut aqqusiortoqarnissaa pilersaarutaavoq tamatumalu saniatigut inoqarfimmi savaatilinnit pilersorneqartussamik toqqaviliortoqarnissaa pilersaarutaavoq.
Asip pilersaarusiorneranut atatillugu immikkoortumi nunalerinerup ineriartortinnissaanut iluaqutaasussamik nunalerinermi nunaminertanik allanik Kapisillit eqqaanni peqartitsisoqartussaavoq.
Attaveqaasersuutit
Kapisillit tikissagaanni annerusumik umiatsiaq atorlugu tikitassaapput. Inoqarfik Nuummiit sapaatip akunnerata ingerlanerani arlaleriarlugu imaatigut angallassinikkut tikinneqartarpoq. Tamatuma saniatigut angallassisartut namminersortut Nuup Kapisillillu akornanni sapaatip akunneranut aalajangersimasumik angallassinissamik neqerooruteqartarput, takornarialerinikkut periarfissaqarluarnera tamatuma takutiinnarpaa.
Assartuinikkut pitsaanerusumik periarfissaqarnissaq qulakkeerniarlugu, qulimiguulimmut mittarfimmut nunaminertamik inniminniisoqarpoq, kisianni sanaartortoqarnissaanik ullumikkut pilersaaruteqartoqanngilaq.
Kapisillit inoqarfik qorsooqqissutut piujuartitsisutullu ataatsimut pilersaarusiornerata ilaattut kangerluup qinnguani sermeq iigartartup tungaanut pisuffissaq nalunaaqutsersorneqassasoq ilaatigut suliarineqassaaq.
Matumanittaaq Nuummiit Kapisilinnut aqqusinissaq aqqutaani unnuisarfeqartoq pisuffissatut atorneqarsinnaasoq isummerfigineqartussaavoq.
Pilersaarusiatut ingerlanneqartussami nukissiuutinik allatigut piujuartumillu pilersuisinnaasunik pilersitsinissamut periarfissat misissorneqassapput. Atorluarsinnaanera minnerunngitsumillu eqqaani suliassat eqqarsaatigalugit pissusissamisoortumik inissinneqassaaq.