Nuuk inuussutissarsiorneq eqqarsaatigalugu assortugassaanngitsumik Kalaallit Nunaanni qitiuvoq nunaminertallu inuussutissarsiuteqarfiusut suli piumalluarneqarput. Pingaartumik inuussutissarsiutinut oqimaannerusunut assartuinermut, sanaartornermut assassornermullu tunngasunut, kisianni aamma nunaminertat allaffissornermut, sullissinermut inuussutissarsiutinullu annikinnerusunut siunertalinnut tunngasut. Takornariaqarnerup ineriartortinneqarneranut nunaminertat aamma pisariaqartinneqaraluttuinnarput kiisalu inuussutissanik nioqqutissiornermut nunaminertat.
Pisariaqartinneqartut assigiinngiiaartut naammassiniarlugit Nuummi nunaminertat inuussutissarsiuteqarfiusut arlalitsigut ineriartortillugit sulissutigineqarput:
- Nunaminertat allaffissornermut, sullissinermut aamma inuussutissarsiutinut annikinnerusunut siunertalinnut atugassat immikkoortuni qiterisaqarfiusuni ataatsimoortinneqarput.
- Pilersuinermut, assartuinermut, suliffissuarnut assassornerullu iluani suliffeqarfinnut nunaminertat inuussutissarsiutinut nunaminertatut
- Tapiliullugu Siorarsiorfimmi aamma Kuanninnguani inuussutissarsiornikkut ineriartortitsinermut piffissakkuutaartunik sanaartorfissanik atugassiisoqarpoq.
Tamatuma saniatigut kommunimut pilersaarummi inissiaqarfinni inuussutissarsiutit annikinnerusut pilersinneqarnissaat ammaanneqarpoq.
Linki: Aalajangersakkat nalinginnaasut - Inissiaqarfiit
Piffissami pilersaarusiorfiusumi inuussutissarsiuteqarfiit ataatsimoortinneqarnissaat suli pingaartinneqarpoq.
Qeqertani inuussutissarsiornermut umiarsualivittaami aamma Pukuffimmi inuussutissarsiuteqarfioreersoq kiisalu pineqaatissinneqarsimasunut inissiisarfiup avannaata tungaani immikkoortumiit inuussutissarsiuteqarfinnut nunaminertat aallaaveqartinneqarput. Inuussutissarsiuteqarnermut nunaminertaliussat Nuummi inuussutissarsiutit oqimaannerusut inuussutissarsiutinullu tunngasut ataatsimoortunngortinneqarnerisut atuuffeqassapput.
Piffissami pilersaarusiorfiusumi kingullermi nunaminertat inuussutissarsiornermut atugassanngortinneqartut nutaat arlallit inuussutissarsiuteqarfiusumi atugassanngortinneqareerput, taakkulu suli atorneqarsinnaapput. Aamma inuussutissarsiortunut atorneqartussanik siunissaq ungasinnerusoq isigalugu piffissakkuutaartumik ineriartorfiusussatut atorneqartussanik atugassiisoqarpoq.
Golfertarfik ullumikkut inuussutissarsiorfiup qeqqani inissisimavoq siunissamilu nuunneqartussaavoq. Illoqarfiup ilassaani Siorarsiorfimmi nunaminertamik sukisaarsarnermut atugassamik atugassiisoqarpoq taannalu golfertarfimmik nutaamik pilersitsinissamut periarfissaavoq. Nunaminertaq ullumikkut golfertarfittut atugassanngortinneqartoq kingorna inuussutissarsiutinut nunaminertanngortinneqassaaq inuussutissarsiuteqarfik pitsanngorsarniarlugu.
Inuussutissarsiutinut umiarsualivimmik nutaamik inerisaaneq aallartereerpoq pingaarutilittullu suli suliniuteqarfigineqassaaq Qeqertat siunissami nunniorneqarneratigut nunaminertat inuussutissarsiorfiusussat arlallit qulakkeerneqarlutillu inuussutissarsiorfiit ataqatigiisinniarneqarnerannut iluaqutaassaaq.
Nuummi Imarpik Qulaallugu timmisartoqarfissap nutaap atulerneratigut avataanit tikeraartartussat amerlinissaat naatsorsuutigineqarpoq. Kommunimut pilersaarut takornariaqarnermik ineriartortitsinermut ikorfartuutaassaaq aamma nunaminertat arlallit takornariaqarnermut attuumassuteqartunut atugassanngortinneqareerput taakkununnga akunnittarfinnut nunaminertat ilaapput.
Illoqarfimmut tikeraanut pissutsit aamma pitsanngorsaaffigineqassapput umiarsuarnut takornariartaatinut talittarfeqartitsinikkut, perusuersartarfiit tamanit atorneqarsinnaasut amerlinerisigut, takornarianut bussit illoqarfimmi unittarfiinik amerlanerusunik pilersitsinikkut il.il.
Kangerluit nunallu ornitassanik ineriartortitsinermi ilanngullugit eqqarsaatigineqassapput. Nunarsuarmi kangerluit qinngortunersaat pigaarput aamma Nuummi feeriarneq asimi feeriarnernut, pisuttuarnernut, aalisarnernut, piniarnernut, sisorarnernut, qaqqasiornernut, Sermersualiarnernut il.il. ilanngussinnaavarput.
Piffissami pilersaarusiorfiusumi ilaatigut containerit atorlugit Nuummi inuussutissanik nioqqutissiornermut nunaminertanik atugassiisoqarnissaanut pisariaqartitsineq atugassiinissarlu erseqqinnerusumik misissuiffigineqassaaq.
Illoqarfiup Kuanninnguit tungaannut allilernissaa kommunimut pilersaarummi periarfissaalersinneqassaaq, inuussutissarsiortunut kiisalu qitiusoqarfinnik atorneqartussanik arlalinnik siunissamut isigaluni atungassiisoqarneratigut.
Piffissami pilersaarusiorfiusumi alliliinissamut ataatsimut pilersaarusiortoqassaaq, immikkoortumi attanneqarsinnaasunik ineriartortitsinissaq qulakkeerniarlugu.
Illoqarfimmik alliliinermi sukisaarsaartarfinnut attaviit, matumanilu sisoraatinik ujakkaartarfiit aquuteralaallu aqqutaat kiisalu Kuanninnguanut timaanullu pisuttuartarfiit qularnaarneqarlutik patajaallisarneqassapput.
