Nuummi ukiorpaalunni kingullerni amerlasuunik inissialiortoqarnikuuvoq, inuiaqatigiilli katitigaanerisa allanngoriartornerat pingaartumillu Nuummi innuttaasut amerliartupiloornerat pillugu nutaanik inissialiornissamut nunaminertat piumaneqaqaat.
Kommunimi pilersaarummi illoqarfimmi pioreersup Qinngutta allilerneratigut aamma Siorarsiorfimmi eqiterititsinissamut allanngortiterinissamullu periarfissat ilaapput. Eqiterinermi inissiaqarfioreersuni nunaminertaareersunik atorluaanerunissaq pineqarpoq, inuussutissarsiuteqarfiit pingaarnerit pisoqaanerillu qiterisaqarfinngortinnerisigut. Ataatsimut isigalugu inissiat pioreersut nutarterneqarnissaat illoqarfiullu immikkoortuini tamani ullutsinnut naleqquttunik inissialiornissaq pilersaarusiorneqarpoq. Inissiat ilusii angissusiilu assigiinngisitaartut siammasissullu sanaartortoqarsinnaanerat periarfissaatinneqarpoq. Kommunimut pilersaarummiipputtaaq illoqarfiup qeqqani eqiterisitsinermi periarfissatut illorsuarnut portusuunut najoqqutassat.
Kommuneqarfik Sermersuumut Inissiat pillugit pilersaarutip suliarineqartup inissianik qanorpiaq pisariaqartitsisoqarneranik tunngaviliisuussaaq, innuttaasut agguataarneqarnerat aningaasaqarnerlu eqqarsaatigalugit.
Qinngutta ineriartortinneqarnera maanna ukiorpaalunni ingerlanneqalereerpoq. Ullumikkut illoqarfiup immikkoortuatut ingerlalluartutut tunngavissat pilersinneqareersimapput inissiat, atuarfik aamma inuussutissanik nioqquteqarfiit arlallit.
Ineriartortitsinermi immikkoortup nunatamigut ilusaanik attassiinnarnissaq ersarissaanissarlu, sanaartukkat ataatsimoortut aamma nunap sanaartorfigineqanngitsup paarlakaajaanerisigut, pingaartinneqarpoq. Sanaartukkat akornanni aqqusineeqqat sumiiffinnik attaveqaasersuisuussapput. Sanaartugassat ataatsimut isigalugit annertuumik eqitigaassapput aamma portussutsimikkut assigiinngisitaarlutik illuliat marlunnik quleriit arfinilinnillu quleriillit suliarineqassapput.
Illoqarfiup immikkoortuani sanaartugassat kingulliit piffissami pilersaarusiorfiusumi matumani sanaartorneqassasut naatsorsuutigineqarput tamatuma kingorna eqiterinermik siunertaa ingerlanneqalissaaq.
Siorarsiorfik
Illoqarfiup ilaanut Siorarsiorfimmut ineriartortitsinissamut pilersaarutit anguniakkallu Kommunalbestyrelsimit 2017-imi akuersissutigineqarput.
Siorarsiorfimmilu ineriartortitsiffissatut takorluukkat
piujuartussatut ineriartortinnissaat, sumiiffimmi nunap ilusaa malillugu, nuna malunnartunngortillugu, pinngortitamiinnera orniginarneralu. Illoqarfiup immikkoortortaani nunap isikkua illoqarfillu atalissapput, sammisassat nunamiinnissarlu inissaqartinneqarlutik tassani toqqissisimasumik inuuneq, ataatsimoorneq atugarissaarnerlu atorlugit, eqimattakkaanut najugaqalersunut nutaanut Nuummut Issittumi illoqarfiit pingaarnersaannut nuuttunut inuunerup pitsaassusaanik pilersitsissalluni.
Siorarsiorfimmi illoqarfiup immikkoortuani nutaami ilaatigut atuarfik nutaaq, meeqqeriviit nutaat taamatullu inuussutissarsiorfiit, kiffartuussinerit sunngiffimmilu sukisaarsarfissat pilersinneqarniarput. Tamakkua saniatigut
attaveqaatinik annertuumik sanaartortoqassaaq, tassaassallutik sullorsuaq imaluunniit Qinngutsinnit sissaq sinerlugu nunami aqqusinniaq, sissaq sinerlugu aqqusineeraq, teknikkikkut pilersuutit assigiinngitsut kiisalu illoqarfimmi illoqannginnersaq ataatsimoorussaq il.il.
Illoqarfiup inerisarnissaanut aqutsinermut atugassatut ilusilersugassamik ilusilersuinermut, atortunik toqqaanermut il.il. illoqarfiup ilaanik nutaamik pilersitsinissamut atatillugu piumasaqaatinik aamma siunertanik nassuiaasunik ilusilersuinermi najoqqutassamik suliarinnittoqarpoq.
Linki: Siorarsiorfik Ilusilersuinermi najoqqutassaq
Ukiuni kingullerni illoqarfimmi inuussutissarsiuteqarfiit arlallit qitiusoqarfinngortillugit allanngortiteriffigineqarput. Tamanna pivoq ilaatigut inuussutissarsiornermut periusissiaq tunngavigalugu, tassani ataqatigiissumik inuussutissarsiuteqarfinnik peqarnissaa siunniunneqarmat, umiarsualiviup nutaap mittarfittaassallu akornanni, aappaattullu illoqarfiup qeqqa pitsaanerulersinneqassalluni. Kingulleq eqqarsaatigalugu illoqarfik uummaarissoq aamma pineqarpoq, sulineq najugaqarnissarlu inissaqartinneqarlutik. Allanngortiterinissamik assersuutitut taaneqarsinnaavoq Nuukullak, tamaani inuussutissarsiuteqarfiit mingutsitsisuunngitsut inissialiallu pilersinneqarnissaat periarfissaritinneqarluni.
Tujuuk illoqarfiup qeqqani qitiusoqarfiuvoq, allanngortiterinerlu inissianik nutaanik sanaartornermik ingerlatsiuffioreerluni. Tamaani inuusuttunut inissiat arlallit aamma pilersaarutigineqarput. Aqqusinersuarmi qiterisaqarfik ungasinnerusoq isigalugu aamma allanngortiteriffigineqarnissaa periarfissaqarpoq.
Nuup qeqqani atuarfissuup Atuarfik Inussuup atulersinneqarneratigut ilaatigut Atuarfik Samuel Kleinschmidt (ASK) aamma Atuarfik Ukaliusaq matuneqartussaapput, taakkua siunertanut allanut atorneqartussanngorlugit allanngortiterneqassapput. Tamanna aamma Atuarfiusimasumut Qorsussuarmut atuuppoq.
Eqiterineq
Piffissami pilersaarusiorfissami nunaminertanik eqiterinissaq suli pisariaqartinneqassaaq. Taamatut ineriartortitsineq aallartinneqareerpoq, illoqarfiup qeqqani sumiiffinni arlalinni inissialiat annertuut ingerlanneqaramik, taakkununnga Tuujuk, Qullilerfik aamma Kissarneqqortuunnguit ilaapput.
Sumiiffiit suli pilersaarusiorfigineqarsinnaasut ukuusut taaneqarpoq:
- Iiminaq (ilaqutariinnut ataatsinut illut)
- Nigerleq (ilaqutariinnut ataatsinut illut)
- Niels Hammekenip Aqqutaa (ilaqutariinnut ataatsinut illut)
- Manngua (inissiat eqimasunik-pukkitsullu)
- Siaqqinneq (inissiat eqimasut pukkitsut)
- Nuffiumaneq Kangia (inissiat eqimasut pukkitsut)
Aammattaaq pinngortitamut ajoqutaanngitsunik eqiterisitsinermut tapertaasumik suliniutinik ataasiakkaanik ingerlaavartumik suliaqartoqartassaaq.
Kommunimut pilersaarummi illorsuit portusuut illoqarfiup qeqqani Imaneq atuarlugu illoqarfiullu ilaa oqaluttuassartalik atuarlugu eqiteruffiusinnaasutut saqqummiunneqarput.
Nuup ilisarnaatigivaa nunataata pukkitsuunera amerlanngitsunillu portusuunik illorsuaqarnera. Pingaartumik illoqarfiup qeqqa pukkitsunik 1-5-inik quleriilinnik sanaartorfigineqarnera attatiinnarneqarpoq.
Illoqarfiup qeqqani illut portusuut ileqqoq malillugu illuupput illoqarfimmut immikkut pingaaruteqartut, assersuutigalugu oqaluffiit aamma inuussutissarsiornermut allaffissornermullu Imaneq atuarlugu illut, taakkununnga Namminersorlutik Oqartussat illorsuat aamma Tusass-ip illorsua ilaapput.
Illorsuit portusuut sumiiffimmut immikkut ittumut atuuffimmulluunniit immikkut ittumut nalunaaqutsiisinnaanermigut pingaaruteqarsinnaapput. Illorsuaq portusooq sumiiffinniit assigiinngitsorpassuarniit takuneqarsinnaavoq, taamaalillunilu sumiiffimmi inuit naapittarfissaattut nalunaaqutaasinnaavoq. Illorsuarli portusooq eqqaani immikkoortunut aamma annertuumik sunniuteqarsinnaavoq, ilaatigut alanngortannguuttunut anorillu sunniineranut tunngatillugu.
Illorsuaq portusooq 5-it sinnerlugit quleriilik sanaartukkatut taaneqartarpoq, inissianut, allaffeqarfinnut akunnittarfinnut assigisaannulluunniit atorsinnaasoq.
Sanaartukkat portussuseq taanna qaangerlugu portussuseqartut taamaallaat immikkoortuni illorsuarnut portusuunut immikkoortinneqartuni inissinneqarsinnaapput aamma aalajangersakkat nalinginnaasut ataanni malittareqquneqartunik malinnittussaapput.
Linki: Aalajangersakkat nalinginnaasut - Illorsuaq portusuuliaq
Ukiuni kingullerni Nuummi inissiaqarfiit arlallit nutaanik ilaatigullu sukannernerusunik malittarisassaliuunneqarput. Tamatumani ilaatigut siunertarineqarpoq sumiiffiit ilisarnaataat taakkulu pilerinarsarlugit ineriartortittuarneqarnissaat. Angissutsimut tunngatillugu Saqqarliit eqqarsaatigalugit aalajangersakkanik sukaterisoqarpoq, Kangillinnguillu eqqarsaatigalugit alliliisoqarsinnaanera periarfissaalerpoq.
Siunissaq eqqarsaatigalugu inissiaqarfinnut pioreersunut pilersaarummut tunngavik ingerlaavartumik nutarterneqartassaaq.