Nuuk inuttusiartornermigut illoqarfiuvoq ineriartortupilussuaq Januaarimi 2024-mi Nuuk 19.872-inik inoqarpoq.
Illoqarfiup annertusiffissaa annertooq suli Qinngutta kujataata tungaanut pissasoq aamma illoqarfiup ilassaanut Siorarsiorfimmut, sullorsuarmik atassuserlugu, pilersaarutigineqarpoq.
Illoqarfiup allisinnaanera Kuanninnguit tungaannut periarfissaqarsimavoq, tamaani pingaartumik inuussutissarsiorfittut siunertat ingerlanneqarput. Siunissamili Kuanninnguit illoqarfiup qanittuani sukisaarsarfittut attatiinnarneqassaaq aamma timaanut aqqutitut.
Aamma Nuummi eqikkartinneqarsinnaasut aamma illoqarfimmik allannguiffiusinnaasut suli periarfissaapput. Ineriartorneq taanna ingerlallualereerpoq, illoqarfiup qeqqani inissialiortoqarlunilu sanaartortoqarmat soorlu atuarfissuaq nutaaq Atuarfik Inussuk.
Illoqarfiup alliartornera ilutigalugu immikkoortut assigiinngitsut arlallit ineriartortinneqarnissaat pisariaqarpoq.
Inuttusiartuinnarneq soorunami inissianik amerlanerusunik pisariaqartitsilersitsivoq malitsigisaanillu pisortat sullissivii aamma ineriartortitassaapput, taakkununnga atuarfiit, ulluunerani paaqqinnittarfiit, utoqqaat isumassorneqarneri/illui, angerlarsimaffeqanngitsut, nutaamik iliveqarfiliorneq, toqusut timaannik ikuallaasarfimmik pilersitsinissaq il.il. ilaapput.
Nunaminertat inuussutissarsiuteqarfiit allat Nuummi suli pisariaqartinneqarput. Tamanna pillugu inuussutissarsiuteqarfiit ataqatigiissaagaanerat pitsaanerulersinneqarlunilu annertusarneqassaaq.
Illoqarfiup alliartornerani biilit amerliartornerat aamma illoqarfiup attaveqaasersuutaanik annertuumik pitsanngorsaasoqarnissaanik piumasaqaatitaqarpoq.
Peqatigisaanik illoqarfiup alliartortinnerani nunaminertat sukisaarsarfiusut annikilliartorput. Taamaattumik kommunimut pilersaarummi illoqarfimmi nunaminertat sukisaarsarfiusut ersarinnerulersinnissaat pitsanngorsarneqarnissaallu annertuumik pingaartinneqarpoq.
