Nuummi angallanneq ukiuni kingullerni nalinginnaasumik annertusiartorsimavoq, nuuttartut amerlisimapput aamma illoqarfiup avataatungai ineriartupiloorfiusimapput.
Nuummi innuttaasut agguaqatigiissillugit amerlassusii malillugit biilit ukiumut amerliartornerat qaffakkiartuinnarpoq, tamannalu angallannerup aaqqissugaaneranut artukkiineruleriartorpoq.
1 januar 2023 aallarnerfigalugu qamutit motoorillit 5.030-t nalunaarsorneqarsimapput. 2021-mi kingullermik kisitsisoqarneranit 12 %-imik amerleriarnerupput. Taakku saniatigut angallanneq 2021-mi kingullermik angallaffiunerpaami Eqalugalinnguit eqqaanni kisitsisoqarneranit angallanneq 7%-imik annertusisimavoq, illoqarfimmilu ataatsimut angallannerulerneq 8 %-imik qaffariarsimalluni.
Illoqarfimmi aqqusinerni angalaarnerup annertusiartornera ilutigalugu Nuummi illoqarfiup qeqqata eqqissisimatinneqarnissaanut pisariaqartitsineq qaffakkiartorpoq, taamaattumik illoqarfiup qeqqanik pilersaarusiornermi pisuinnarnut atugassarititaasut annermik eqqarsaatigalugit pilersaarusiortoqarnerussaaq.
Taamaattumik attaveqaasersuutit suliarilluarsimasut Nuummi inuussutissarsiutit ineriartornerannut aalajangiisuulluinnarput. Nunaminertat inuussutissarsiorfiit nutaat kiisalu Imarpik qulaallugu mittarfissarsuup attaveqaasersuutit pitsaanerit pisariaqarnerulersissavaat, angallannerit annerit isumagisinnaajumallugit.
Siorarsiorfiup aamma Kuanninnguit tungaanut alliliilluni sanaartorneq illoqarfimmi suli annerusumik angallannermik pilersitsissaaq aamma taamaattumik attaveqaasersuutit allilernissaannut piumasaqaatitaqarluni. Illoqarfiup ilaa Siorarsiorfik sullorsualiornikkut illoqarfiup sinneranut atassuserneqassaaq. Nuussuarmut sullorsualiap allilerneratigut aamma illoqarfiup qeqqanut ataasiinnarmik aqquteqarnermik oqilisaataassaaq.
Angallannermi atugassarititaasut pitsanngorsarniarlugit suliniutinik pingaarutilinnik ingerlatsisoqareerpoq, tamanna ukiuni aggersuni nanginneqassaaq.
Nuummi pisuinnarnut assigisaannullu aqqusinermi atugassaritinneqartut pitsaanerulersinneqarnissaat Kommunalbestyrelsimit assut pingaartinneqarpoq aamma pisunneq sikkilernerluunniit kajuminnarnerulersinneqarnissaat.
Piffissami tullermi pilersaarusiorfiusussami Nuummi pisuinnarnut sikkilinullu aqqutit pitsaanerulersinneqarnissaat sulissutigineqassaaq. Pisuinnarnut sikkilertunullu aqqutit ataqatigiissarneqarnissaasa qulakkeerneqarnissaa siunnerfeqarluni sulissutigineqarnissaa qitiutillugu pingaartinneqatpoq, aqqusineeqqat pioreersut imminnut atassusernerisigut.
Tassunga ilanngullugu illoqarfiup qeqqani pisuinnaat sikkilertullu aqqutaat pioreersut pitsanngorsarneqassapput.
Majuartarfiit tamanit atorneqarsinnaasut, pisuinnaat nunakkut maniitsutigut ingerlanermikkut aqqusaarsinnaasaat, pitsaanerulersinneqassapput taakku kommunip kissaataa malillugu tikikkuminassuseqarnissamut naapertuuttunngortinneqassammata.
Bussit angalaarfii pitsaasumik aaqqissuussaasut aqqutigalugit Nuummi angallanneq pitsaasumik ataqatigiinneqarpoq. Taamaattoq immikkoortuni ataasiakkaani bussit unittarfii minutsini 10-ni pisoqqaarluni tikinneqarsinnaapput.
Inissiaqarfinnik nutaanik pilersitsiortorneq ilutigalugu bussinik attaveqaatit ingerlaarfioreersullu annertusineqassapput.
Immikkoortunik nutaanik pilersaarusiornermi nuttarasuarsinnaaneq pingaartumillu mingutsitsinngitsumik siusissukkut eqqarsaatigineqartassaaq, mingutsitsinnginnerusumik angallassinnaaneq qulakkeerniarlugu kajungernarnerulersikkusullugulu.