Nunalerinermi pineqartut tassaapput:
- Nuuk
- Kapisillit
- Qeqertarsuatsiaat
Nuuk Kommuneqarfik Sermersuumi suli qitiusutut inissisimavoq, innuttaasullu suli amerliartuinnarlutik.
Nuuttaani 20.000-t missaat najugaqarput.
Ukiuni kingullerni nunanut tamalaanut attaveqaasersuutit pillugit aalajangiisoqarpoq mittarfissat nutaat pillugit, illoqarfimmut illoqarfiullu ineriartortinnissaanut pingaarnertut periusissiornermut pingaaruteqarluinnartumik.
Taassuma sanitigut illoqarfiit pingaarnersaat pillugu Periusissiaq nutaaq suliarineqarpoq Nuup nunamut tamarmut illoqarfiit pingaarnersaattut inissisimaneranik pitsaanerulersitsisussaq.
Nuummi illoqarfimmik ineriartortitsinissamut naatsorsuutigineqartumut pilersaarusiorneq taamaalilluni patajaatsuussaaq attanneqarsinnaallunilu. Patajaatsuutitsineq isumaqarpoq, illoqarfimmik ineriartortitsinermi avataani pisut Imarpik qulaallugu mittarfik nutaaq, takornariaqarneq aamma aatsitassarsiornermik inerisaaneq illoqarfimmi suliassaqarnerulersitsisinnaasut eqqarsaatigineqassasut. Attanneqarsinnaasoq ima isumaqarpoq, Nuup immikkut pitsaassusiinik ass. illoqarfiup immikkoortui nutaat aamma immikkoortunik pioreersunik eqiterutsitsineruneq aqqutigalugit siuarsaanikkut patajaallisaanikkullu illoqarfik illersorneqarsinnaasumik ineriartortinneqassasoq.
Ukiuni kingullerni Kapsillit inukilliartuinnavissimavoq, akerlianilli takornariaqarnerup iluani annertuumik ineriartorfiusimalluni. Taamatut ineriartortoqarnera piffissami aggersumi pilersaarusiorfiusumi ingerlaannassasoq naatsorsuutigineqarpoq, tamannalu pilersaarusiornermi pitsaasumik tunngavissiorneqarluni ingerlanneqassaaq.
Manna tikillugu Qeqertarsuatsiaat pillugit pilersaarusiortarneq killeqarsimavoq, naatsorsuutigineqarporli nunaqarfimmi takornariaqarnerup iluani ineriartortitsinermik soqutiginninneq annertusiartuinnassasoq. Nunaqarfik ingerlalluarpoq kiffartuussinerlu pitsaassusilimmik qaffasissuseqarpoq. Ineriartortitsinissamut periarfissat ineriartorteqqinneqarnissaat aamma periarfissaalluarpoq.
Nunap immikkoortuani tassani inoqarfiit mikinerusut sukumiinerusumik immikkoortuni Kapisillit aamma Qeqertarsuatsiaat ataanni allaaserineqarput.
