Suliniuteqarfiit ilaat tassaavoq kommunimi sanaartornermi piujuartitsinerup nukissiuuteqarnermilu piujuartitsinerup siuarsarnissaat. Sermersooq tassaassaaq Kalaallit Nunaanni piujuartitsinermik tunngaveqarluni sanaartornermik qaffassaaqataasoq, piujuartitsineq pillugu misissuinernik ingerlatitseqqiinernillu tapertaasoq, sanaartornermik suliassaqarfiup piujuartitsinermut nikikkiartuaarneranut ikiuussinnaaqqullugu.
2022-mi sanaartugaq siulleq piujuartitsinissamut uppernarsaatilik sanaartorneqarpoq, aamma nunatsinni piujuartitsinissamut uppernarsaatiliinermik suliaq aallartinneqarpoq.
Sanaartornerup iluani piujuartitsinermut nikinniarnermi pingaartinneqassaaq sanaartukkat silap pissusianut naleqqunnerusut, tassunga ilanngullugu sanaartukkat sivisuumik atasinnaassusillit qaffasissumik pitsaassusillit kiisalu illut nukissamik nukissiuutinillu atorluaasinnaasut, taamaaliornikkut CO2-mik aniatitsineq millisinneqarsinnaaqqullugu.
Sanaartorneq kaaviiaartitsisutut paasineqassaaq, aamma atortussat avatangiisinut paasissutissartaasa eqqornerusut ineriartortinnerat siuarsarneqassapput. Taassuma nassataraa, atortussat sumi aamma qanoq suliarineqartarnersut aamma ulloq taanna sanaartukkat isaterneqarfissaanni qanoq iliortoqassanersoq ilisimasariaqarpavut. Sanaartornermi atortut atoqqinneqartassapput aamma sanaartornermit igitat annikillisinneqassapput, pingaartumik inoqarfinni atortut allani atoqqitassanngorlugit nassiunnissaannut killilimmik periarfissaqartuni.
Sanaartukkani kukkunerit amigaatillu ikilisinneqassapput, taamaattut akuttunngitsumik sanaartukkamut ataatsimut isiginnittaatsimik annertuumik sunniuteqartarmata.
Sanaartukkamik nutaamik eqqarsartoqalinnginnerani atoqqiisinnaaneq allanngortitsisinnaanerlu siullertut isumaliutigineqartassapput. Taamaaliornikkut aamma kulturikkut kingornussarsiaq inoqarfiullu oqaluttuassartaa qulakkeerneqassapput.
Sermersuumi 2023-mut Pilersaarusiornermi periusissiami anguniarneqarpoq, inissiaqarfinni nutaani tamani sanaartorfissat 25%-ii piujuartitsinermik sanaartornermut atugassiissutigineqassapput.
Taassuma saniatigut kommunimut pilersaarummi Nuummi inissiaqarfissaq misileraalluni sanaartorfiussaaq, piujuartitsilluni sanaartornermik ilisimasat siuarsarniarsinnaaqqullugit.
