Kommuneqarfik Sermersuumi attanneqarsinnaasumik ineriartortoqarnissaa, tassunga ilanngullugit innuttaasut inuunerinik pitsanngorsaanissaq, pinngortitami pisuussutit illersorneqarnissaat, aamma aningaasaqarneq patajaatsoq qulakkeerniarlugit qaffasissunik anguniagaqartoqarpoq. Akisussaassusilimmik illoqarfiup ineriartortinneratigut kommunimit ineriartortitsinikkut aamma avatangiisitigut attassisinnaanerup oqimaaqatigiissinneqarnissaa kissaatigineqarpoq, massakkut aamma kinguaariinnut tulliuttunut iluaqutaasussamik.
FN-ip nunarsuarmi anguniagai tassunga sinaakkusiussatut atuupput aamma oqaatsinik ataatsimoorussanik atugaqarnissamut qulakkeerinneqataapput, soorluttaaq kommunimi sulinermi naleqqatut kivitsisutullu atuuffeqartussaapput.
Nunarsuarmi anguniakkat Pilersaarutini atorneqartarput kommunip suliniutai aaqqissuussaasumik uuttortarneqarsinnaaqqullugit. Tassani nunarsuarmi anguniakkat allanut erseqqissaatigineqarput. Taamaattoq pingaaruteqarpoq erseqqissaatigissallugu, nunarsuarmi anguniakkat imminnut ataqatigiissaartuunerat aamma imminnut pinngitsoorsinnaannginnerat ineriartornermik imminut piujuartitsinermik tunngaveqartumik periaaseqarluni tamakkiisumik eqqarsartaaseqarnissaq pilersikkumallugu. Taamaattumik suliassaqarfimmi ataatsimi iliuuserisat suliassaqarfinnut arlalinnut pitsaasumik sunniuteqarsinnaapput.
FN-ip nunarsuarmut anguniagai 11-t, illoqarfinnik sumiiffinnilu inuiaqatigiinnik piujuartitsisunut tunngasut soorunami qitiupput kisianni uagut pilersaarusiortarnerput aamma nunarsuarmi anguniakkanut allanut sunniuteqartarpoq, soorlu peqqissuseq atugarissaarnerlu, suliffiit pitsaasut aningaasaqarnikkullu annertusaaneq, ilinniakkat pitsaassusillit aamma arnat angutillu akornanni naligiissitaanermut tunngasut. Kommune kisimiilluni nunarsuarmi anguniakkanik naammassinnissinnaanngilaq, taamaattumik nunarsuarmi anguniakkat "17. Suleqatigiinnikkut anguniakkat" aalajangiisuulluinnartumik atuuffeqarput. Matumani pingaaruteqarpoq piujuartitsinermik tunngaveqarluni aaqqiissutissanik nassaarniarnermi piviusunngortitsinermilu innuttaasut aamma pisortat kiisalu namminersortut suleqatigiinnerisa pitsanngorsarnissaat.
Kommunimut pilersaarummi suliniuteqarfissat tamakkiisut kiisalu aalajangersimasut nunarsuarmi anguniakkanut attuumassuteqalersinnissaat Kommuneqarfik Sermersuumi piujuartitsinermik tunngaveqarluni ineriartornermik qulakkeerinnissinnaajumalluni.
