Kommuneqarfik Sermersuumi angallannermut politikki kommunalbestyrelsimit ulloq 12.03.2024-mi akuersissutigineqarpoq.
Nuummut angallannermi politikki Kommuneqarfik Sermersuup siunissami angallannermut pilersaarusiornissaanut atugassatut siunertaavoq, taannalu pingasunik qitiutinneqartunik immikkoortuligaassaaq;
- Angallaffigiuminassuseq
- Isumannaassuseq
- Illoqarfimmi inissaqarluassuseq
Ataatsimoortillugit Sermersuumi periusissaliornermi aamma aqqusinikkut angallannermi attaveqaasersuutiliornermi suliniutinut iliuusissanullu pilersaarusiornermi tunngaviussapput, suliniuterpassuillu taakku pingasut tamakkerlugit attuumassuteqarfigissallugit.
Innuttaasut pingaartumik Nuummi amerliartorneranni illoqarfimmullu nutsernerulerneranni kommunimi ullumikkut siunissamilu pisariaqartitat naapertuuttut angallannermut aaqqiissutit pitsaasut atuutsilernissaat aalajangiisuulluinnartuussapput. Aammali kommunimi inoqarfinni allani aqqusinikkut angallannermi ajornartorsiuteqartoqarpoq, taamaattumik qitiutinneqartut pingasut aamma sumiiffinni taakkunani sukumiisumik aaqqiissutissarsiornermi aallaavigineqassapput.
Qitiutitat pingasuusut ima paasisariaqarput:
Inoqarfik pitsaasuussappat aqqusernit angallaffiulluarsinnaasut piginissaat aalajangiisuussaaq. Angallannerup sukkanerusumik pitsaasumillu pinissaa qulakkeerniarlugu angallattut unittoortarnerat annikillisinnaavarput, angallannermi piffissat atorneqartut pitsanngorsarsinnaavagut innuttaasunullu tamanut angallavigiuminarsaalluta. Tamanna ulluinnarni ingerlaartarnermut oqilisaataaginnarnavianngilaq aningaasaqarnikkulli siuariartorneq piujuartitsisumillu ineriartornermut siuarsaataassaaq.
Angallannermi politikkimi isumannaallisaaneq pingaartinneqarnerpaajuvoq. Iliuusissanik atuutilersitsinikkut ilaatigut ajutoorutaasinnaasunik annikillisaanikkut aamma pisuinnaat biilertullu pillugit toqqissisimanartuutitsinikkut angallanneq isumannaatsoq toqqissisimanartorlu pilersissinnaavarput. Matumani ilaatinneqarput aqqusinerni allagartat, qullilersuineq, pisuinnaat ikaarfissaat, aqqusineeqqat aamma ukiukkut aputaajaasarneq kiisalu angallannermik ilinniartitsinerup, sukkassutsinut killigititat angallannermullu malittarisassat malinneqarnissaannik eqqumaffiginninnerit.
Inoqarfimmik uummaarissumik pilerinartumillu pilersitsiniarutta illoqarfimmi inissaqarluarnissaa aalajangiisuussaaq. Illoqarfimmi inissaqarluassuseq biilinik inissiivissanuinnaq kisimi atorneqannginnissaa aammali sammisassaqartitsinermut atorneqarsinnaanera qulakkeerniarlugu aqqusinikkut angallannerup pilersaarusiorneqarnissaa pingaartuuvoq. Inuit toqqissisimanissaannut sumiiffinnilu atuerusunnerulernissaat pillugu illoqarfimmi inissaqarluassuseq qulakkeerneqassaaq, pisuinnarnut aqqutissanik, sukisaarsaarfissanut aqqutissanik aamma kikkunnilluunniit ornigarneqarsinnaasunik naapiffiusinnaasunillu periarfissaqarluartitsinerulissaagut. Tamanna innuttaasut inuunerannut pitsanngorsaataassaaq avataaniillumi tikeraartutsinnut misigisaqarfiulluassalluni.
Angallannermi allannguutit
Sermersuumi angallannermut politikki Angallannermik nalunaarsuineq 2021-mik aamma Angallannermik nalunaarsuineq 2023-mik tunngaveqarput.
Linki: Angallannermut politikki
