Illoqarfiup umiarsualiviata inuussutissarsiorfiillu eqqaa qooroq atuarlugu ilaatigut teknikkeqarfiuvoq, imeqarfik innaallagissiorfillu tassaniillutik, ilaatigullu illoqarfiup kitaatungaa, umiarsualiveeraq tassani inissisimalluni.
Ittoqqortoormiini umiarsualivik talittarfiuvoq imarlu ikkappallaarmat umiatsiaaqqanut angallateeqqanullu taamaallaat atorneqarsinnaalluni. Illoqarfiup kitaaniippoq umiarsualiveeraq umiatsiat singinneqarsinnaallutik kranimillu amuneqarsinnaallutik. Tassunga uiggiullugu immikkoortumik nutaamik atungassiisoqarpoq, tassani annermik talittarfiliortoqarsinnaassalluni.
Illoqarfimmi ineriartortitsinissamut periarfissat ilaatigut inuussutissarsiornikkut ilippanaatinik tunngaveqarpoq, aammali takornariaqarnermut periarfissat, illoqarfiup avinngarusimasumiinnera immikkuullarinneralu tunngavigalugit. Takornariaqarnikkut ilippanaatit pingaarnertut tunngavigaat:
- Nunami Eqqissisimatitami Scoresbysundimilu sakkortuumik takornariaqartitsinermut attuumassuteqarput.
- Misigisassarsiorluni takornariartitsineq, illoqarfimmut najugaqarfinnullu eqqaaniittunut qanganisaanerusunut attuumassuteqarpoq, soorluttaaq Nunamut Eqqissisimatitamut, Scoresbysundimut aamma 'Jørn Riel Land'-imut.
Inuussutissarsiornikkut ilippanaatit ukununnga attuumassuteqarput:
- Aalisarnermik piniarnermillu inuussutissarsiorneq, matumanilu tunisassiorfimmik ammaaqqinneq kiisalu Arctic Green Food pillugu isumamik pitsaanermik atorluaaneq.
- Aatsitassarsiorneq, matumanilu pingaarnertut ilaatigut molybdænimik piiaavimmik aallartitseqqinneq
- Sumiiffimmut avinngarusimasumut tassunga inuussutissarsiutit allat ilaasut, matumanilu sumiiffimmi tassani ilisimatusarfissamik pilersitsineq
Takornariaqarnermut inuussutissarsiornikkullu ilippanaatit qulaajarneqassapput pitsaanerpaamillu atorluarneqarlutik. Taamaammat ineriartornerit naatsorsuutiginngisat ingerlaavartumik nakkutigineqassapput - pingaartumik nutaamik mittarfiliorneq eqqarsaatigalugu. Ilutigitillugu aamma qularnaarneqassaaq ilippanaatit najugaqartunut sapinngisamik annerpaamik iluaqutigineqarlutik atorneqarnissaat – assersuutigalugu najukkami sulisut tunitsiviit ingerlatsiviillu atorlugit.