Ittoqqortoormiit Nunatsinni inoqarfinnit allanit avinngarusimanerpaalluni inissisimavoq.
Illoqarfik nunarsuarmi kangerloqarfiit anginersaata, Kangersuttuaq (Scoresby Sund) paavani inissisimavoq, kangerluaqqat ilanngullugit 38.000km2-sut isorartutigisumiilluni. Kangerluk Tunumi kangerlunnit allaaneruvoq, kangerluup paava ukioq kaajallallugu sikusannginnami. Sumiiffiup isikkua tassanilu uumassusillit atugaat immikkuullaripput, taamaalilluni imaani uumasut tassani immikkut takussaanerullutik.
Ittoqqortoormiit eqqaata nunataa maniilaavoq, sumiiffinnilu arlalinni qaqqat kangerluup sinaanit attaveqarlutik. Staunings Alper2500 meteringajaapput.
Ittoqqortoormiit Kalaallit Nunaanni Nunami Eqqissisimatitami inissisimavoq, tassungalu isaaffittut isigineqarluni. Nuna eqqissisimatitaq uumasoqarluarpoq, nunallu tamalaat ilisimasassarsiortuinut tamanna pingaaruteqarluni. Alapernaarsuisut SIRIUS Danmarkip tamaani oqartussaaffianik attassisuupput Nunamilu eqqissisimatitami kisiartaallutik aalaakkaasumik najugaqarlutik.
Ittoqqortoormiit Nunallu Eqqissisimatitap akornanni pitsaanerusunik attaveqaatilersuinikkut periarfissaqartoqarsinnaavoq, taamaalillutik ilisimatusartut, pisuttuarlutillu takornariat allallumi Nuna Eqqissisimatitaq orninnerani illoqarfik aqqusaartassammassuk.
Januaarimi 2024-mi Ittoqqortoormiini innuttaasut 363-iupput. Innutaasut amerlassusaat ukiuni kingullerni appariartuinnarsimapput. 2006-imi innuttaasut 539-iusimapput. Innuttaasuni ukioqatigiiaat tamarmik ikiliartorsimapput 65+-inik ukiullit minillugit, taakku amerliartorsimapput.
