Immikkoortortat sanaartorfigineqartussaanngitsuni ilaatinneqarput annertuumik ivigartorfissatut immikkoortinneqartut, immikkoortortat atorneqartussaanngitsut aamma inuilaarsuaq. Taakku sanaartorfiunngitsuunera imaluunniit atortulersuutinik sanaartorfigineqarsimannginnera annikitsumik sanaartorfiusarnera ilisarnaatigisarpaat.
Sanaartorfioqqusaanngitsumi sanaartorneqarsinnaasut tassaapput piniartunut illuaqqat aamma sapernusunut illuaqqat kiisalu oqquiffiit nasiffiillu, tassa immikkoortumut pingaarnertut atuiffiusumut allanngortitsinngippata. Immikkoortunut sanaartorfiunngitsuni utaqqiisaasumik asiartarfiit pilersinneqarsinnaapput.
Immikkoortut atorneqanngitsut tassaatinneqarput nunaannarmi suulluunniit suliat 5 km-erisut ungasitsigisumiittut, inuilaarsuarlu tassaatinneqarluni pinngortitaq attorneqanngitsoq nunaannarmi sanaartorfiunngitsumit 5 km-erinit ungasinnermiittut. Suliarineqarsimasoq tassaasinnaavoq:
- Inoqarfiit
- Sunngiffimmi illuaqqanut aamma aasarsiortarfinnut immikkoortut
- Immikkoortut qasuersertarfittut atorneqartut
- Sumiiffiit nunalerinermut, naatsiivilerinermut uumasuuteqarnermullu atorneqartussat
- Immikkoortut teknikkeqarfiusut aamma attaveqaateqarfiusut
Inuinnaat aqqutaat aamma aqqutaasartut annikinnerusut suliarineqarsimasutut isigineqartanngillat.
Immikkoortut O-it ukununnga immikkoortinneqarsinnaapput:
O2: Annertuumik ivigartorfiit
Annertuumik ivigartorfiit uumasuutinut killeqarfiutinneqarput, soorlu savat, tuttut, hiistit, nersussuit assigisaalu, aamma nunaminertamik atuinertaa eqqarsaatigalugu immikkoortutut sanaartorfiunngitsutut immikkoortup ilaanik pingaarnermik allannguinngitsoq.
Sanaartukkat
Immikkoortuni O-ni sanaartukkat utaqqiisaasumillu sanaartukkat makku pilersinneqarsinnaapput:
- Ilisimatusarfiit
- Piniartunut annanniarfissatullu illuaqqat
- Oqquiffiit nasiffiillu
- Utaqqiisaasumik asiartarfiit
Ilisimatusarfiit ima paasineqassaaq suliaqarfik pilersinneqartoq ilisimatusarfimmiillu imaluunniit allamut tunngasumik ilisimatusarnermik suliaqarfiusumit akuerisaasumit ingerlanneqartoq. Ilisimatusarfiup matuneqarneratigut ilisimatusarnermik ingerlatsinermik sulialimmut allamut tunniunneqassaaq imaluunniit nunaminertamik atugassiissummik piginnittuusumit peerneqassalluni. Immikkoortoq O-mi ilisimatusarfik takornarialerisunut namminerisamilluunniit siunertanut atugassianngortinneqarsinnaanngilaq.
Piniartunut sapernusunullu illuaqqat tassaapput tamanit atorneqarsinnaasut. Piniartut sapernusullu illuaraat parnaarneqassanngillat inuillu ataasiakkaat pigissanngilaat. Illuaqqat tamakku amerlanertigut kommunimit kattuffinnilluunniit pilersinneqarsimasarput. Piniartunut sapernusunullu illuaqqat A-nr-nik silataanni allagartaqassapput. Taakku annerpaamik 12,5 m2-iussapput ataatsimik etageaqarlutik.
Oqquiffiit nasittarfiillu tassaatinneqarput sanaartukkat minnerit tamanit atorneqarsinnaasut. Taakku annerpaamik toqqavimmikkut 12,5 m2-eriussapput.
Sanaartugassanik kikkunnit tamanit atorneqarsinnaasunik sanaartornissami nunaminertamik atuinissamut akuersissut pisariaqarpoq. Kikkulluunniit oqquisarfigisinnaasaannut nasittarfigisinnaasaannut nunaminertamik atuinissamut akuersissummik pissarsiniaraanni sanaartugassap ingerlanneqarnissaa aserfallatsaalinissaalu nassuiaasersorneqassasoq pisariaqarpoq kiisalu isaterneqassappat isaternissaanut pilersaarut.
Tammaarsimaarfiit
Tammaarsimaartarfiit piffissami sivikitsumi nunaminertamik atugassinneqartut aallaavittut atajuartussaanngitsunik takornariaqarnermi misigisassarsiornermut atortunik pilersitsisinnaapput, assersuutigalugu tupeqarfimmik, tupernut narsaamanernik, piffissami killilikkami oqquiffimmik aamma inissiivinnik. Illuaraqarefik ataavartussamik illuliorfigeqqusaanngilaq. Utaqqiisaasumik ukiut tallimat tikillugit nunaminertamik atugassinneqarnissamik qinnuteqartoqarsinnaavoq. Nunaminertamik utaqqiisaasumik atugassiineq ukiuni tallimani atuuttarpoq, piffissallu qaangiutilernerani qinnuteqaatigineqaqqissinnaalluni. Tammaarsimaarfimmik pilersitsiniaraanni cvr.nr imaluunniit inuussutissarsiuteqarnermut uppernarsaammik allamik peqarnissaq pisariaqarpoq.
Qinnuteqartup sumiiffik O-mi inissiiffissaq nammineq toqqassavaa. Kisianni sumiiffiup inuilaatut pissusia attatiinnarneqassaaq. Inissiiffissatut qinnuteqaatigineqartumi utaqqiisaasumik nunaminertamik atuinissamik
akuersissuteqartoqarsinnaaneranut erseqqissumik nalilersuisoqartassaaq.
Nunaminertamik atugassinneqartoq illunik atajuartussanik periarfissinneqarusukkuni, tammaarsimaarfik immikkoortoq L-itut immikkoortunngortinnissaanik qinnuteqarsinnaavoq. Pilersaarusiornermut inatsimmi §45a naapertorlugu immikkoortup immikkoortutut naliliiffigeqqinnissaa pilersaarutitut qinnutigineqassaaq, aamma politikerinut oqaluuserisassanngortinneqassaaq.
Tammaarsimaarfeqarfiit inunnut kiisalu suliffeqarfinnut namminersortunut atugassiaapput, nunaminertamilli piginnittuusoq kisimiilluni takornarialerinermi suliffeqarfimmik takornarialerinermullu tunngassuteqartumik unnuisarfimmik immikkoortumi pilersitsisinnaatitaavoq.
Suliffeqarfiit ataasiakkaat sumiiffimmik atuinerat taamaatippat, nunamik saligaatsuutitsineq pisariaqarpallu pilersitseqqinneq naasulersueqqinnerlu isumagissavaat aningaasartuutigalugulu. Suliffeqafiup tamanna nammineerluni isumaginngippagu Kommuneqarfik Sermersooq suliassamik suliarinnittussatut pisinnaatippoq, tamannalu suliffeqarfimmut akiligassanngortinneqassaaq.
Ungasissutsimut piumasaqaatit
Immikkoortoq O-mi tammaarsimaarfiit asimi attaveqaasersuutinit, illuaraqarfinnit, immikkoortunit inuussutissarsiornermut atorneqartunit imaluunniit teknikkikkut atortuusivinnit assersuutigalugu erngup nukinganik nukissiuutinit assigisaannilluunniit qaninnerpaamik 5 km-imik ungasissuseqassapput. Taaguut "teknikkikkut atortuusiviit" matumani aqqutiliani, aqqusineeqqani imaluunniit aalajangersimasumik aqqusinniaq attaveqaasersuutitut taaneqarnissaanut attuumassuteqanngilaq. Tammaarsimaarfiit imminnut 10 km-nik ungasissuseqassapput, inuilaarsuartut taaneqarsinnaanera attatiinnarniarlugu.
Sanaartukkat suulluunniit kuunnit tatsiniillu qaninnerpaamik 100 meterinit ungasissuseqassapput.
Sanaartukkat suulluunniit qanganitsanit eriagisanit qaninnerpaamik 60 meterinik ungasissuseqassapput. Qanganitsat eriagisat tassaasinnaapput noorliit illukui, illukoqarfiit assigisaallu.
Angallanneq
Aallaavittut talittarfinnut ikaartarfiit, aqqusineeqqat, assakaasullit ingerlavii aqqusernilluunniit sananeqarsinnaanngillat taakku takornariaqarnermik siuarsaanermut, inuussutissarsiutinut tunngasunik imaluunniit illoqarfiup qanittuani timaani sukisaarsaartarfittut atorneqarnianngippata.
Pilersuineq
Teknikkikkut pilersuinermut atortulersuutit taamaallaat pilersinneqarsinnaapput illuaqqamut ataatsimut ataneqartillugit immikkoortut mikisuuppata. Assersuutigalugu sarfaliutinik, seqinermut tigooraassutinik nukissiornermilu atortunik allanik sanasoqarsinnaavoq.