Immikkoortut nunalerinermut, naatsiiveqarnermut uumasuuteqarnermullu atugassiat ilisarnaatigaat uumasuuteqarnermut, nunalerinermut, naatsiiveqarnermut, orpeqarnermut, qeqertanut qimmilivinnut il.il. ataneqartunut pigaarnertut atorneqartussatut ataatsimut ilisarnaatigaat.
Killilimmik
annertussusilimmik sananeqarsinnaasut tassaapput illuaqqat piniariartarfiit oqqittarfiillu, taakkulu ima amerlassuseqassanngillat sumiiffiit allanngutsaaliugaasutut pissuseqarnerannik allanngortitsissallutik.
Immikkoortut M-it ukununnga immikkoortinneqassapput:
M1: Nunalerineq aamma uumasuuteqarneq
Immikkoortut nunalerinermut atugassat tassaapput, uumasuuteqarfiusut aammalu naatitanik inerititanillu allanik naatitsiffiusut. Illut, nunalerinermut tunngasut tamaani sananeqarsinnaapput, assersuutigalugu naatitsiviit, maskiinanut assigisaannullu inissiiffissat.
Immikkoortuni M1-ini inuussutissarsiuteqarnermut ingerlatsinermut atatillugu ukioq kaajallallugu inissialertoqarsinnaavoq 1,5 etagealimmik, sumiiffimmi suliffeqarfiup taanna ingerlallugu aatsaat najugaqarfigippagu. Ukioq kaajallallugu najugaqarfiit A-nr-nik silataani allagartaqassapput.
Immikkoortuni M1-ini nunalerinermut nunaminertaatillit nunalerinermik ingerlatsinermut ilassutitut takornarianut illuaqqanik sanaartorsinnaallutillu ingerlatsisinnaapput. Taakku toqqavimmikkut annerpaamik 50m2iussapput 1,5 etageqarlutik. Takornarianut illuaqqanut tunngatillugu illuaqqat inuussutissarsiutitut atorneqarsinnaasut imaluunniit attartortinneqarsinnaasutut paasineqassapput. Attartortitsisarneq takornarianuusinnaallunilu innuttaasunuusinnaavoq. Takornarianut illuaqqanut qinnuteqartoq CVR-nr.-qaqqaassaaq. Takornarianut illuaqqat illuaqqallu attartortakka illup iigaani ersarissumik B-normoqassapput.
M2: Aalisakkanik pisanillu suliarinninneq
Immikkoortunut aalisakkanik pisanillu nioqqutissiornermi suliaqarfissatut atugassanik tassunga atasunik sanaartortoqarsinnaavoq, assersuutigalugu panersaaviit, pujooriviit, amernik suliarinnittarfiit minnerit assigisaallu.
Immikkoortuni M2-ni inuussutissarsiornermut ingerlatsinermut atatillugu ukioq kaajallallugu inissialertoqarsinnaavoq 1,5 etageallit sumiiffimmi suliffeqarfiup taanna ingerlallugu aatsaat najugaqarfigippagu. Ukioq kaajallallugu najugaqarfiit A-nr-nik silataani allagartaqassapput.
M3: Qeqertat qimminik qimatsiviit
Immikkoortuni qeqertani qimminik qimatsivinni ilioraavinnut qimmit isumaginissaannut/pilersornissaannut attuumassuteqartunik mikisunik taamaallaat sanaartortoqarsinnaavoq.
Sanaartukkat atortuusiviillu tamarmik avatangiisinut pisariaqanngitsumik avaanngunarsaasutut isikkoqartikkumanagit aserfallatsaaliorneqartassapput.
Ungasissutsimut piumasaqaatit
Uumasuuteqarnermut nunalerinermullu aamma naatsiivilerinermut immikkoortuni illulianut atuuttoq tassaavoq, illuliat tamaasa akornanni qaninnerpaamik 60 meterimik ungasissuseqassallutik.
Nunalerineq, savaateqarneq allatullu immikkoortumi inuussutissarsiuteqarneq illuaqqanut pioreersunut 100 m-nik ataqqinnittumik ungasissuseqassapput.
Sanaartukkat suulluunniit kuunnit tatsiniillu qaninnerpaamik 100 meterinit ungasissuseqassapput.
Sanaartukkat suulluunniit qanganitsanit eriagisanit qaninnerpaamik 60 meterinik ungasissuseqassapput. Qanganitsat eriagisat tassaasinnaapput noorliit illukui, illukoqarfiit assigisaallu.
Angallanneq
Immikkoortuni nunalerinermut, naatsiiveqarnermut uumasuuteqarnermullu suliaqarfinni talittarfimmik ikaartarfiliortoqarsinnaavoq imaluunniit tamaani umiarsualivimmik sanasoqarsinnaalluni.
Immikkoortuni taakkunani illuliassanut allanullu nunaminertamik annertuumik atuisoqartillugu aqqusinniortoqarsinnaavoq, qamutinut aqqutissiortoqarsinnaalluni inuinnarnulluunniit aqqusiortoqarsinnaalluni.
Pilersuineq
Teknikkimut pilersuinermut tunngasut pilersinneqarsinnaapput, assersuutigalugu innaallagissamut, imermut, telemut kuuffissuarnullu nammineq pilersornissamut tunngasunik. Imeqarfiliorneq erngullu maangaannartup aqqutissaanik kiisalu nukissiuteqarnermik pilersuiffimmik annerusumik pilersitsiniaraanni Naalakkersuisunit akuersissummik peqqaarluni pilersitsisoqarsinnaavoq.
Taakku saniatigut teknikkikkut pilersuutit sananeqarsinnaapput, assersuutigalugu generatorit seqernullu kissaanik innaallagissiuutit nukissiuutillu allat illuaqqanut ataasiakkaanut atorneqartussatut atatinneqartut. Sanaartukkat atorneqarnerminni nipimik, putsumik, tipimik, sajuppillattarnernik, allatulluunniit eqqaamiunut pisariaqanngitsumik akornutaappata sanaartorneqarsinnaanngillat.
Nunaminertat sanaartorfigineqanngitsut
Nunaminertat sanaartorfiunngitsut siunertanut allanut atugassanngortitaanngitsut nunap ilusaa allanngortinneqassanngilaq saligaatsuutinneqassallunilu.
Sanaartornerup nalaani, nunaminertat sanaartorfiunngitsut sapinngisamik mianerineqassapput. Nunaminertat atunngitsut sanaartortoqarnerani, tassunga ilanngullugu qaartiterisoqarnerani innarlerneqarpata qanoq issusiatut ileqqillugu suliarineqassaaq.