Immikkoortuni taamaattuni suliniutinut tunngatillugu avatangiisinut sunniutaasinnaasut pitsaaliorlugit aaqqissuussanik aalajangersaasoqassaaq, taakkununnga ilanngullugit imikoq pillugu soorluttaaq uuliamik, akuutissanik aamma saviminikunit igitassat kiisalu immikkoortup ilaata teknikkeqarnermut aamma attaveqaasersuuteqarnermut atugassiissutigineqarsinnaavoq taamaattumik Avatangiisit illersorneqarnissaat pillugu inatsit naapertorlugu pingaarnertut najoqqutarineqassaaq nunaminertamut namminermut imaluunniit immikkoortunut eqqaaniittunut isumannaassutsimik naliliisoqaqqaarnera.
Sumiiffiit teknikkikkut attaveqaasersuutinullu atortulersuutit ukununnga immikkoortillugit inissinneqassapput:
E1: Teknikkikkut atortulersuutit
Immikkoortut ilaanniitinneqarput teknikkimut atortulersuutit soorlu imeqarfik, eqqaavissuaq, anartarfiit annittakkat imaannik imaarsivik, tankeqarfik, telemi atortut, qaartartuusivik, ujaqqanik piiaaffik, eqqakkanik ikuallaavik assigisaallu.
E2: Attaveqaatini atortulersuutit
Immikkoortut ilaanniipput attaveqaatinut atortulersuutit annerusut soorlu suluusalinnut mittarfik, qulimiguulinnut mittarfik, umiarsualiviit, aqquserngit isorartunerusut, putorsuit, majuartaat nivingasoq assigisaallu.
Teknikkimut atortulersuuteqarfimmi attaveqaasersuuteqarfimmilu nunaminertat sanaartorfigineqanngitsut
Nunaminertat sanaartorfiunngitsut siunertanut allanut atugassanngortitaanngitsut nunap ilusaa allanngortinneqassanngilaq saligaatsuutinneqassallunilu.
Nunaminertat atunngitsut sanaartortoqarnerani, tassunga ilanngullugu qaartiterisoqarnerani innarlerneqarpata qanoq issusiatut ileqqillugu suliarineqassaaq.