Illoqarfimmi qitiusoqarfiit illoqarfimmi qitiusoqarfittut atorneqakkajupput, tamaani akuleriinnik atuinissamut akuersissuteqartoqarsinnaalluni taama ittuni nalinginnaasunik atorneqartartunik, matumanilu ulluinnarni niuertarfiit, inuussutissarsiortut namminersortut, kiffartuussiviit, kulturikkut sunngiffimmilu suliaqartut (ass. pisiniarfiit, allaffiit, akunnittarfiit, neriniartarfiit, sannaveeqqat minnerit assigisaallu). Nunaminertat pisiniarfinnut atorneqartussanut ilaapput nunaminertat nioqqutissanik inissaqartitsinermik pisariaqartitsisut, inuussutissarsiutit oqinnerit avatangiisinut klassini 1 - 3-miittut aamma nalimmassarlugit ilaatinneqarsinnaallutik.
Illoqarfiup qeqqani sumiiffiit aamma ilaapput nunaminertat tamanit atorneqarsinnaasut inissiallu.
Illoqarfimmi qitiusoqarfiit ukununnga immikkoortinneqarsinnaapput:
C1: Tamanut siunertaq
Sumiiffiit tamanut siunertallit kiffartuussiviillu ilinniarnernut, paaqqinnittarfinnut, peqqinnissamut, oqaluffinnut, pisortat allaffiinut, sukisaarsaartarfinnut soorlu kulturikkut sunngiffimmilu sammisaqarnernut atorneqarsinnaapput. Aamma immikkoortumi taamaattumi sumiiffimmut pissusissamisoortumik inissiaqarsinnaavoq. Immikkoortumi tamanut siunertaqartunik sanaartorfiusumi sanaartukkat ataasiakkaat qitiusoqarfittut atugassat pilersinneqarsinnaapput.
C2: Qitiusoqarfittut siunertat
Qitiusoqarfittut siunertani ilaatinneqarput niuernermut, inuussutissarsiortut namminersortut, kiffartuussiviit, kulturikkut sunngiffimmilu suliallit, (ass. pisiniarfiit, allaffiit, akunnittarfiit, biografit, saqqummersitsisarfiit), pisortat suliffeqarfiit suliffiillu assingusut, illoqarfiup qeqqanut inissinneqarsinnaalluartut, kiisalu inissiat illoqarfiup qeqqanut tulluartut.
Inissiat pingaarnertut naqqanut inissinneqassanngillat.
Illoqarfiup qeqqa orniginartuutinneqarnissaa uummaarissuunissaalu qulakkeerniarlugu niuerniartarfiunerusumi illut silataat orniginartuutinneqarlutillu ammasuussapput (igalaalersorluagaassapput).
Atorneqarallarnera
Illoqarfiup qitiusoqarfittut qitiusullu ilaattut toqqarneqartuni illut inoqanngitsut nunaminertallu sanaartorfigineqanngitsut annermik atorneqarsinnaapput kommunimut pilersaarummi immikkoortumi atorneqartussatut allatut atorlugit, taamaalillutik illoqarfimmik uummarissaataasinnaallutik. Atorallarneqarsinnaaneri avatangiisinut illersorneqarsinnaasumik atungaassapput immikkoortumilu atuinissamut pingaarnertut avatangiisinut aalajangersakkat ataaniissallutik.
Illoqarfiup qeqqani nunaminertat sanaartorfigineqanngitsut
Nunaminertat sanaartorfiunngitsut siunertanut allanut atugassanngortitaanngitsut taamaallaat nunaminertatut ataatsimut atugassatut ilusilerlugillu atorneqarsinnaapput. Taakku sumiiffimmi inissisimavik atuinerlu naleqqussarfigalugit ilusiliisoqassaaq.
Nunaminertat sanaartorfigineqanngitsut saligaatsuutinneqarlutillu eqqiluitsuutinneqassapput.
Nunaminertat sanaartorfigineqarsimanngitsut atorneqarnerat umiatsianut containerinullu inissiisarnermi aalajangersakkat qaqugukkulluunniit atuuttuusut malinneqassapput. Umiatsianik containerinillu inaalitsinermut aalajangersagaq nunaminertamik atugassiinermi iluarsineqassaaq.
Nunaminertat atunngitsut sanaartortoqarnerani, tassunga ilanngullugu qaartiterisoqarnerani innarlerneqarpata qanoq issusiatut ileqqillugu suliarineqassaaq.