Inissiaqarfinni ilaatinneqarput nunaminertat inissialiornissamut atorneqartussat.
Inissiaqarfiit sanaartukkanut inissitsiteqqinneqartarput (A1, A2, A3, A4) kiisalu inuussutissarsiorfiusinnaasunut (X, Y).
A1: Ammasumi pukkitsunik inissianik sanaartorneq
Ammasumi pukkitsunik inissianik sanaartorneq ima paasineqassaaq immikkoortortami annermik ilaqutariinnut ataatsinut imaluunniit marlunnut/illunik affarleriinnik sanaartortoqartoq. Ilaqutariinnut ataatsinut illumi inissiaq ataasiuvoq ilaqutariinnut marlunnut illumi inissiat marluullutik, sanaartukkami inissiat ammorluinnaq (affarleriit) imaluunniit quleriittut agguarneqarsinnaapput.
A2: Akulikitsunik - pukkitsunik inissianik sanaartorneq
Akulikitsunik pukkitsunik inissianik sanaartornermi pineqarput inissiat uiguleriiaat, inissiat ataqatigiiaat aamma illut eqimattakkuutaat.
Illut uilukutsukkuutaat sukumiisumik nalilersuisoqareerpat qummut sammisunik avissaarfilersorneqassapput.
A3: Quleriinnik inissialiat
Quleriinnik inissialiat imatut paasineqassapput; aqquserngup sinaani inissiat, inissiaqarfissuanngorlugit inissialiat aamma illut immikkuullarissut pingasunik amerlanernilluunniit quleriillit.
A4: Akuleraartunik inissiaqarfik
Akuleraartunik inissiaqarfiit ammasunik-pukkitsunik, imminnut qanittunik-pukkitsunik aamma quleriinnik inissiat akuleraartunik nassuiarneqarput.
X: Inissiaqarfiinnaat
Inissiaqarfiinnaat tassaatinneqarput sumiiffiit taamaallaat inissialiorfissanut atorneqartussat. Immikkoortuni tassani killilimmik inuussutissarsiuteqarfinnut atungassiaasinnaapput inissiamut atasut, ass. eqqartuussissuserisut, naatsorsuuserisut, illussanik titartaasartut, nujalerisut, ulluunerani paaqqinniffiit assigisaallu.
Inissiaqarfiinnarni inuussutissarsiuteqarfiit makku piumasaqaatit malissavaat:
- Suliffeqarfik illuummi tassani najugalimmit ingerlanneqassaaq allanik sulisoqarani.
- Najugaqarfittut isikkua allanngortinneqassanngilaq, tamatumunnga allagartalersuineq qaammaqqusersuinerlu ilanngullugit.
- Suliffeqarfik eqqaamiorisanut soorlu nipinik, putsumik tipimillu akornusersuutaassanngilaq.
- Suliffeqarfik biilinut unittarfinnik amerlanerusunik malunnaatilimmik pisariaqartitsiffiussanngilaq.
Y: Inissiaqarfiit inuussutissarsiuteqarfiusinnaasut
Inissiaqarfinni inuussutissarsiuteqarfiusinnaasuni inissiaqarfimmut atasumik namminersortunik inuussutissarsiuteqarfiunissaa nalimmassarneqarsinnaavoq, taanna suli inissiaqarfinnik imaqarpat. Inuussutissarsiutit inissiaqarfimmi piumasaqaatinut nalimmassarneqassaaq inissiaqarfinnilu avatangiisinut piumasaqaatinik malinnissalluni kiisalu inissiaqarfiup annertussusaanut, ilusaanut il.il. tunngasunik piumasaqaatit ilanngullugit eqqarsaatigalugit. Inuussutissarsiortut namminersortut tassaasinnaapput eqqartuussissuserisut, nakorsiartarfik, illunik tuniniaasartut, naatsorsuuserisut, illussanik titartaasartut, nujalerisut arlalinnik sulisullit kiffartuussinermillu inuussutissarsiuteqartut assigiinngitsut avatangiisinut klassini 1 - 2-miittut ungasissutsimut innersuunneqartut naammassisimappatigit. Linki: Aalajangersakkat nalinginnaasut – Avatangiisinut klassit
Inissiaqarfinni inuussutissarsiortut piumasaqaatit makku naammassisimassavaat, avatangiisinut klassit malillugit:
- Najugaqarfittut isikkua allanngortinneqassanngilaq, tamatumunnga allagartalersuineq qaammaqqusersuinerlu ilanngullugit.
- Suliffeqarfik eqqaamiorisanut soorlu nipinik, putsumik tipimillu akornusersuutaassanngilaq.
- Suliffeqarfik biilinut unittarfinnik amerlanerusunik malunnaatilimmik pisariaqartitsiffiussanngilaq.
Inissianut atasunik sanaartukkat atortulersuutillu
Inissianik sanaartornermut atasumik naatsiivinnut, ammasunik aneerasaartarfinnut aamma quinik sanaartorsinnaanermut nunaminertanik tunniussisoqarsinnaavoq.
Quinik sanaartornernut ilaapput garageat, biilit uninngaartarfii qulisat, naasuusiviit, ukiukkut naasuusiviit assigisaallu annerpaamik 12,5 m2-erit taamaattoq immikkoortumi pineqartumi ungasissutsinut sanaartornermut maleruaqqusat eqquutsinneqassallutik.
Aneerasaartarfiup ataatsimut angissusaa aneerasaartarfinnut aalajangersagaq atuuttoq naapertorlugu inissiamut ataatsimut aallaaviatigut 25m2-imik angissuseqarsinnaavoq.
Naatsiiviit inissamut ataatsimut aallaaviatigut 25 m2-imik angissuseqarsinnaapput. Naatsiiviit qisunnik ungaluneqarsinnaapput annerpaamik 1,2 meterisut portutigisumik.
Pingaartumik quleriinnik inissialiornermut immikkoortunut (A3) aamma inissialianut assigiinngitsumik atugassanut (A4) nunaminertanik tunniussisoqarsinnaavoq naatsiivinnut atorneqartussanik, kommunalbestyrelse naliliippat immikkoortumik atuinissamut tamanna ajornartitsinngippat siunertamullu naapertuuttoq, kiisalu immikkoortuni ataasiakkaani ataatsimut inissaqarluartitsineq attanneqarpat.
Nunaminertamik atuinissamut taamaallaat tunniussisoqarsinnaavoq nunap ilusaa, pisortanit pilersuinermut ledningit, teknikkikkut sanaartukkat, ikuallattoornissamut ungasissuseq kiisalu sanilerisat isikkiviannut tamanna ajornanngippat.
Inissiaqarfinni nunaminertat sanaartorfigineqanngitsut
Nunaminertat sanaartorfiunngitsut siunertanut allanut atugassanngortitaanngitsut taamaallaat nunaminertatut ataatsimut atugassatut ilusilerlugillu atorneqarsinnaapput. Inissianik sanaartornermi ataatsimoorfissaliamik pinngortarfiliornissamulluunniit nunaminertamik atugassaqartitsisoqartassaaq. Nunaminertamik atugassiissuteqarnermi inissiat atulersinneqannginnerini uninngaarfinnik pinnguartarfinnillu pilersitsisoqarnissaanut piumasaqartoqarsinnaavoq.
Nunaminertat sanaartorfigineqarsimanngitsut saligaatsuutinneqassapput, soorluttaaq nunaminertanik sanaartorfiusimanngitsunik atuineq inunnut allanut akornusersuutaassanngitsoq.
Nunaminertat sanaartorfigineqarsimanngitsut atorneqarnerat umiatsianut containerinullu inissiisarnermi aalajangersakkat qaqugukkulluunniit atuuttuusut malinneqassapput. Umiatsianik containerinillu inaalitsinermut aalajangersagaq nunaminertamik atugassiinermi iluarsineqassaaq.
Nunaminertat atunngitsut sanaartortoqarnerani, tassunga ilanngullugu qaartiterisoqarnerani innarlerneqarpata qanoq issusiatut ileqqillugu suliarineqassaaq.
Kommunalbestyrelse piumasaqaateqarsinnaavoq, nunaminertap sanaartorfiunngitsup aalajangersimasumik ilusilersorneqarsinnaaneranut immikkoortortami sumiiffimmini aamma illoqarfimmut tulluartunngoqqullugu.
Inissiaqarfinni suliffeqarfiit pillugit immikkut ittut
Kommunalbestyrelsimit akuersissutigineqarsinnaavoq immikkoortuni inissiaqarfittut siunertaqartuni suliffeqarfiliortoqarsinnaanera, soorlu meeqqeriviit aamma ulloq unnuarlu paaqqinnittarfiit il.il., piumasaqaatit tulliuttut naammassineqarsimappata:
- Suliffeqarfik ima ingerlanneqassaaq, sumiiffiup najugaqarfittut isikkua allanngortinneqassanani, tamatumunnga allagartalersuineq qaammaqqusersuinerlu ilanngullugit.
- Suliffeqarfik eqqaamiorisanut soorlu nipiliornerulernermik aqqusinermilu angallannerulernermik akornusersuutaassanngilaq.
- Suliffeqarfik biilinut unittarfinnik amerlanerusunik pisariaqartitsiffiussanngilaq.
Inissiat 25-nut immikkoortortamut ataatsimut suliffeqarfimmik ataatsimik aallaaviatigut pilersitsisoqarsinnaavoq.