Immikkoortut ilaannut ataasiakkaanut nunaminertanik atuineq pingaarnertut aaqqissuussinerni aalajangersarneqartarput aamma illoqarfiit sanaartorfiillu eqqarsaatigalugit immikkoortiterneqartarput nunami ammaannartumik sanaartornermut atasumik.
Sumiiffiup suunerata immikkoortut siunissami siunertaanut atorneqarnerannullu aalajangersaaffigineqartarput.
Najugaqarfinni immikkoortunut ilaasut immikkoortuni A-E-mik ilisarnaateqartut, nunani ammaannartuni immikkoortut assigiinngitsut K-O-mik ilisarnaateqarput.
Inoqarfinni immikkoortut suussusaat:
- Inissiaqarfiit (immikkoortut A-t)
- Inuussutissarsiuteqarfiit- aamma umiarsualiveqarfiit (immikkoortut B-t)
- Illoqarfiup qeqqaniittut (immikkoortut C-t)
- Nunaminertat sanaartorfiusussaanngitsut aamma sukisaarsartarfiit (immikkoortut D-t)
- Sumiiffiit teknikkimut atuuttut aamma attaveqaateqarfiusut (immikkoortut E-t)
Nunaannarmi immikkoortut assigiinngitsut:
- Sumiiffiit sunngiffimmi illuaraqarfiusut aamma aasarsiortarfinnik illoqarfiusut (immikkoortut K-t)
- Sumiiffiit qasuersertarfittut atorneqartut immikkuullarissut (immikkoortut L-t)
- Nunamik atuinissamut uumasuuteqarnermullu immikkoortut (immikkoortut M-it)
- Sumiiffiit teknikkeqarfiusut aamma attaveqaateqarfiusut (immikkoortut N-it)
- Immikkoortut ilaat sanaartorfigeqqusaanngitsut (immikkoortut O-t)
Immikkoortunut assigiinngitsunut aalajangersakkat nalinginnaasut
Immikkoortut assigiinngitsut suussusiannut aalajangersakkat nalinginnaasut tassaapput aalajangersakkat immikkoortut atugassiissutigineqartut akimorlugit atuuttut aamma tunngaviatigut immikkoortut ataasiakkaat ilaannut atuuttut, immikkoortumut tassunga tamakkiisumik imaluunniit immikkuualuttunut immikkut aalajangersagartaqanngitsunut.
Siunissamut isigaluni ineriartornissamut pilersaarutit
Pilersaarusiornermut inatsimmi nr. 4, 25. januaari 2024-meersumik, §14a, nutaaq naapertorlugu, immikkoortut ilaannut siunissamut isigaluni ineriartornissamut pilersaarusiornissamut kommunalbestyrelse periarfissaqalernikuuvoq, immikkoortullu ilaat siunissami atorusutatut siunertanut inniminnerneqarsinnaallutik.
Immikkoortut ilaat tamakkua pingaarnertut najoqqutassanik aalajangersagartaqanngillat aamma immikkoortup ilaani nunaminertamik atuinissamut tunniussisoqarsinnaanngilaq. Immikkoortup ilaanut siunissamut isigaluni ineriartornissamut pilersaarut aatsaat tunngaviliinissamut aalajangersakkanik pingaarnernik suliaqartoqarneratigut atorunnaarsinnaavoq, takuuk § 20.
Immikkoortut ilai siumut isigaluni ineriartornissamut pilersaarusiorfigineqarsimasut § 45a naapertorlugu pilersaarusiornissamut qinnuteqarnissamut periarfissiisinnaapput.