Erseqqissumik nalilersuereernikkut, kommunimut pilersaarummut tapiliussamit kommunalbestyrelse aalajangersakkanit immikkuualuttunit immikkut ittumik akuersissuteqarsinnaavoq, Pilersaarusiornermut inatsimmi § 50 naapertorlugu, immikkut ittumik akuersissuteqarneq kommunimut pilersaarummi immikkoortumut tunngatinneqartumi tunngavinnut akerliunngippat.
Aalajangersakkat illoqarfiup ilaanut immikkuualuttut kommunimut pilersaarummut tapiliussami aalajangersarneqareersut aammalu assersuutigalugu sanaartukkat angissusaanik, ilusaanik sanaartorfissallu inissisimaffissaannik aalajangersaaffiusut, kommunimut pilersaarummut tapiliussami tunngavinnut ilaanngillat, taakkunannga immikkut ittumik akuerineqarnissamik qinnuteqartoqarsinnaammat. Taakkunannga ilaanngillat allanngutsaaliinissamut tunngatillugu aalajangersakkat, pingaarnertut aalajangersakkanut pingaarnernut uiggiullugit oqaasertaliunneqartartut.
Kommunimut pilersaarummut tapiliussami aalajangersakkani illoqarfiup ilaanut tunngasuni immikkuualuttunit immikkut ittumik akuersissuteqartoqarsinnaanngilaq, taamaattumillu immikkut ittumik akuersissuteqarfigeqqulluni qinnuteqaatit suulluunniit erseqqissumik nalilersorneqartassapput.
Immikkut ittumik akuersissuteqarfigeqqulluni qinnuteqarnermi pissutsit arlallit nassuiaateqarfigineqartussat tassaapput;
- aalajangersakkamit (-nit) sorlermit immikkut ittumik akuersissuteqarfigineqarnissamik qinnuteqaateqarnerlutit,
- immikkut ittumik akuersissuteqarfigineqarnissamut tunngavilersuut; qinnuteqaateqarnermut ilanngullugu nassiunneqassaaq, aalajangersakkamit pineqartumit sooq immikkut ittumik akuersissuteqarfigineqarnissat qinnuteqaatiginerlugu nassuiaateqarnissat aammalu sooq akuerineqassanerlutit. Nassuiaateqarninnut ilannguttariaqarpatit atortussat allaaserineri aammalu sanaartornermut atortut suunerisa nassuiaataat, qalipaatit toqqakkat aammalu titartagartaat pisariaqartut; taakkununnga ilanngullugit illup saqqaanut akimullu titartagartaanut tunngasut.
Aalajangersakkat eqqaamiunut attuumassuteqartunulluunniit allanut pingaarutillit immikkut ittumik akuersinerit, eqqaamiut imaluunniit allat suliap naammassineqarneranut annertuumik nammineerlutillu soqutigisaqartutut nalilerneqartut kommunalbestyrelsimit tusarniarneqarneranniit minnerpaamik sapaatit akunneri marluk ingerlareerpata, aatsaat nalunaarutigineqarsinnaapput. Tusarniaanermi sumut immikkut ittumik akuerineqarnissamik qinnuteqartoqarnersoq aammalu oqaaseqaatigiumasat sivikinnerpaamik sapaatit akunnerinik marlunnik piffissaliussap iluani nassiunneqassasut nalunaarutigineqassaaq.